Maikaskasaba ti Naimbag a Damag ti Kappia iti Kabambantayan ti Chiapas
“Ti panangpapatay ti maysa a grupo dagiti . . . armado a lallaki kadagiti 45 nga awan gawayda a mannalon, agraman ti 13 a maladaga, ti kakaruan a masaker a malaglagip ti asinoman idiay estado ti Chiapas.” Kasta ti impadamag ti periodiko nga “El Universal” maipapan iti napasamak idiay Acteal, Chiapas State, idi Disiembre 22, 1997.
TI Chiapas ket kaabagatanan nga estado ti Mexico, iti beddeng ti Guatemala. Gapu iti nabayagen a mapaspasaranda a kinapanglaw ken pannakapaidam, maysa a grupo dagiti katutubo a Maya Indian a naawagan iti Ejército Zapatista de Liberación Nacional (EZLN, National Liberation Zapatista Army) ti armado a nangiwayat iti panagrebelde idi Enero 1994. Saan a nagkurri dagiti negosasion agpaay iti natalna a solusion. Adu ti napapatay iti panagrinnupak dagiti rebelde ken soldado ti gobierno. Adu kadagiti mannalon ti napilitan a nagkamang iti natalged a lugar gapu iti riribuk.
Iti kangitingitan ti kasta a kinagulo, maysa a grupo dagiti managayat iti talna ti nagtalinaed a neutral iti dayta napolitikaan a panagbinnusor. Naregtada a mangitantandudo iti Pagarian ti Dios kas ti kakaisuna a namnama a mangrisut kadagiti problema ti tattao, iti pagilian ken sangalubongan. (Daniel 2:44) Siasino dagitoy? Dagiti Saksi ni Jehova. Kas panagtulnog iti bilin ni Jesus, ikarkarigatanda nga idanon ti naimbag a damag ti Pagarian ti Dios kadagiti naiputputong unay a lugar iti kabambantayan ti Chiapas. (Mateo 24:14) Kasano ti mangasaba kadagiti kasta a kasasaad, ken ania dagiti resultana?
“Maysaak Kadagiti Saksi ni Jehova”
Ni Adolfo ket maysa nga agtutubo a lalaki a kabarbaro nga agibumbunannag iti Pagarian. Naminsan bayat nga agtartrabaho iti estasion ti radio idiay Ocosingo, adda bigla a nagtuktok iti napigsa iti ridaw. Maysa a grupo dagiti nakakaputsa a lallaki ti simrek sada impaturong ti paltogda iti ulona. Nagdardarasda iti transmission booth, sinublatda ti aparato, sada inyanunsio iti radio a lumabanda iti gobierno.
Sinango dagiti armado a lallaki ni Adolfo sada minandaran a makikadua iti grupoda. “Maysaak kadagiti Saksi ni Jehova,” kinuna ni Adolfo, nupay saan pay a nabautisaran. Inlawlawagna a ti Pagarian ti Dios ti kakaisuna a namnama agpaay iti talna, ket saanna a pulos nga inawat ti uniporme ken paltog nga intukonda kenkuana. Idi makitada a natibker ti pangngeddengna, pinalubosandan nga agawid. No maipapan iti daydi nga insidente, kastoy ti kuna ni Adolfo: “Pudno a napabileg ti pammatik iti daydi a pasamak.”
Timmalna met la ti kasasaad idi agangay, ngem kontrolado pay laeng dagiti militar ti lugar. Nupay kasta, siraragsak a pinatgan ni Adolfo ti awis dagiti panglakayen ti lokal a kongregasion a makipagtrabaho iti maysa a naiputputong a grupo dagiti Kristiano iti lugarda. Kadagiti checkpoint a masapul a labasanna, rinaem dagiti soldado idi inyam-ammona ti bagina kas maysa kadagiti Saksi ni Jehova. Kamaudiananna, nagpabautisar ken naragsakan ta nakatulong iti panagbalin a kongregasion daydi naiputputong a grupo dagiti Saksi ni Jehova. “Ita ta nabautisaranakon,” kinuna ni Adolfo, “maibagak buyogen ti naan-anay a kompiansa a maysaak kadagiti Saksi ni Jehova!”
“Pinabilegnakami ni Jehova”
Nagbakuit a dagus dagiti umili kalpasan nga inyanunsio ti EZLN iti radio a lumabanda iti gobierno. Insalaysay ni Francisco, maysa nga amin-tiempo a ministro, wenno payunir, no kasano a ni Jehova pinabilegna ida nga agassawa kadagiti napasaranda.
“Nagnakami iti tallo nga oras tapno agkamang iti maysa a lugar. Adda kongregasion sadiay isu a makalangenmi dagiti kakabsat. Di nagbayag ket naangay ti asamblea sirkitomi idiay Palenque. Dimi kayat nga agassawa a malanganan ti espesial a miting dagiti payunir, ngem nadamagmi a binangenan ti EZLN ti dalan nga agturong iti pagasambleaan. Nanglikawkami iti kabakiran iti las-ud ti siam nga oras. Apag-isu ti isasangpetmi tapno tumabuno iti miting dagiti payunir, a tinagiragsakmi unay, agraman ti intero a programa ti asamblea.
“Idi nakaawidkamin, nasangpetanmi a napuoranen ti balaymi ken natakaw dagiti dinguenmi. Maysa la a bassit a bag dagiti lupot ti nabati. Nagladingitkami iti napukawmi, ngem siaayat a pinadagusdakami dagiti kakabsat a taga Ocosingo iti pagtaenganda. Insuroda met kadakami a mannalon dagiti trabaho a dikam pay pulos napadasan. Maysa a kabsat a lalaki ti nangisuro kaniak maipapan iti arte ti panagretrato, adda met nangisuro kaniak nga agtarimaan iti sapatos. Kasta ti pagsapulanmi nga agassawa agingga ita, a dimi kasapulan ti sumardeng kas payunir. No lagipen ti napasamak, maawatanmi a nupay saan a kaskarina kadakami ti agibtur, pinabilegnakami ni Jehova.”
Nagapuanan ti Panangasaba
Dagiti Saksi idiay Chiapas State ti di nangikankano iti rigat ken peggad tapno makipasetda iti naisangsangayan a trabaho a panangidanon iti naimbag a damag kadagiti kalugaranda. Kas pagarigan, idi Abril ken Mayo 1995, nakidanggayda kadagiti padada a Kristiano iti intero a lubong iti kampania a panagiwaras iti Kingdom News No. 34, nga addaan maitutop unay a paulo nga Apay a Napno ti Biag iti Parikut?
Kabayatan ti kampania—iti lugar a naawagan Pueblo Nuevo—nakasarak ni Ciro, maysa a regular pioneer, iti interesado a sangapamiliaan. Nagsubli kalpasan ti tallo nga aldaw ket inrugina ida nga inyadalan iti Biblia. Ngem idi nagsubli ni Ciro ken ti kaduana tapno ituloyda nga iyadalan ti pamilia, saanda a nadanon ti pannakaama ti pagtaengan. Imbes ketdi, agur-uray ti grupo dagiti nakakaputsa a lallaki a mangdangran kenkuana. Pinalutpotda no ania ti birbiroken ni Ciro ken ti kaduana sada impangta a papatayen ida. Kalpasan ti naulimek a panagkararagda ken Jehova, situtured nga inlawlawag ti dua a Kristiano nga immayda tapno isuroda ti pamilia iti Biblia. Gapuna, pinalubosan ida dagiti nakakaputsa a lallaki. Iti di ammo a rason, saan a pulos a nagawid ti pannakaama ti pagtaengan iti daydi nga aldaw.
Iti maysa nga aldaw kalpasan ti agarup tallo a tawen, nasdaaw ni Ciro idi immay iti balayna daydi a lalaki. Kasta la unay ti ragsak ni Ciro idi naammuanna a nabautisaranen ti intero a pamilia ken naikamengda iti maysa a kongregasion idiay Guatemala! Regular pioneer payen ti maysa kadagiti babbalasangna.
Panangapresiar iti Naespirituan a Taraon
Iti laksid ti agtultuloy a rigat idiay Chiapas, impadamag ti manangaywan ti distrito a kasta la unay ti panangapresiar dagiti Saksi sadiay kadagiti gimong. (Hebreo 10:24, 25) Inestoriana ti napasamak iti kalkalpas nga aldaw ti espesial nga asamblea, a nairugi iti bigbigat yantangay nataltalged dagiti timmabuno no nasapada nga agawid. Nupay adu kadakuada ti nagnagna iti nasurok a tallo nga oras iti kabakiran tapno makadanon iti pagasambleaan, nakatugawda aminen idi dimmanon ti alas siete ti bigat. Naitallaong sadiay ti innem a miembro ti grupo nga EZLN, a nagimdeng ken nagpalakpakda kas pammaneknek a nagustuanda ti programa. Nagnada met iti tallo nga oras tapno tumabuno iti asamblea. Duapulo a miembroda ti dimmar-ay met iti Panglaglagip iti ipapatay ni Kristo, a naangay iti lokal a Kingdom Hall.
Sabali pay nga agtutubo a lalaki a miembro dayta a grupo dagiti gerilia ti tinudingan dagiti opisialna nga agpatrolia iti maysa a lugar ti kabakiran. Idi nakagteng iti dayta a purok, natakuatanna a pimmanawen ti amin nga agnanaed, a kaaduanna ket Saksi ni Jehova. Isu a nagyan iti maysa kadagiti napanawan a pagtaengan. Gapu ta awan maaramidna, pinidutna ti sumagmamano a libro a nasarakanna iti uneg ti balay sana binasa dagitoy. Gayam ta publikasion ti Watch Tower dagitoy a nabati dagiti Saksi. Gapu ta agmaymaysa, nawaya ti agtutubo a nangmennamenna iti basbasaenna. Nautobna a masapul nga agbalbaliw ken isukona dagiti armasna. Dagdagus a sinarakna dagiti Saksi ket nakipagadal iti Biblia. Kalpasan ti innem a bulan, ikaskasabanan ti naimbag a damag iti sabsabali. Nabautisaran itan a kas Kristiano agraman ti tallo a miembro ti pamiliana a sigud a mangsupsuporta iti grupo dagiti gerilia.
Ti Makita a Nagsayaatanna
Nupay dakkel a rigat ti inyeg ti panagrurupak, adda met positibo nga epektona no maipapan iti panangmatmat dagiti tattao iti panangasaba. Kastoy ti kuna ti maysa a panglakayen nga agnanaed iti mismo a siudad a nangrugian ti gulo: “Agarup lima nga aldaw kalpasan a nangrugi ti panaglalaban, inyurnosmi ti panangasaba iti uneg ken ruar ti siudad. Magagaran dagiti tattao a dumngeg kadakami. Adu a literatura ti naipaimami ken nakairugikam iti sumagmamano a panagadal iti Biblia. Sigud nga adu ti bumusor iti kinapudno iti maysa a lugar. Ngem gapu iti gulo, dumngegda itan, agad-adaldan iti Biblia, ken tumabtabunodan kadagiti gimong ken asamblea.”
Naragsak dagiti kakabsat ta naitultuloyda ti nateokratikuan nga aktibidadda nupay nakarikrikut ti kasasaad. Uray ammo dagiti soldado ti gobierno ken ti EZLN, itultuloyda latta ti agasamblea isu a mapabpabilegda iti naespirituan. Maparparegtada met nga agtultuloy a mangasaba gapu iti ibibisita dagiti agdaldaliasat a manangaywan. Nakaskasdaaw ta mangparparegta uray dagiti makigubgubat, a masansan a mangidagadag kadagiti Saksi a dida isardeng ti mangasaba.
Saan pay la a nagpatingga nupay medio naksayan ti suot ken rigat a sagsagabaen dagiti taga Chiapas. Kaskasdi, sigurado a determinado dagiti Saksi ni Jehova nga agtultuloy a mangidanon kadagiti tattao iti naimbag a damag ti kappia a nagtaud iti Biblia a Sao ti Dios. (Aramid 10:34-36; Efeso 6:15) Bigbigenda ti kinuna ni propeta Jeremias, a “ti dalan ti tao saan nga agtaud kenkuana met laeng; saan nga agtaud iti tao a magna ti panangiturong kadagiti addangna.” (Jeremias 10:23) Ti laeng Pagarian ti Dios nga iturayan ni Jesu-Kristo nga Anakna ti makarisut iti kinaawan hustisia ken kinapanglaw ditoy lubong.—Mateo 6:10.
[Mapa iti panid 9]
(Para iti aktual a pannakaurnosna, kitaem ti publikasion)
Gulpo ti Mexico
CHIAPAS
GUATEMALA
Taaw Pacifico
[Credit Line]
Mountain High Maps® Copyright © 1997 Digital Wisdom, Inc.
[Ladawan iti panid 9]
Dagiti Saksi a mapan mangasaba iti kabambantayan ti Chiapas