No Umimdeng Dagiti Pimmamulinawen a Puso
IDI 1989, DAGITI SAKSI NI JEHOVA IDIAY POLAND naipaayanda iti legal a pannakabigbig kas narelihiosuan nga organisasion. In-inut a nawayawayaan dagiti Saksi a naibalud gapu iti neutral a takderda kas Kristiano, ket napanawanda dagiti adu a balud a nagragut a mangammo iti ad-adu pay maipapan iti Biblia kadakuada. Adtoy ti maysa a salaysay no kasano nga iti maysa a pagbaludan ikagkagumaan a tulongan dagiti Saksi ni Jehova dagiti dati a pimmamulinawen a puso nga agtignay babaen ti bileg ti Sao ti Dios.
IDIAY WOŁÓW, maysa nga ili a pagnanaedan ti 12,000 a tattao iti makin-abagatan a laud a Poland, adda maysa a pagbaludan a 200 a tawenen ti kadaanna a nakaipupokan ti dadduma kadagiti kadadaksan a kriminal iti Poland. Sipud idi opisial a mabigbig ti trabahoda, inkagumaan dagiti Saksi ni Jehova nga idanon ti naimbag a damag ti Pagarian kadagiti balud sadiay, ket ar-aramidenda daytoy a sipapasnek.
Ti surat ti Ministry of Justice idi Pebrero 1990 kadagiti amin a direktor ti pagbaludan idiay Poland ti nangwaknit iti dalan. Nadakamat iti surat a dida koma “mangaramid kadagiti pakarigatan” iti asinoman kadagiti balud a mayat nga umawat kadagiti publikasion ti Watch Tower wenno makipagkita kadagiti Saksi ni Jehova. Tangay adu a tawen ti binusbos ti dadduma kadagiti Saksi idiay pagbaludan ti Wołów, am-ammoda unay dagiti napeklan a balud sadiay. Nupay kasta, nagpannurayda iti pammendision ni Jehova iti panagreggetda a mangpalukneng iti pimmamulinawen a puso dagiti dadduma a balud babaen ti kinapudno a masarakan iti Biblia.
Panangyussuat iti Trabaho
“Narigat ti panangisayangkat iti programa,” kuna ni Kabsat Czesław, a taga siudad ti Wrocław, ag-40 a kilometro ti kaadayona, nga autorisado a sumarungkar iti pagbaludan idiay Wołów. “Innalana ti adu a napaut a pannakisarita kadagiti opisial ti pagbaludan tapno mapapatida a dagiti ‘narelihiosuan a serbisiotayo’ ket agpaay a pagimbagan dagiti balud.”
Ti kadua ni Czesław a ni Paweł malagipna a nagbalin a komplikado dagiti bambanag idi nga “impetteng ti maysa a nangato ti saadna nga opisial a pagpambar laeng dagiti balud dagiti narelihiosuan a serbisio tapno makagun-odda iti material a gunggona.” Ngem idi tallo kadagiti dati a pagbutbutngan a kriminal ti nagpabautisar idi 1991, nagbalbaliw ti kababalin dagiti autoridad iti pagbaludan, ket simmayaat ti panagtitinnulong.
“Inrugimi babaen ti panangasaba kadagiti balud, kadagiti pamiliada nga umay sumarungkar kadakuada idiay pagbaludan, kasta met kadagiti agtartrabaho iti pagbaludan,” inlawlawag ni Czesław. “Idi agangay, napalubosankami a mangikasaba iti naimbag a damag iti tunggal selda, a naidumduma unay a pammalubos. Kamaudiananna, idi nasarakanmi dagiti immuna a nangipakita iti interes, napalubosankami a mangaramat iti bassit a siled a pangikonduktaan kadagiti panagadal iti Biblia ken pakaangayan dagiti Nakristianuan a gimong.” Wen, linuktan ni Jehova ti dalan nga agturong kadagiti pimmamulinawen a puso dagiti balud.
Epektibo a Programa a Panangisuro
Naileten ti bassit a siled. Tangay agbinnulig a mangaskasaba dagiti bautisado a balud ken dagiti kakabsat iti ruar, agingga iti 50 a balud ti nangrugi a tumabuno kadagiti gimong. “Iti nasurok a tallo a tawen, inangaymi sadiay amin a panaggigimong, ket regular a tinabunuan dagiti balud dagiti linawas a gimong,” kuna ti maysa kadagiti lokal a panglakayen. Isu nga idi Mayo 1995 naipaaramat kadakuada ti dakdakkel a siled.
Kasano a matinong dagiti responsable a kakabsat no asino ti mabalin a tumabuno kadagiti maang-angay a gimong iti pagbaludan? “Adda listaanmi kadagiti balud a mangipakpakita iti napasnek nga interes iti kinapudno,” inlawlawag da Kabsat Czesław ken Zdzisław. “No ti maysa a balud ket saan a rumang-ay wenno aglangan kadagiti gimong nga awan nainkalintegan a makagapu, mangipasimudaag nga awan panangipategna kadagita a probision, buraenmi ti naganna iti listaan sa mapakaammuan ti direktor ti pagbaludan.”
Kabayatan ti panagadalda iti Biblia, isuro met dagiti kakabsat dagiti balud nga agsagana a naimbag maipaay kadagiti gimong ken no kasano nga epektibo nga usaren dagiti literaturatayo. Iti kasta, no makigimong dagiti balud, nakasaganadan a naimbag ket nawayada a makiraman. Makapabileg dagiti komentoda, nalaingda a mangusar iti Bibliada, ken ipangagda ti pammagbaga, a masansan a mairaman kadagiti komentoda dagiti kapanunotanda a kas iti, ‘Maamirisko a masapul nga aramidek daytoy wenno dayta.’
“Amin-amin, 20 ti mayad-adalan iti Biblia idiay pagbaludan ti Wołów. Walo kadakuada ti ikonkondukta ti tallo a balud nga agibumbunannag,” kuna ti sekretario ti kongregasion. Nagsayaat met ti imbunga ti panangasabada iti tunggal selda ken kabayatan ti pampannagnada iti aglawlaw ti pagbaludan. Kas pagarigan, iti unos ti sangapulo a bulan, manipud Setiembre 1993 aginggat’ Hunio 1994, nakaiwarasda iti 235 a libro, agarup 300 a broshur, ken 1,700 a magasin. Iti nabiit pay, dua kadagiti opisial ti pagbaludan ti nagkiddaw a mayadalan iti Biblia.
Mangyeg Rag-o Dagiti Espesial nga Asamblea
Idi agangay, adda nainayon iti programa a panagisuro iti dayta a pagbaludan, awan sabali no di dagiti makunkuna nga espesial nga asamblea. Iti gymnasium ti pagbaludan, iparang dagiti agdaldaliasat a manangaywan ken dadduma a kualipikado a kakabsat a lallaki dagiti kangrunaan a paset ti asamblea sirkito ken dagiti programa ti maysa nga aldaw nga espesial nga asamblea. Naangay ti umuna nga espesial nga asamblea idi Oktubre 1993. Limapulo a balud ti timmabuno, ken immay “dagiti intero a pamilia, a pakairamanan dagiti babbai ken ubbing manipud Wrocław,” impadamag ti pagiwarnak a Słowo Polskie. Agdagup iti 139 ti nakitaripnong. Iti intermision ti programa ti asamblea, pinagsasanguanda ti taraon nga insagana dagiti sister, ken naaddaanda iti tiempo para iti nasayaat a Nakristianuan a panaglalangen.
Pito a sabali pay nga espesial nga asamblea ti naangay sipud idi, ket saan laeng a dagiti balud ti nagunggonaan, no di ket uray pay dagidiay adda iti ruar. Idi a simmarungkar ti Saksi a babai iti maysa a balud idi idiay Wołów nga agnanaed itan iti ili, medio agatap idi damo. Ngem idi naibaga kenkuana a nagbalinen a Saksi ti maysa a balud, naklaat ket kinunana: “Saksin dayta a mammapatay?” Kas resultana, immannugot a mayadalan iti Biblia dayta a lalaki.
Nagbanag Kadagiti Makapasiddaaw a Panagbalbaliw
Talaga kadi a daytoy dakkel a programa a panangisuro pinaluknengna ti pimmamulinawen a puso dagiti balud? Bay-antay ida nga agestoria iti kabibiagda.
“Pulos a diak am-ammo dagiti dadakkelko gapu ta binaybay-andak idi ubingak pay, ket il-iliwek unay a marikna ti pammateg,” impudno ni Zdzisław, maysa a managpanunot a lalaki. “Nasapaak a nairaman iti krimen, ket idi agangay nakapapatayak. Napanunotko ti agpakamatay gapu ta makonsiensiaak, ket sipapasnek nga agbirbirokak idi iti napaypayso a namnama. Kalpasanna, idi 1987, nakabasaak iti magasin a Watchtower. Naammuak iti dayta ti maipapan iti namnama a panagungar ken agnanayon a biag. Inwaksik iti panunotko ti panagpakamatay idi naamirisko nga adda pay namnama ket inrugik ti agadal iti Biblia. Nasursurok itan ti kaipapanan ti ayat nga agtaud ken Jehova ken kadagiti kakabsat.” Sipud idi 1993, agserserbin daytoy dati a mammapatay kas ministerial nga adipen ken maysa nga auxiliary pioneer iti pagbaludan, ket idi napan a tawen nagbalin a regular pioneer.
Iti sabali a bangir, sidadaan nga immannugot nga agadal iti Biblia ni Tomasz. “Nupay kasta, saan a naimpusuan nga addang dayta,” impudnona. “Nakipagadalak laeng agsipud ta kayatko ti agpalastog no ilawlawagko kadagiti dadduma ti patpatien dagiti Saksi ni Jehova. Ngem diak impasnek ti kinapudno ti Biblia. Maysa nga aldaw, inkeddengko ti tumabuno iti Nakristianuan a gimong. Nabara ti panangabrasa kaniak dagiti bautisadon a balud. Nautobko nga imbes nga iparammagko ti pannakaammok, nasken a paluknengek ti pimmamulinawen a pusok ket balbaliwak ti panunotko.” Inrugi ni Tomasz nga ikawes ti baro a Nakristianuan a personalidad. (Efeso 4:22-24) Maysa itan a dedikado, bautisado a Saksi ket pagrag-oanna ti panangaskasabana kadagiti selda.
Panangparigat Manipud Kadagiti Dati a Gagayyem
Dagidiay nakaadal iti kinapudno ti Biblia idiay pagbaludan ket pinarigat unay dagiti dati a gagayyemda iti selda ken dagiti opisial iti pagbaludan. Malagip ti maysa kadakuada: “Kanayondak a rabrabaken ken uyawen. Ngem sipapanunotak kadagiti makaparegta a sasao dagiti kakabsat. ‘Agkararagka ken Jehova a di agsarday,’ kinunada kaniak. ‘Basaem ti Bibliam ket mariknamto ti makin-uneg a kinatalna.’ Pudno a nakatulong dayta.”
“Nasakit ti panagsasao dagiti padak a balud maibusor kaniak,” kuna ni Ryszard, maysa a nabaneg a bautisado a kabsat a lalaki. “‘Mabalinmo ti mapan kadagiti gimongyo, ngem dika agpannakkel ken aginlalaing, wen?’ imballaagda kaniak. Idi a binalbaliwak ti panagbiagko gapu ta iyap-aplikarko dagiti prinsipio ti Biblia, nagsagabaak gapu iti daytoy. Imburang-itda ti katrek, impalladawda dagiti literaturak iti Biblia iti aglawlaw, ken nagiwarada iti masakupak iti seldami. Nagkararagak ken Jehova a pabilgennak tapno makapagteppelak ket kalpasanna nagidalimanekak a siuulimek. Di nagbayag, nagsardeng ti panangparparigatda kaniak.”
“No makita dagiti padami a balud a nainget ti pangngeddengmi nga agserbi ken Jehova,” insalaysay ti dadduma a bautisado a balud, “adda manen sabali a kita ti pammarigat. Kasla kunkunada, ‘Laglagipem, saan a rebbeng nga uminum, agsigarilio, wenno agulbodka.’ Dagiti kasta a sasao tulonganna ti maysa nga agteppel, a dagdagus nga idianna dagiti aniaman a bisio wenno pannakaadikto. Tulonganna met ti maysa a mangpatanor kadagiti bunga ti espiritu.”—Galacia 5:22, 23.
Panagbalin a Dedikado nga Ad-adipen ti Dios
Iti pammalubos dagiti autoridad ti pagbaludan, naaramid ti umuna a panangbautisar iti gym idi primavera ti 1991. Ni Zdzisław idi ti naragsak a kandidato ti bautismo. Sangapulo ket dua a balud ti timmabuno, ken immay iti okasion ti 21 a kakabsat a naggapu kadagiti kongregasion. Makaparegta ti epekto ti taripnong kadagiti balud. Sumagmamano kadakuada ti nakadkadlaw unay ti panagrang-ayna, isu a dua pay a balud ti nagpabautisar met idi agangay iti dayta a tawen. Dua a tawen kalpasanna, idi 1993, namindua a naangay ti bautismo, ket pito pay a balud ti nangisimbolo iti dedikasionda ken Jehova!
Maipapan iti bautismo a naaramid iti Disiembre, kinuna ti lokal a pagiwarnak a Wieczór Wrocławia: “Agturturong dagiti tattao iti gym hall, nga agkikinnablaaw ken agiinnalamanoda amin. Awan asinoman nga estranghero ditoy. Buklenda ti maysa a dakkel a pamilia, nga agkaykaysada iti panunot, iti wagas ti panagbiagda, ken iti panagserbi iti maysa a Dios, ni Jehova.” Dayta a “maysa a dakkel a pamilia” ket buklen idi ti 135 a tattao, a pakairamanan ti 50 a balud. Am-ammuentayo ti dadduma kadakuada.
Kastoy ti kuna ni Jerzy, a nabautisaran idi Hunio [1993]: “Agpapan pay a naammuak ti kinapudno ti Biblia tawtawenen iti napalabas, addaanak iti pudpudno a pimmamulinawen a puso. Manangallilaw, nakidiborsio iti immuna nga asawak, nakikamalala ken Krystyna, addaan bastardo nga anak, ken rummuar-sumrek iti pagbaludan—dayta idi ti kabibiagko.” Iti pannakaimatangna iti panagbalin a Saksi dagiti dadduma a napeklan a kriminal bayat ti kaaddada iti pagbaludan, nangrugi nga inimtuodna iti bagina, ‘Mabalinko met kadi ti agbalin a nasaysayaat a tao?’ Nagkiddaw iti panagadal iti Biblia ket nangrugi a makigimong. Nupay kasta, naaramid ti napaypayso a panagbalbaliwna idi nadamagna iti piskal a nagbalin a maysa a Saksi ni Jehova ni Krystyna tallo a tawenen ti napalabas. “Talaga a naklaatak!” kuna ni Jerzy. “Naikunak, Siak met ngay? Ania pay ti ar-aramidek?’ Nautobko a tapno anamongannak ni Jehova, nasken nga urnosek ti panagbiagko.” Kas resultana, naaramid idiay pagbaludan ti naragsak a panagtiponda manen ken Krystyna ken ti 11 ti tawenna a balasitangda a ni Marzena. Saan a nagbayag, linegalda ti panagasawada. Nupay adda pay laeng iti pagbaludan ken narigat no dadduma ti sasaadenna, iti di pay nabayag nagadal ni Jerzy iti sign language ket tultulonganna dagiti tuleng a balud.
Naigameren ni Mirosław kadagiti kriminal nga aramid idi adda pay laeng iti elementaria. Napalaus ti panangraemna kadagiti ar-aramiden dagiti gagayyemna, ket di nagbayag inrugina metten nga aramiden ti kasta. Adu dagiti tinakawan wenno kinabkabilna. Kalpasanna nagtungpal iti pagbaludan. “Idi addaak iti pagbaludan, nagkiddawak iti tulong ti padi,” impudno ni Mirosław. “Ngem napalalo ti pannakapaayko. Isu nga inkeddengko ti agsabidong.” Iti daydi nga aldaw nga implanona ti agsabidong, nayalis iti sabali a selda. Nakasarak sadiay iti kopia ti Pagwanawanan a nangilawlawag iti panggep ti biag. “Ti simple ken nalawag nga impormasion ti apag-isu a kasapulak,” innayonna. “Ita, kayatkon ti agbiag! Nagkararagak ngarud ken Jehova ket kiniddawko kadagiti Saksi nga iyadalandak iti Biblia.” Napartak ti panagrang-ayna iti panagadalna iti Biblia ket nabautisaran idi 1991. Agserserbi itan kas auxiliary pioneer idiay pagbaludan, a naaddaan iti pribilehio a mangasaba iti tunggal selda.
Agdagup iti 15 a balud ti nabautisaranen. No pagtitiponen ti sentensiada ket agdagup iti 260 a tawen. Nawayawayaan ti dadduma sakbay a maturpos ti sentensiada. Napaababa iti 10 a tawen ti 25 a tawen a sentensia ti maysa a balud. Ket dagiti sumagmamano a nangipakita iti interes bayat ti kaaddada iti pagbaludan ti nagbalin a bautisado a Saksi kalpasan ti pannakawayawayada. Kanayonanna, adda uppat pay a balud nga agsagsagana para iti bautismo.
Panangbigbig Dagiti Opisial iti Pagbaludan
“Nangnangruna a nakadkadlaw ti panagbalbaliw ti kababalin dagiti balud,” kuna ti report ti pagbaludan. “Adu ti nangisardeng iti panagsigarilioda, ken kanayon a nadalus dagiti seldada. Nabatad dagiti kasta a panagbalbaliw iti kababalin dagiti adu a balud.”
Inreport ti pagiwarnak a Życie Warszawy a ti mangimammanehar iti pagbaludan idiay Wołów binigbigna a “disiplinado dagiti nakomberte; saanda a mangted iti parikut kadagiti guardia iti pagbaludan.” Nadakamat pay ti artikulo a sakbay a makompleto ti sentensia dagidiay nawayawayaan, nasayaat ti pannakibinnuligda kadagiti Saksi ni Jehova ket didan sinublianan ti dana ti krimen.
Ket ania ngay ti maikuna ti direktor ti pagbaludan? “Matarigagayan unay ti trabaho dagiti Saksi ni Jehova iti daytoy a pagbaludan ken dakkel ti maitulongna,” kunana. Kinuna ti direktor nga “iti pannakiadalda iti Biblia [kadagiti Saksi], nasuktan dagiti prinsipio ken pagalagadan dagiti balud, a mangipapaay kadakuada iti baro a mangidalan a puersa iti biagda. Nakaan-annad ken nadayaw ti kababalinda. Nagagetda nga agtrabaho; gistay awan a pulos ti problema kadakuada.” Siempre, dagiti kasta a paborable a komento dagiti autoridad ket makaay-ayo kadagiti Saksi a makipagtrabaho kadagiti balud idiay pagbaludan ti Wołów.
Dagiti sumarsarungkar a Saksi naan-anay a maawatanda ti sasao ni Jesus: “Am-ammok dagiti karnerok ket dagiti karnerok am-ammodak. . . . Imdengandanto ti timekko, ket agbalindanto a maymaysa nga arban, maymaysa a pastor.” (Juan 10:14, 16) Di malapdan uray dagiti pader ti pagbaludan ti Nasayaat a Pastor, ni Jesu-Kristo, a mangurnong kadagiti arig karnero a tattao. Agyaman unay dagiti Saksi idiay Wołów ta naikkanda iti pribilehio a makiraman iti daytoy naragsak a panagserbi. Manginanamada ken Jehova iti agtultuloy a pammendisionna iti panangtulong iti adu pay a pimmamulinawen a puso a mangipangag iti naimbag a damag ti Pagarian sakbay a dumteng ti panungpalan.—Mateo 24:14.
[Kahon iti panid 27]
Parikut ti “Kasla Ubing”
“Kalpasan ti pannakaibaludna iti medio naunday a tiempo, ti maysa a balud masansan a dinan ammo ti agbiag a nawayawaya, wenno agbukbukod,” napaliiw dagiti Saksi a mangaskasaba idiay pagbaludan ti Wołów. “Ti adda kadatayo isu ti parikut ti ‘kasla ubing,’ ti tao a kalpasan a nakaruk-at iti pagbaludan dina ammo nga aywanan ti bagina. Dayta ti makagapu a saan laeng a ti panangisuro kenkuana iti kinapudno ti Biblia ti akmen ti kongregasion. Nasken nga isaganami nga agbalin a paset ti komunidad, a pakdaaranmi kadagiti baro a peggad ken sulisog a nalabit pakaipasanguanna. Nupay agannadkami a saankam nga agbalin a nalabes a manalaknib, masapul a tulonganmi a mangabaruanan iti biag.”