Malagipyo Pay Kadi?

Naragsakankay kadi a nangbasa kadagiti kallabes a ruar ti Pagwanawanan? No kasta, masarakanyo a makapainteres a lagipen dagiti sumaganad:

◻ Apay a makapagtalektayo iti panangpili ni Jehova kadagiti tattao a mangidalan iti ilina?

Dagiti pilien ni Jehova a pangtedanna kadagiti rebbengen ket dagidiay addaan kadagiti kalidad a kasapulan iti panangidalan iti ilina iti wagas a kayatna a pangiturongan kadakuada iti maitutop a tiempo.​—8/15, panid 14.

◻ Ania ti maadaltayo iti kapadasan ni Jonas?

Ti laeng bagina ti pinanunot ni Jonas ket awan pannakaseknanna kadagiti sabsabali. Makasursurotayo koma ken Jonas babaen ti ditay panangipangpangruna iti bagbagitayo ken iti personal a rikriknatayo.​—8/15, panid 19.

◻ Iti ania a pamay-an a maikuna a “ti nagan ni Jehova nabileg a sarikedked”? (Proverbio 18:10)

Ti panagkamang iti nagan ti Dios kaipapananna nga agtalektayo ken Jehova a mismo. (Salmo 20:1; 122:4) Kaipapananna ti panangsuporta iti kinasoberanona, panangsalimetmet kadagiti linteg ken prinsipiona, panamati kadagiti karina, ken panangipaay kenkuana iti naan-anay a debosion. (Isaias 50:10; Hebreo 11:6)​—9/1, panid 10.

◻ Kasano a ti pamay-an a panangsaksi ni Pablo kadagiti dignitario ket agpaay a pagwadantayo?

Naannad ni Pablo iti pannakisaona ken Ari Agrippa, nga impaganetgetna dagiti punto a pagnumuanda ken Agrippa. Ipaganetgettayo met dagiti positibo nga aspeto ti naimbag a damag, nga igunamgunam dagiti namnama a pagpapadaantayo. (1 Corinto 9:22)​—9/1, panid 31.

◻ Siasino dagiti magunggonaan iti kinaanus ni Jehova?

Gapu iti kinaanus ni Jehova, minilion a tattao itatta ti maipapaayan iti gundaway a maisalakan iti um-umay nga “aldaw ni Jehova.” (2 Pedro 3:9-15) Ti kinaanusna ikkannatay met iti gundaway a ‘mangitultuloy a mangitrabaho iti pannakaisalakantayo buyogen ti buteng ken panagpigerger.’ (Filipos 2:12)​—9/15, panid 20.

◻ Kasano kapateg idi ti Septuagint a patarus ti Biblia?

Nakapatpateg ti naaramidan daytoy a patarus iti pannakaisaknap ti pannakaammo maipapan ken Jehova a Dios ken iti Pagarianna baeten ken Jesu-Kristo kas Ari. Nakatulong ti Septuagint a nangisagana iti dalan kadagiti Judio ken Gentil a Griego ti pagsasaoda idi umuna a siglo a mangawat iti naimbag a damag ti Pagarian.​—9/15, panid 30.

◻ Ania ti isuro kadatayo ti pangngarig maipapan iti anak a barayuboy maipanggep iti Dios?

Umuna, ni Jehova “manangngaasi ken managparabur, nainayad nga agpungtot, ken aglaplapusanan iti kinaimbag a siaayat ken kinapudno.” (Exodo 34:6) Maikadua, ‘sisasagana a mamakawan’ no adda makita a panagbalbaliw ti puso a mabalin a pangibatayan iti asi. (Salmo 86:5)​—10/1, panid 12, 13.

◻ Kaanonto a mapasamak dagiti natalna a kasasaad a naikari iti Isaias 65:21-25?

Kas nagkaykaysa a managdaydayaw ni Jehova iti naespirituan a paraiso itatta, sagsagrapen itan dagiti napulotan ken dagidiay “sabsabali a karnero” ti talna a naggapu iti Dios. (Juan 10:16) Ket ti kasta a talna agtultuloyto iti literal a Paraiso, inton ‘maaramid ti pagayatan ti Dios iti intero a daga, a kas sadi langit.’ Iti dayta a tiempo naan-anayton a maitungpal ti sasao ni mammadto Isaias. (Mateo 6:10)​—10/15, panid 24.

◻ Apay a selselebraran dagiti Kristiano ti anibersario ti kasar ngem dida rambakan dagiti kasangay?

Nasayaat ti panangmatmat ti Biblia iti panagasawa. Personal a pangngeddeng dagiti Kristiano no kayatda a selebraran ti anibersario ti kasarda, a lagipenda ti kinaragsak dayta nga okasion ken ti determinasionda nga agtinnulong iti panagballigida kas agassawa. Nupay kasta, dagidiay laeng panagkasangay dagiti pagano ti nailanad iti Biblia, ket dagita a rambak nainaigda iti kinadangkok.​—10/15, panid 30, 31.

◻ Ania ti iladladawan ti “apuy” iti ilustrasion ni Pablo a nailanad iti 1 Corinto 3:12, 13, ket ania koma ti laglagipen dagiti amin a Kristiano?

Adda apuy a pakaipasanguantayo amin iti biag​—dagiti pakasuotan ti pammatitayo. (Juan 15:20; Santiago 1:2, 3) Masuotto ti tunggal suruantayo iti kinapudno. Imballaag ni Pablo a no nakapuy ti panangisurotayo, nalabit dakesto ti pagbanaganna. (1 Corinto 3:15)​—11/1, panid 11.

◻ Kasano a ni Noe ‘nakipagna iti pudno a Dios’? (Genesis 6:9)

Nakipagna ni Noe iti Dios babaen ti panangtungpalna iti imbilin ti Dios nga aramidenna. Gapu ta inusarna ti biagna iti panagaramid iti pagayatan ti Dios, tinagiragsak ni Noe ti nabara, nasinged a relasion iti Dios.​—11/15, panid 10.

◻ Aniada a gundaway ti ipaay kadatayo ti ditay pannakaammo iti eksakto a tiempo a panangbales ti Dios kadagiti nadangkes?

Daytoy ti mangipaay kadatayo iti gundaway a mangipaneknek a pudno nga ay-ayatentayo ni Jehova ken kayattayo ti magna kadagiti dalanna iti agnanayon. Ipasimudaagna met a nasungdotayo iti Dios ken agtalektayo iti wagas a panangtamingna kadagiti bambanag. Maysa pay, tulongannatayo daytoy nga agtalinaed a naridam ken siririing iti naespirituan. (Mateo 24:42-44)​—11/15, panid 18.

◻ Ania ti kaipapanan ti panamati “iti nagan ti Anak ti Dios”? (1 Juan 5:13)

Kaipapanan daytoy ti panangtungpal iti amin a bilin ni Kristo, a pakairamanan ti bilinna nga ‘ayaten ti maysa ken maysa.’ (Juan 15:14, 17) Ti ayat ikagumaanna nga aramiden ti naimbag iti sabsabali. Pukawenna amin a panangidumduma gapu iti puli, relihion, ken kasasaad iti biag.​—12/1, panid 7.

◻ Apay a ‘puntiria ti pananggura’ dagiti Saksi ni Jehova? (Mateo 10:22)

Magurgura dagiti Saksi ni Jehova a di nainkalintegan gapu iti isu met laeng a rason a nakaidadanesan dagidi nagkauna a Kristiano. Umuna, an-annuroten dagiti Saksi ni Jehova dagiti narelihiosuan a pammatida iti wagas a di maawat dagiti sabsabali. Maikadua, nagbalinda a puntiria dagiti ulbod a pammabasol​—dagiti agdadata a kinaulbod ken tiritir a pannakaidatag dagiti patpatienda.​—12/1, panid 14.