Ti Biblia—Libro a Mangibagnos iti Panagbiag
“TI SAO ti Dios nabiag ken adda bilegna ken natartarumamis ngem iti aniaman a kampilan a dua ti tademna . . . ket kabaelanna a lasinen dagiti panunot ken dagiti panagem ti puso.” (Hebreo 4:12) Daytoy a pannakailadawan ti bileg ti Sao ti Dios patalgedanna a saan a basta maysa laeng a nasayaat a libro ti Biblia.
“Ti mensahena ket kas kapateg ti anges iti biagtayo,” nabagas a kinuna ti maysa a mannurat iti relihion. Sana innayon: “No usigen ti tarigagay ken ti panagkasapulantayo a mapaimbag ita, satay basaen ti Biblia buyogen ti kasta a panangmatmat [a napateg ti mensahe ti Biblia], nakaskasdaaw dagiti resultana.” Kas iti naraniag a pagsilawan, lawlawagan ti Biblia ti adu a narikut nga isyu ken problema iti biag ita.—Salmo 119:105.
Wen, ti linaon ti Biblia a sirib ket nabileg a mangsukog iti pampanunot, tumulong a mangrisut kadagiti parikut, mangpasayaat iti kalidad ti biag, ken mangipaay kadagiti paglaingan tapno madaerantayo dagiti kasasaad a ditay mabaliwan. Kangrunaanna, matulongannatayo ti Biblia a mangammo ken mangipateg iti Dios.
Ti Libro a Mangted iti Panggep
Kas Autor ti Biblia, ‘pagaammona unay [ni Jehova a Dios] dagiti amin a dalantayo.’ Ad-adda nga ammona dagiti pisikal, emosional, ken naespirituan a kasapulantayo ngem kadatayo. (Salmo 139:1-3) Siaannad a nangikabil kadagiti nalawag a limitasion maipapan iti kababalin ti tao. (Mikias 6:8) Nainkalintegan a tarusan ken akseptaren dagita a limitasion ken instruksion. Naragsak ti tao a ti “pakaragsakanna adda iti linteg ni Jehova,” kuna ti salmista. “Isu amin nga aramidna rumang-ayto.” (Salmo 1:1-3) Talaga a nasken nga usigentayo ti kasta a panirigan.
Patien ni Maurice, maysa a retirado a maestro, nga adda pateg ti Biblia iti historia ken iti literatura. Ngem pagduaduaanna no impaltiing ti Dios dayta. Kalpasan a nangngegna a nailawlawag no apay nga inted ti Dios kadagiti tattao ti naisurat a Saona, sinukimat ni Maurice ti nadumaduma a padto ti Biblia. Idi agkabannuag, inadalna ti kadaanan a historia, literatura, siensia, ken geograpia. Inaminna nga impapanna nga isut’ nalaing unay tapno bigbigenna ti nakaad-adu a pammatalged iti kinaumiso ti Biblia. “Naisagmakak iti awan serserbina a pananggun-od iti kinanam-ay, kinabaknang, ken ragragsak ti biag. Nakaladladingit ta nagtalinaedak nga inosente ken ignorante iti pintas ken kinahusto ti kasayaatan a libro a naisurat.”
Ita nga agtawenen iti 70 ni Maurice ken bayat a sipapanunot iti salaysay maipapan iti panagparang ni Jesus iti apostol a ni Tomas, siyayaman a kunana: “Naiturong ti imak iti ‘agdardara a sugat’ a naan-anay ken agnanayon a mangkombinsir kaniak a ti Biblia ket pudno.” (Juan 20:24-29) Kas siuumiso a kinuna ni apostol Pablo, ipalgak ti Biblia dagiti motibo ti puso, ken mangted iti kaipapanan iti biag. Pudno a maysa a libro a mangibagnos iti panagbiag.
Patalgedenna ti Nariribuk a Biag
Mangipaay met ti Biblia iti pammagbaga a tumulong kadagiti tattao a mangikkat kadagiti bisio. Naisardeng ni Daniel ti narugit a bisio a panagsigarilio, agraman ti itatabuno iti naariwawa a party ken nalabes a panaginum. (Roma 13:13; 2 Corinto 7:1; Galacia 5:19-21) Tapno pudno a maisardeng dagiti kasta a bisio ken maikawes “ti baro a personalidad,” masapul ti determinado a panagregget. (Efeso 4:22-24) “Makakarit,” kuna ni Daniel, “agsipud ta imperpektotayo.” Kaskasdi, isut’ nagballigi. Ita, inaldaw a basaen ni Daniel ti Sao ti Dios ket dayta ti namagtalinaed kenkuana a nasinged ken Jehova.
Bayat ti panagbarona, napalalo ti panagraem ni Daniel iti Biblia—uray dina pay pulos nabasa dayta—ken rinabii a nagkararag iti Dios. Ngem adda kurangna. Saan a naragsak ni Daniel. Ngem nagbalbaliw ti amin idi damo a makitana iti Biblia ti nagan ti Dios. (Exodo 6:3; Salmo 83:18) Sipud idin, dakamatenna ti nagan a Jehova no agkararag, ket ad-adda a nagbalin a naimpusuan ti kararagna. “Ni Jehova ti nagbalin a kasingedan a persona kaniak, ket isu pay la ti kasingedan a gayyemko.”
Sakbay a nagadal iti Biblia, nalidem ti masanguanan para ken Daniel. “Makita ti uray siasino a dumakdakes ti lubong,” kunana. “Madanaganak, ket inkagumaak ti nagbalin nga okupado tapno mayaw-awanko dayta.” Kalpasanna, naadalna nga ipaayto ti Dios ti hustisia iti isuamin a tattao iti nadalusan a daga. Tagiragsakento dita dagiti natulnog a tattao ti agnanayon a talna ken kinaragsak. (Salmo 37:10, 11; Daniel 2:44; Apocalipsis 21:3, 4) Ita, addaanen ni Daniel iti sigurado a namnama. Nataginayonna ti positibo a panangmatmat iti biag gapu iti mamatalged nga impluensia ti Biblia.
Tulong Tapno Madaeran Dagiti Emosional a Parikut
Agtawen iti pito ni George idi natay ni nanangna. Mabuteng a maturog iti rabii, di la ket ta saanton a mariing. Kalpasanna, nabasana ti kinuna ni Jesus maipapan iti ipapatay ken iti panagungar: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Jesus] ket rummuardanto.” Natukay met ti riknana kadagiti sasao ni Jesus a: “Siak ti panagungar ken ti biag. Ti mangalagad iti pammati kaniak, uray no matay, agbiagto.” (Juan 5:28, 29; 11:25) Nainkalintegan, lohikal, ken makaliwliwa dagita a sasao. Kuna ni George: “Saan la a makaay-ayo iti panunot daytoy a kinapudno no di pay ket mangtukay iti puso.”
Adda met panagbuteng idi ni Daniel a nadakamat itay. Gapu ta di kabaelan a biagen ni inana, nadumaduma a pamilia ti dimmakkelanna. Kasla naiputputong a kanayon ti panagriknana iti bagina ket kayatna ti agbalin a natalged iti uneg ti maysa a naayat a pamilia. Idi agangay, nasarakanna ti sapsapulenna idi nagadal iti Biblia. Nakitimpuyog ni Daniel iti kongregasion Kristiano dagiti Saksi ni Jehova ket nagbalin a kameng ti naespirituan a pamilia. Dita a nariknana ti panangipateg ken panagayat ti sabsabali. Wen, makagunggona ti Biblia iti praktikal ken makapnek a pamay-an.
Laglagipenyo a mabasa ni Jehova ti linaon ti puso ken ti tarigagaytayo. Ti Dios “gantingenna dagiti puspuso,” ket itedna “iti tunggal tao ti kas mainugot kadagiti dalanna.”—Proverbio 21:2; Jeremias 17:10.
Praktikal a Balakad Para iti Pamilia
Mangted ti Biblia iti praktikal a balakad no maipapan kadagiti relasion ti tattao. Kuna ni George: “Ti panagduduma dagiti ugali wenno di pagkikinnaawatan ket sumagmamano kadagiti karigatan a paset ti biag.” Kasano ti panangtamingna kadagita? “No ammok a madi ti rikna ti maysa a tao kaniak, surotek ti prangka a balakad ti Mateo 5:23, 24: ‘Makikappiaka ken kabsatmo.’ Nasayaat ti resulta ti ar-aramidek a pannakisarita no adda ti di pagkinnaawatan. Mariknak ti talna ti Dios a tuktukoyen ti Biblia. Epektibo. Talaga a praktikal.”—Filipos 4:6, 7.
No adda pagsupiatan ti agassawa, nasken a “nasiglat[da] koma maipapan iti panagdengngeg, nainayad maipapan iti panagsao, nabannayat maipapan iti panagpungtot.” (Santiago 1:19) Ti kasta a balakad pasayaatenna ti komunikasion. Innayon ni George: “Dagus dagiti resultana no surotek ti balakad nga ayatek ken tratuek ni baketko a kas iti bagik. Nalaklakanak a raemen.” (Efeso 5:28-33) Wen, isuronatayo ti Biblia a mangbigbig ken mangdaer iti kinaimperpektotayo ken no kasano a pakibagayan dagiti pagkapuyan ti dadduma.
Manayon a Balakad
Kinuna ni masirib nga Ari Solomon: “Agtalekka ken ni Jehova iti amin a pusom, ket dika agtalged iti pannakaawatmo met laeng: kadagiti amin a dalanmo isu ti bigbigem, ket isu iturongnanto dagiti desdesmo.” (Proverbio 3:5, 6) Anian a nagsimple ngem nabagas dagita a sasao!
Nasayaat nga impluensia ti Biblia. Tulonganna dagiti agayat iti Dios a mangitunos iti biagda iti pagayatanna ken makasarak iti ragsak bayat a “magnada iti linteg ni Jehova.” (Salmo 119:1) Aniaman ti kasasaadtayo, naglaon ti Biblia iti giya ken balakad a kasapulantayo. (Isaias 48:17, 18) Basaenyo nga inaldaw, utobenyo ti nabasayo, sayo iyaplikar dayta. Dayta ti mamagtalinaed iti isipyo a nalawag ken naipamaysa kadagiti nasin-aw ken makagunggona a banag. (Filipos 4:8, 9) Masursuroyo saan la a no kasano ti agbiag ken mangtagiragsak iti biag no di pay ket no kasano nga ayaten ti Namarsua iti biag.
No kasta ti aramidenyo, para kadakayo ti Biblia—kas nagbalinanna para iti minilion a tattao—saan la a basta maysa a nasayaat a libro. Pudno a maysa dayta a libro a mangibagnos iti panagbiag!
[Ladawan iti panid 6]
Papigsaen ti Biblia ti determinasionyo a mangikkat kadagiti bisio
[Ladawan iti panid 7]
Isuro ti Biblia kadakayo no kasano ti umadani iti Dios