Dagiti Saludsod Manipud Kadagiti Managbasa
Ania ti kayat a sawen ni apostol Pablo idi kinunana a ‘lipaten dagiti bambanag a nalikudan ken kamakamen a ragpaten dagiti bambanag iti masanguanan’? (Filipos 3:13) Maigagara aya ti maysa a tao a lipaten ti maysa a banag?
Saan, kaaduanna ditay maigagara nga iwaksi ti lagip iti panunottayo. Kinapudnona, adu ti malipatantayo a kayattay koma a malagip ken adu ti malagiptayo a malipatantayto no agangay. No kasta, ania ti kayat a sawen ni Pablo idi insuratna dagiti sasao ti Filipos 3:13? Tulongannatay ti konteksto a mangtarus.
Iti Filipos kapitulo 3, deskribiren ni Pablo dagiti “pangibatayan[na] iti panagtalek . . . iti lasag.” Dakamatenna ti di mababalaw a nalikudanna a kas Judio ken ti regtana iti Linteg—bambanag a mabalin a nangted koma kenkuana iti adu a bentaha iti nasion ti Israel. (Filipos 3:4-6; Aramid 22:3-5) Ngem, tinallikudanna dagita a bentaha, nga imbilangna ida a pukaw, no ar-arigen. Apay? Agsipud ta adda nasarakanna a nasaysayaat a banag—“ti naringbaw a pateg ti pannakaammo ken Kristo Jesus.”—Filipos 3:7, 8.
Ti kangrunaan a kalat ni Pablo isu ti pananggun-od, saan nga iti saad iti daytoy a lubong, no di ket ti “nasapsapa a panagungar kadagiti natay.” (Filipos 3:11, 12) Isu nga insuratna: ‘Lipaten dagiti bambanag a nalikudan ken kamakamen a ragpaten dagiti bambanag iti masanguanan, agtultuloyak nga agturong iti kalat maipaay iti gunggona a panagpangato nga ayab ti Dios babaen ken Kristo Jesus.’ (Filipos 3:13, 14) Idi kinuna ni Pablo a ‘lipatenna dagiti bambanag a nalikudan,’ dina kayat a sawen a pinunasna iti panunotna “dagiti bambanag a nalikudan.” Nalawag a malagipna pay laeng idi dagitoy, tangay kadakdakamatna ida. Maysa pay, iti orihinal a Griego, inaramatna ti maysa a porma ti verbo a mangipasimudaag iti madama a tignay, saan pay a nalpas. Kunana a ‘lipaten,’ saan a ‘nalipatanen.’
Nadumaduma ti kayulogan ti Griego a sao a naipatarus a ‘lipaten’ (e·pi·lan·thaʹno·mai), ket ti maysa kadagitoy isut’ “saan a maseknan iti,” wenno “baybay-an.” Sigun iti Exegetical Dictionary of the New Testament (inedit da Horst Balz ken Gerhard Schneider), daytoy ti kaipapanan ti “pananglipat” iti Filipos 3:13. Saan a pinampanunot ni Pablo dagiti banag nga insukona. Nasursurona a matmatan ida a saan a napateg. Mayarigda iti “adu a basura” no idilig iti nailangitan a namnama.—Filipos 3:8.
Kasano nga agaplikar ita ti sasao ni Pablo? Bueno, kas ken Pablo, mabalin a nagsakripisio ti maysa a Kristiano tapno makapagserbi iti Dios. Mabalin nga insukona ti karerana a dakkel ti masapulan tapno makapagserbi iti amin a tiempo. Wenno mabalin a kameng ti nabaknang a pamilia a nangipuera kenkuana nga agtawid gapu ta saanda nga umanamong iti kinapudno. Makomendaran ti kakasta a panagsakripisio, ngem di koma pakaseknan a kanayon dagitoy. ‘Lipaten,’ saanen a pakaseknan, ti maysa a Kristiano dagiti “bambanag a nalikudan” gapu iti nadayag a masakbayan nga agur-uray kenkuana.—Lucas 9:62.
Mabalin nga agaplikar iti sabali pay a pamay-an ti prinsipio nga adda iti likudan ti sasao ni Pablo. Ti ngay maysa a Kristiano a di umiso ti kababalinna idi sakbay a nakasursuro maipapan iti Dios? (Colosas 3:5-7) Wenno ibagatayon a kalpasan a nagbalin a Kristiano, nakaaramid iti nadagsen a basol ket dinisiplina ti kongregasion. (2 Corinto 7:8-13; Santiago 5:15-20) Bueno, no pudno nga agbabawi ken nagbalbaliwen, “naugasan[en] a nadalus.” (1 Corinto 6:9-11) Napalabasen ti napasamak. Mabalin a saanna a pulos malipatan ti inaramidna—kinapudnona, nainsiriban nga agsursuro iti kapadasanna tapno di maulit ti basol. Kaskasdi, ‘lipatenna’ iti anag a dina babalawen a kanayon ti bagina. (Idiligyo ti Isaias 65:17.) Gapu ta napakawanen maibatay iti daton ni Jesus, ikagumaanna a tallikudan ti napalabas.
Iti Filipos 3:13, 14, inladawan ni Pablo ti bagina kas maysa a tumataray iti lumba, a ‘kamakamenna a ragpaten’ ti kalat. Sikikita ti tumataray iti sango, saan nga iti likud. Kasta met, kumita koma ti maysa a Kristiano kadagiti bendision iti masanguanan, saan a kadagiti banag a nalikudan. Kuna pay ni Pablo: “No agannayas ti isipyo iti sabali iti aniaman a pamay-an, ti Dios ipalgaknanto kadakayo ti kababalin nga adda iti ngato.” (Filipos 3:15) Gapuna, ikararagyo iti Dios a tulongannakay a mangsukay iti kastoy a panangmatmat. Punnuenyo ti panunotyo iti pampanunot ti Dios a masakaran iti Biblia. (Filipos 4:6-9) Utobenyo ti ayat ni Jehova kadakayo ken dagiti bendision a sagsagrapenyo gapu iti dayta. (1 Juan 4:9, 10; 17-19) Iti kasta, babaen ti nasantuan nga espiritu tulongannakay ni Jehova a di maseknan iti tinallikudanyo. Imbes ketdi, kas ken Pablo, kumitakayo iti nadayag a masakbayan.—Filipos 3:17.