Dagiti Agpaut nga Impresion

TUNGGAL tawen, aguummong dagiti Saksi ni Jehova kadagiti Nakristianuan nga asamblea ken kombension kadagiti pagilian a pagnanaedanda. Aramidenda dayta tapno tagiragsakenda ti makapabileg iti naespirituan nga instruksion ken panaglalangen. Ngem adda dadduma pay a banag maipapan iti panagtitiponda a makaibati iti agpaut nga impresion kadagiti bisita.

Kas pagarigan, idi Hulio 1999, tallo a makapabileg nga aldaw a naguummong dagiti rinibu a Saksi idiay Mozambique iti “Naimpadtuan a Sao ti Dios” a Kombension Distrito. Adu kadagiti dimmar-ay ti damo a tumabuno iti kombension. Nagustuanda saan laeng a dagiti nangngegda iti plataporma no di pay ket ti nakitada iti aglikmut.

Iti Assembly Hall idiay Maputo, adda nagkomento iti kastoy: “Iti intero a panagbiagko, diak pay pulos nakakita iti kastat’ kapintasna a lugar! Adda sabon ken sarming kadagiti pagdigusan, ken nabanglo pay. Natalna ti aglawlaw nga awan ti ariwawa dagiti agririri nga ubbing. Ken awan ti agdidinnuron! Nakitak dagiti naragsak nga agtutubo a makiramraman iti makapabileg a panagtutungtong. Dayawek met ti nanakman a panagkawkawes ti tunggal maysa. Inton maminsan, ikuyogkonto dagiti annakko ken kombinsirekto ti asawak a masapul a tabunuanmi ti kastoy a kombension.”

Wen, adda dagiti makapalpaliiw iti kinamapagpiaran, kinatarnaw, ken pisikal a kinadalus dagiti Saksi ni Jehova. Apay a naiduma dagiti Saksi? Gapu ta talaga nga ikagkagumaanda nga iyaplikar ti maad-adalda iti Biblia. Apay a dikay makitipon kadakuada ita a tawen kadagiti kombensionda iti pagilianyo wenno iti linawas a panaggigimongda iti lokal a Kingdom Hall ket dakayo a mismo ti agpaliiw?

[Ladawan iti panid 32]

ZAMBIA

[Ladawan iti panid 32]

KENYA

[Ladawan iti panid 32]

MOZAMBIQUE