“Makakayaw a Kalding iti Bantay”

SAAN a gagangay nga usarentayo ti sao a makakayaw a pangdeskribir iti kalding. Mailadawantay ti kalding kas ayup a mangan iti gistay uray ania ken pagtaudan ti nananam a karne ken nasustansia a gatas​—ngem ditay awagan ida a makakayaw.

Kaskasdi, deskribiren ti Biblia ti asawa a babai kas “maay-ayat a kabaian nga ugsa ken maysa a makakayaw a kalding iti bantay.” (Proverbio 5:18, 19, NW) Ni Solomon, a mannurat iti libro a Proverbio, ket managpaliiw kadagiti atap nga ayup iti Israel. Saan a pakasdaawan ngarud nga inusarna daytoy a pangyaspingan. (1 Ar-ari 4:30-33) Kas ken David nga amana, nalabit napaliiwna dagiti kalding iti bantay a masansan nga agdakiwas idiay En-gedi, iti asideg ti aplaya ti Natay a Baybay.

Kanayon iti waig ti En-gedi ti babassit a pangen dagiti kalding iti bantay nga agnanaed iti kabangibang a Desierto ti Judea. Yantangay ti En-gedi laeng ti mabalin a paginuman iti dayta a natikag a lugar, sinigsiglon a dita ti kaykayat a paginuman dagiti kalding iti bantay. Kinapudnona, mabalin a ti kaipapanan ti nagan nga En-gedi ket “ubbog ti urbon ti kalding,” a mangpaneknek a masansan nga adda dagiti urbon a kalding iti dayta a lugar. Dita a nagkamang ni Ari David idi indadanes ni Ari Saul, nga uray la nagpuga “kadagiti pangalbuen a bato dagiti kalding iti bantay.”​—1 Samuel 24:1, 2, NW.

Agingga ita, makakitakayo iti kalding iti bantay idiay En-gedi, a sumalsalog kadagiti nabato a rangkis bayat a sursurotenna ti kalakian nga agturong iti yan ti danum. Iti kasta, mapagdiligyo ti kabaian a kalding iti bantay ken ti matalek nga asawa a babai. Ti kinakalmado ken kinangayedna iparangarangda met ti kababalin ti maysa a babai. Ti sao a “makakayaw” agparang nga iparipiripna ti nalibnos ken nangayed a langa ti kalding iti bantay.a

Masapul a naandur ken nangayed ti kabaian a kalding iti bantay. Kas dinakamat ni Jehova ken Job, aganak ti kalding iti bantay kadagiti kabatuan ken narigat a madanon a lugar a nalabit nakirang ti taraon ken agbaliwbaliw ti temperatura. (Job 39:1) Iti laksid dagitoy a pakarigatan, aywananna dagiti urbonna ken sanayenna ida a kumalay-at ken lumagto kadagiti kabatuan a kas iti kinasiglatna. Situtured met a saluadan ti kalding iti bantay dagiti urbonna kadagiti mangdangran kadagitoy. Adda nakapaliiw iti maysa a kalding iti bantay a mangab-abog iti agila iti kagudua nga oras, bayat a naglinged kenkuana ti urbonna tapno masalakniban.

Masansan a padakkelen dagiti Kristiano nga assawa a babbai ken inna dagiti annakda kadagiti narigat a kasasaad. Kas iti kalding iti bantay, sipapasnek ken situtulok nga ibaklayda ti inted ti Dios nga annongenda. Situtured met nga ikagumaanda a saluadan dagiti annakda kadagiti naespirituan a peggad. Isu nga imbes a makapainsulto kadagiti babbai daytoy a pangyaspingan, kinapudnona inturong ni Solomon ti atension iti kinalibnos ken kinaimnas ti babai​—dagiti naespirituan a galad nga agminar uray iti karirikutan unay a kasasaad.

[Footnote]

[Dagiti Ladawan iti panid 30, 31]

Ti maysa a Kristiano nga asawa ken ina iparparangarangna dagiti agkakapintas a naespirituan a galad bayat nga ibakbaklayna dagiti inted ti Dios nga annongenna