Naannadkayo Kadi?

NO MANGDUTOK idi ni Moises kadagiti agbalin nga ukom iti Israel, ikagumaanna a pilien dagidiay “masirib ken naannad ken addaan kapadasan a lallaki.” (Deuteronomio 1:13, NW) Saan laeng a ti kaadu ti kapadasan ti pagrukodan. Masapul met ti kinasirib ken kinamanakem.

Nanakman ti panagsasao ken panagtigtignay ti naannad a tao. Sigun iti Webster’s Ninth New Collegiate Dictionary, ti naannad a tao “ammona [met] no kaano nga agulimek.” Wen, adda “panawen ti panagsao,” ken adda “panawen ti panagulimek,” ket mapagduma dagitoy ti naannad a tao. (Eclesiastes 3:7) Masansan nga adda pagimbagan ti panagulimek, ta kuna ti Biblia: “Kadagiti adu a sasao saan nga agkurang ti pannakasalungasing; ngem ti manengngel kadagiti bibigna agaramid a sisisirib.”​—Proverbio 10:19.

Masapul a naannad dagiti Kristiano iti pannakilangenda iti maysa ken maysa. Saanna a kayat a sawen a gapu ta nalaing nga agestoria wenno napuersa nga agsao ti maysa, isun ti kaimportantean wenno kapatgan. Laglagipenyo a “mannakabalin idi [ni Moises] iti sasao,” ngem dina naiturong ti nasion ti Israel malaksid idi nasursurona ti agbalin a naanus, napakumbaba, ken managteppel. (Aramid 7:22) No kasta, dagidiay addaan iti autoridad kadagiti sabsabali ad-adda koma nga ikagumaanda ti agbalin a napakumbaba ken manangpabus-oy.​—Proverbio 11:2.

Nadeskribir kas “matalek ken masirib” dagidiay nangitalkan ni Jesu-Kristo “kadagiti amin a sanikuana.” (Mateo 24:45-47) Dida agdarasudos nga un-unaan ni Jehova; saanda met a nabannayat a mangsurot no adda nalawag nga instruksion ni Jehova kadagiti bambanag. Ammoda no kaano ti panawen ti panagsao ken no kaano ti panawen ti panagulimek bayat nga ur-urayenda ti kanayonan a pannakalawlawag. Saan la koma a tuladen ti amin a Kristiano ti pammatida no di pay ket ipakitada a masiribda met, kas iti klase adipen.​—Hebreo 13:7.