Binalbaliwan ti Maysa nga Eskolar ti Petsa ti Manuskrito ti Biblia
Sigun ken Carsten Peter Thiede, maysa nga Aleman nga eksperto iti papyrology, adda nabileg a pammaneknek a ti tallo a pirsay ti papiro ti Ebanghelio ni Mateo (pagaammo kas Magdalen Papyrus) ket naisurat idi umuna a siglo.
Kalpasan a napagdilig dagiti pirsay (a naglaon kadagiti paset ti Mateo kapitulo 26) iti daanen a surat mainaig iti negosio a nasarakan idiay Egipto, napaliiw ni Thiede nga umarngi ti dokumento manipud Egipto “iti Magdalen Papyrus a kasda la agsingin—iti pakabuklan nga itsura ken iti sukog ken iti pannakabukel ti kada letra.” Ni Thiede ken ti kaduana nga autor a ni Matthew D’Ancona iti libroda nga Eyewitness to Jesus—Amazing New Manuscript Evidence About the Origin of the Gospels kunada a dagiti nagpadaan ti dua a dokumento ipasimudaagna a gistay naggiddan ti pannakaisuratda. Kaano? Napetsaan dayta a dokumento maipapan iti negosio “‘Idi maika-12 a tawen a panagturay ni Nero nga Apo, Epeiph 30’—Hulio 24, 66[K.P.], sigun iti kalendariotayo.”
“Nakapatpateg daytoy a panangipetsa, no husto,” kuna ni Propesor Philip W. Comfort, iti artikulo a naipablaak iti Tyndale Bulletin, “agsipud ta isaadna ti manuskrito ti Ebanghelio ti Mateo iti isu met laeng a siglo a pannakaisuratna.” Pagbalinenna met ti Magdalen Papyrus a kadadaanan a pirsay ti Ebanghelio nga adda pay iti agdama.
[Ladawan iti panid 29]
Ti Magdalen Papyrus, aktual a kadakkelna
[Credit Line]
Iti pammalubos ti Presidente ken Dagiti Kakaduana iti Magdalen College, Oxford