Nupay Nagkamang, Naragsakda nga Agserserbi iti Dios

DAGITI gubat, panagbisin, didigra, ken riribuk. Kadagiti dadduma a tattao, gagangay laeng dagitoy a paulo ti damag. Kadagiti adu a sabsabali pay, paset dagitoy iti inaldaw a panagbiag. Kas maysa a sangalubongan a timpuyog dagiti Kristiano, pagaammo unay dagiti Saksi ni Jehova nga iti aniaman a kanito mabalin a bumtak ti gubat wenno dumteng ti didigra, ket mabalin nga agsagaba ti dadduma kadagiti kakabsatda iti intero a lubong. Ket no isalakan dagiti tattao ti biagda, mabalin a kasta met ti aramiden dagiti kakabsattayo.

Iti adu a pagilian idiay Africa, adu a tawen nga inib-ibturan dagiti Saksi ti kakasta a kasasaad. Adu kadakuada ti agimpake iti aniaman a mabalinda nga awiten ken agsapul iti pagkamangan iti sabali a lugar. Nupay adda lugan dagiti dadduma, nalabit maysa a bisikleta, kaaduanna ti magmagna​—iti adu nga aldaw, lawas pay ketdi​—tapno makagtengda iti papananda.

Ti maysa a kasta a lugar a nagkamanganda isu ti maysa a bassit nga ili a managan Mboki, iti Central African Republic. Kadagiti napalabas a tawen, rinibribu a lallaki ken babbai, ubbing ken natataengan ti dimteng. Karaman kadakuada ti adu a Kristiano a kakabsattayo a lallaki ken babbai, a kadua dagiti interesado. Siempre, interesado unay dagiti padatayo a Kristiano iti sanga nga opisina ti Watch Tower Society idiay Bangui, ti kabesera ti Central African Republic, a makakita kadagitoy a nagkamang tapno matulonganda ida. Naminlima a daras a naibaon ti maysa a pannakabagi nga addaan awit a kuarta, taraon, kawes, ken medisina, a sibubuslon nga impaay dagiti Saksi idiay Bangui, ag-1,130 a kilometro ti kaadayona. Nupay nakurapay laeng dagidiay a nangipaay kadagitoy a nabuslon a tulong, naragsakda a mangaramid iti aniaman a kabaelanda.

Ipapan Idiay Mboki

Kayat a maammuan dagiti kakabsat idiay sanga nga opisina no ania pay ti maaramidan ken no kasano a matulongan iti naespirituan dagitoy a managkamang. Isu a rinugianmi ken ni baketko ti agbiahe a naglugankami iti adda dualna a Land Cruiser, a kaduami ni Symphorien, maysa nga espesial a payunir, ken ni baketna. Kabesado ni Symphorien ti dalan, ken makapagsao iti Zande, maysa a pagsasao dagiti managkamang idiay Mboki. Nangbusboskam iti uppat nga aldaw a nawatiwat a biahe tapno makagteng sadiay.

Iti naudi nga 400 a kilometro a dinaliasatmi, nalabsanmi ti maysa a napintas a katurturodan nga away ken addaan kadagiti dadakkel a kayo a baobab. Agsasaruno a nalabsanmi dagiti babassit a purok. Iti daytoy nawatiwat a dalan, apag-isu a 50 a rangtay ti nabilang ni baketko​—adu ti rugak-rugak, dadduma ti saanen a mabalin a pagnaan. Tinarimaanmi dagiti dadduma a rangtay babaen kadagiti pedaso ti kayo ken narukop a baotek, indualmi ti lugan, nagkararag, ken in-inayad nga intuloymi ti nagbiahe. No adda maysa a bassit a purok iti asideg, agtataray nga umay dagiti ubbing tapno tumulong​—a kasukat ti bassit a bayad. Masdaawkami ta kankanayon a makabirokda kadagiti pedaso ti kayo ken tabla manipud iti rangtay iti karuruotan ken kadagiti kasamekan iti asideg. Napanunotmi nga amangan no linikkabda la dagitoy ken inlemmengda sadiay para kadagiti biahero nga agkasapulan.

Namitlo a daras a pinagkedkedanmi ti tulong dagidiay nga agtutubo, ta agparang a napeggad a ballasiwen dagiti rangtay. Isu a simmiasikam iti dalan, a nagpababakam iti waig, kadagiti kabatuan, sakam simmang-at manen iti turod, ken nagsubli iti dalan. Anian a ragsakmi ta kalgaw idi, ta no saan awan koma ti sabali a pamay-an tapno makapagdaliasatkami, malaksid no aglugankam iti helicopter!

Ania ngata ti kasasaad idiay Mboki? Masansan a mapanunotmi daytoy bayat nga agdaldaliasatkam iti daytoy awan patinggana a “piste,” maysa a sao a Pranses a maus-usar iti Central African Republic para iti maysa a kalye wenno dalan a naaramid iti darat, batbato, ken naburakburak a batbato​—ken rinibribu nga abut.

Iti maikapat nga aldaw, idi mumalemen, intudó ni Symphorien dagiti sumagmamano a kalapaw a naaramid iti pan-aw a napalawlawan kadagiti papaya ken minulaan ti kamoteng-kahoy. “Voilà! Addatayon iti Mboki,” impukkawna. Nasdaawkam bassit iti nakitami. “Daytoy kadi ti Mboki? Sadino ngay ti yan ti kampo?” sinaludsodmi, ta saan a kampo ti nakitami, no di ket balbalay laeng a naiwaraswaras iti aglawlaw. Babassit dagitoy ngem nadalus a kalapaw a naatepan iti pan-aw. Adu met dagiti kayo ken kasamsamekan iti sadinoman. Adda mulmula dagiti tattao iti abay ti balbalayda. Ti Mboki ket saan nga isu ti kita ti kampo a ninamnamami a makita; maysa dayta a dakkel a purok, ag-35 a kilometro ti kaatiddogna.

Pannakiam-ammo Kadagiti Kakabsat

Ammo dagiti kakabsat idiay Mboki a sumangpetkami, nupay impagarupda a lima nga aldaw ti biahemi. Idi nangngegda [ti ungor] ti luganmi, nagtatarayda a simmabat kadakami. Rimmuar dagiti lallaki, babbai, ken ubbing kadagiti kalapaw ken lakubda ken immayda manipud kadagiti bangkagda a kumablaaw kadakami. Nakaisemda amin, agkakatawa, ken makial-alamano, adu a daras no mabalbalin. Intugtugot pay dagiti inna dagiti tagibida a nangsabat kadakami. Kayatda amin ti kumablaaw, ket sibabara a pinasangbaydakami.

Bassit laeng ti maaramidanmi ken ni baketko iti dayta a kanito gaput’ parikut iti pagsasao. Inkagumaanmi ti makisarita babaen ti sangkabassit a Pranses, sangkabassit a Sango, sangkabassit nga Ingles, ken Arabe. Kaaduan kadagiti kakabsattayo ti makasao, makabasa, ken makasurat iti pagsasao a Zande. Kasapulan nga ipatarus ken ilawlawag ni Symphorien ti programa para iti isasarungkarmi.

Intuloymi ti nagdaliasat iti sumagmamano pay a kilometro ket dimtengkam iti Kingdom Hall. Dayta ti kaunaan a “simbaan” nga imbangon dagiti nagkamang iti aniaman a relihion idiay Mboki. Adu pay a kakabsat ken dagiti annakda ken interesado ti immasideg tapno makialamano kadakami. Uray dagiti adu a kaarruba nga ubbing immasidegda a kadua dagiti kakabsat tapno makialamano kadakami.

Nangisagana dagiti kakabsattayo iti dua a babassit a pagtaengan para kadakami a bisitada. Nakadaldalus dagitoy. Nakasagana ken agur-uray kadakami dagiti naitimba a nadalus a danum. Nangitugotkam iti taraon ken inumen ta impapanmi a nakirang dagitoy ken tapno saan a madagsenan dagiti kakabsat kadakami. Bayat nga idisdiskargami iti lugan dagiti gargaretmi, immasideg ti maysa a balasitang ket dinamagna no ania a luto ti kayatmi iti manok a pangrabiimi, tinuno wenno mailuto iti sarsa? Pulos a saanmi a ninamnama dayta ket sinaludsodmi no ania ti planoda a pangikaanan iti dayta. Ti sungbat: kamoteng-kahoy wenno manioc. Isu a pinilimi ti manok nga addaan nagasang a sarsa. Napennek ti kasta unay a pannakabisinmi iti dayta a rabii. Ngem inaldaw a pinakandakami​—iti pangngaldaw ken pangrabii. Pulos a dikam mamati​—pakpakanen ken ay-aywanandakami dagiti nagkamang, nupay saan a nasaliwanwan ti biagda.

Maysa a Naragsak a Bassit a Kongregasion

Addakam ditoy, iti maysa a nasulinek a lugar ngem kakadua dagiti 21 a kakabsattayo. Dua laeng kadakuada ti bautisado idi dimtengda ditoy. Dagiti dadduma ket interesado idi dimtengda. Intultuloyda ti nagadal ket nabautisaranda iti napalabas a dua a tawen. Uppat pay ti nabautisaran iti maysa nga asideg a karayan bayat ti isasarungkarmi.

Ti maysa a naisangsangayan a pagarigan isu ni Faustino. Sakbay a dimteng idiay Mboki, naammuanna dagiti kangrunaan a kinapudno iti Biblia iti maysa a gayyem. Impateg ni Faustino ti maad-adalna. Di nagbayag, rinugianna ken ti gayyemna ti nangaskasaba kadagiti sabsabali, ngem naipasangoda iti ibubusor ket naibaludda gaput’ “panangguyugoy kadagiti umili” babaen ti relihionda. Bayat nga addada iti pagbaludan, simmuko ti gayyem ni Faustino gapu iti buteng ket naparuar. Dua a bulan kalpasanna, nabista ni Faustino. Nupay kasta, nalawag nga awan pammaneknek dagiti pammabasol a maibusor kenkuana, isu a nawayawayaan. Idi bimtak ti gubat iti lugarna, nagkamang ni Faustino iti Central African Republic, a sadiay naam-ammona dagiti kakabsat ket intultuloyna ti panagadalna iti Biblia. Isut’ nabautisaran iti Hulio 1991, ket idi 1992 simrek iti amin-tiempo a ministerio kas maysa a regular payunir.

Ti naragsak ken mannakigayyem a bassit a kongregasion idiay Mboki ket buklen itan ti maysa nga espesial payunir ken 21 nga agibumbunannag. Dua a kakabsat a lallaki nga Ingles ti pagsasaoda ti agserserbi kas panglakayen ken nasayaat ti pannakikomunikarda iti sanga nga opisina idiay Bangui. Impagarupmi a marigrigat ken nakaay-ay-ay ti kasasaad dagiti kakabsattayo a nagkamang, ngem saan met gayam. Nupay nakurapayda iti material, awan ti agrekreklamo, madukdukotan, wenno agtantanabutob. Sipud idi dimtengda, nangipatakder dagiti kakabsat kadagiti kalapaw ken balbalayda ken rinugianda ti agmula iti mabalinda a kanen ken agtaraken kadagiti manok. Narigrigatda la bassit no idilig iti sigud, ngem sibibiagda ken kaduada dagiti padada a Kristiano.

Yantangay adda 17,000 aginggat’ 20,000 a tattao a nagkamang idiay Mboki, ken manaynayonan pay kada bulan, addaan dagiti kakabsattayo iti nalawa a tay-ak para iti ministerioda. Kinaduami ida a napan nangasaba, ket talaga a makapainteres. Masansan nga usarenda ti Biblia iti pagsasao a Zande, ket naglaon daytoy a patarus iti nagan ti Dios iti Hebreo a Kasuratan ken iti sumagmamano a paset ti Kristiano a Griego a Kasuratan. Para kadagitoy a tattao, ti Dios ket saan la a basta “Mboli” (ti pagsasao iti Zande para iti “Dios”) no di ket “Yekova,” nga isu ti panangibalikasda iti personal a nagan ti Dios. Maysa a gagangay a balikas ti “Mboli Yekova.” Saan a sursuroten dagiti patarus a Protestante iti adu a sabsabali pay a pagsasao iti Africa ti kastoy nga umiso a pannakaipatarus; imbes ketdi, sinuktanda ti “Jehova” iti “Nzapa,” “Nzambe,” wenno sabsabali pay nga Africano a nagan para iti Dios.

Kas kaitungpalan ti padto ni Jesus, maikaskasaba ita ti naimbag a damag ti Pagarian iti intero a lubong, uray idiay Mboki. (Mateo 24:14) Addaan itan ti kongregasion iti nawadwad nga abasto a Biblia, libro, magasin, bokleta, ken tract iti amin a pagsasao a kasapulanda. Nalabit nga iti masanguanan, ad-adu pay a publikasion ti magun-odan iti pagsasao a Zande.

Agur-uray iti Maysa a Permanente a Pagtaengan

Iti damo a rabii, impabuyami ti slide program ti Sosiedad a napauluan “Dagiti Naragsak a Kombensionista iti Makindaya nga Europa Daydayawenda ni Jehova.” Iti simmaruno a rabii ti programa ket napauluan “Panangyeg Kadagiti Adu iti Kinalinteg iti Tiempo ti Panungpalan.” Naangay ti pabuya nga slide iti ruar, iti abay ti Kingdom Hall, iti baba ti naariwanas a tangatang ken naslag a bulan. Nagsayaat ketdin a panawen! Ginasut ti immay nagbuya kadagitoy a pabuya nga slide, ket nakaragragsak ken maipagpannakkel dagiti kakabsattayo ti mangiparang iti naisangsangayan a banag kadagiti umili.

Idi dimteng ti Lunes, nagsaganakamin nga agawid. Maysa manen dayta nga uppat-aldaw a panagbiahe kadagiti isu met laeng a dalan ken panagballasiw kadagiti isu met laeng a 50 a rangtay. Impilit ti maysa a kabsat a babai ti agsagana iti taraon a balonmi nga agbiahe​—dua pay a manok, a natunon ken narekaduan iti bawang. Anian a bang-ina iti agsapa bayat a nakalugankami iti Land Cruiser. Iti pangngaldaw nagsardengkam iti katantanapan tapno tagiragsakenmi [a kanen] dagiti tinuno a manok bayat a malaglagipmi dagiti kakabsattayo idiay Mboki. Nupay napilitanda a nagkamang, intultuloyda ti agserbi ken Jehova a simamatalek, nga ur-urayenda ti maysa a permanente a natalna a pagtaengan iti inkari ti Dios a baro a daga. (2 Pedro 3:13)​—Naipatulod.