Tao—Nangatngato a Kita ti Animal?
“Napateg aya no ania ti patpatientayo maipapan iti nagtaudan ti biag?”
Imbangon ti maysa a 16 anyos a balasitang a taga Brazil daytoy a saludsod iti introduksion ti bitlana maipapan iti tema a “Tao—Nangatngato a Kita ti Animal?” Inawis ti maestra ti estudiantena a sungbatanna iti klase dayta a saludsod, kalpasan a nakaawat ti maestra iti maysa a kopia ti Hunio 22, 1998 a ruar ti Agriingkayo! iti dayta a tema.
Intampok ti agtutubo a Saksi no kasanot’ kadakes ti epekto ti sursuro nga ebolusion a naibatay iti natural selection. Kas pagarigan, patien ti adu a tattao a ti teoria ti ebolusion inturongna dagiti tattao a matmatan ti gubat kas maysa laeng a gagangay a paset ti agnanayon a pannakidangadang tapno agbiag, a timmulong a nangiwaya iti pannakabukel ti Facismo ken Nazismo.
Impakita it estudiante nga adda nagdakkel a nagdumaan dagiti tattao kadagiti animal. Kinunana: “Dagiti laeng tattao ti makapatanor iti espiritualidad. Dagiti laeng tattao ti mangikagumaan a mangtakuat iti kaipapanan ken panggep ti biag. Dagiti laeng tattao ti mariribukan gapu iti ipapatay, maseknan iti nagtaudanda, ken agtarigagay nga agbiag nga agnanayon. Anian a nagpateg a mangiwayatayo iti panawen a mangammo iti ad-adu pay maipapan iti nagtaudantayo!”
Dinayaw ti mannursuro ti nagsayaat a presentasion. Impagapuna ti balligina iti banag a kaay-ayo daytoy nga agtutubo a Saksi ti agbasa. Agdindinamag iti eskuelaanda nga isu ket nasaet a managbasa kadagiti naibatay-Biblia a publikasion kas ti Agriingkayo! ken Ti Pagwanawanan.
Maseknan unay dagiti Saksi ni Jehova iti epekto ti teoria ti ebolusion kadagiti puso ken panunot dagiti agtutubo. Gapuna, iti kongregasion a pakitimtimpuyogan daytoy nga agtutubo pinaregtana dagiti agtutubo a Saksi a mangtedda iti kopia ti Hunio 22, 1998 a ruar ti magasin nga Agriingkayo! kadagiti mannursuro ken kaeskuelaanda. Adda 230 a magasin a naiwaras iti nadumaduma nga eskuelaan iti siudad. Nagsuskribe iti magasin nga Agriingkayo! ti panguluen ti Science Department iti maysa nga eskuelaan.
Wen, dakkel ti epekto kadatayo ti patpatientayo maipapan iti nagtaudan ti biag! Impakita daytoy a balasitang ken dagiti gagayyemna a talaga a napateg ti panamati iti Namarsua iti biagda.