Mabalinyo Kadi a Sagrapen ti Makapnek a Biag?
SAAN a kanayon nga iparangarang ti makinruar a langa ti pudno a balorna. Ti kadakkelan ti balorna a papel de banko nga imparuar ti Estados Unidos ket aggatad iti $10,000. Ngem agbalor la iti sumagmamano a sentimo ti papel a nakayimprentaanna.
Pinampanunotyo kadin no makaited iti pudpudno a pannakapnek iti biagyo dagiti papel a bassit ti balorda? Patien ti adu a tattao a makaited dagita. Minilion a tattao ti agtartrabaho iti aldaw ken rabii tapno makaurnongda iti adu a kuarta a no dadduma, uray la isakripisioda ti salun-at, gagayyem, ken uray pay ti pamiliada. Ania ngay ti nagimbaganna? Makaipaay kadi ti kuarta—wenno ti aniaman a magatangna—iti pudpudno ken manayon a pannakapnek?
Sigun kadagiti managsirarak, narigrigat ti makontento no dagiti laeng material a banag ti pakapnekan. Kuna ti periodista a ni Alfie Kohn a “saan a kuarta ti katupag ti pannakapnek. . . . Nakaro ti panagdanag ken panagleddaang, agraman ti kinaawan ragsak, dagiti tattao a ti kalatda iti biag ket bumaknang.”—International Herald Tribune.
Nupay mabalin a mabigbig dagiti managsirarak a saan a maipaay ti kuarta ti makapnek a biag, sabali ti panangmatmat ti dadduma a tattao. Saan a nakaskasdaaw daytoy yantangay maipaspasango iti agarup 3,000 nga anunsio kada aldaw dagiti tattao nga agnanaed kadagiti pagilian iti Lumaud. Kotse man wenno kendi ti iyaw-awisda, ti kangrunaan nga ipagpaganetgetda isu daytoy: ‘Naragragsakka no gatangem daytoy a produkto.’
Ania ti resulta ti awan sardayna a panangitampok kadagiti material a banag? Masansan a maipuera dagiti naespirituan a banag! Sigun iti maysa a report ti magasin a Newsweek, nabiit pay nga indeklara ti arsobispo idiay Cologne, Alemania, nga “iti kagimongantayo, saanen a mapagsasaritaan ti maipapan iti Dios.”
Nalabit binusbosyo ti nganngani amin a pigsayo nga agsapsapul iti pagbiag. Mabalin a mariknayo a kasla awanen ti tiempoyo iti dadduma a banag. Nupay kasta, addada gundaway a mariknayo nga adda pay napatpateg iti biag ngem iti basta panagtrabaho agingga nga agsardengkayon gapu ta saanen nga ipalubos ti salun-at wenno ti edadyo.
Ad-adda kadi a makapnek ti biagyo no ipaayanyo iti atension dagiti naespirituan a banag? Ania ti mamagbalin iti biagyo a makapnek?