“Nakapagibtur Agingga iti Panungpalan”
ITI maysa a presentasion ti video idi 1993, a naipabuya kadagiti baro a miembro ti staff ti hedkuarter dagiti Saksi ni Jehova, kastoy ti panangyebkas ni Lyman Alexander Swingle iti riknana maipapan iti panagserbi ken Jehova: “Mataykayo koma a nakabotas!”a
Inaramid ti 90 ti tawenna a ni Kabsat Swingle ti mismo nga imparegtana nga aramiden ti sabsabali. Isu ket “nakapagibtur agingga iti panungpalan.” (Mateo 24:13) Idi Mierkoles, Marso 7, nupay agsagsagaba iti pisikal a sakit, tinabunuanna ti taripnong ti Bagi a Manarawidwid dagiti Saksi ni Jehova kas maysa a miembro. Iti simmaganad a Martes, kimmaro ti sasaadenna, ket iti 4:26 ti bigat, Marso 14, impakaammo ti doktorna nga isu ket pimmusayen.
Inrugi ni Lyman Swingle ti serbisiona iti sangalubongan a hedkuarter dagiti Saksi ni Jehova idiay Brooklyn, New York, idi Abril 5, 1930. Nagserbi sadiay iti nganngani 71 a tawen. Immuna a nagtrabaho ni Lyman iti book bindery, sa kalpasanna iti pagimprentaan, ken timmulong met nga agaramid iti tinta para iti panagimprenta. Iti kinapudnona, agarup 25 a tawen ti binusbosna iti departamento a pagaramidan iti tinta. Nagserbi met iti agarup 20 a tawen kas miembro ti grupo dagiti mannurat iti hedkuarter. Iti naudi a 17 a tawen ti panagbiagna, nagtrabaho ni Kabsat Swingle iti Treasurer’s Office.
Natured ni Lyman a nangiwaragawag iti Pagarian ti Dios. Iti immuna a tawtawenna idiay Brooklyn, ugalida iti kakuartona a ni Arthur Worsley nga aglayag idiay Hudson River babaen ti maysa kadagiti barangay a kukua dagiti Saksi. Babaen ti panangusarda iti amplifier, busbosenda idi ti adu a ngudo ti lawas a mangiwarwaragawag iti mensahe ti Pagarian kadagiti komunidad iti igid ti karayan.
Naipasngay ni Kabsat Swingle idi Nobiembre 6, 1910, idiay Lincoln, Nebraska, ngem di nagbayag kalpasanna, immakar ti pamiliana idiay Salt Lake City, Utah. Sadiay, idi 1913, nagbalin dagiti nagannakna nga Estudiante ti Biblia, kas pannakaawag idi kadagiti Saksi ni Jehova. Iti adu a tawen, sinangaili ti sangakabbalayan a Swingle ti adu a bumisbisita nga ispiker manipud hedkuarter dagiti Saksi idiay Brooklyn, ket dagitoy a lallaki naparegtada ni Lyman. Idi 1923, iti edadna a 12, isu ket nabautisaran kas simbolo ti dedikasionna iti Dios.
Kalpasan ti nasurok a 26 a tawen a panagserbina idiay Brooklyn kas maysa a baro, naparaburan unay ni Lyman idi inasawana ni Crystal Zircher idi Hunio 8, 1956. Nadekketda iti maysa ken maysa, a kanayonda nga agkuyog a mangasaba agingga iti ipupusay ni Crystal idi 1998. Agarup tallo a tawen sakbay dayta, nakaro ti pannakabaldado ni Crystal gapu iti pannaka-istrokna. Ti inaldaw a pannakiraman ni Lyman a mangtaripato kenkuana ket maysa nga ulidan ti kinasungdo a makagutugot iti amin a makaam-ammo kadakuada, nangruna kadagidiay makaim-imatang iti naayat a panangidurduron ni Lyman iti wheelchair kadagiti bangketa iti lugarda bayat nga agipaima ni Crystal iti Pagwanawanan ken Agriingkayo! kadagiti lumabas.
Ni Kabsat Swingle ket prangka, mannakipagrikna a lalaki a nasinged kadagidiay nakaam-ammona. Kas kada tatang ken nanangna, isu ket addaan iti naibatay Biblia a namnama nga agbiag a kadua ni Jesu Kristo iti nailangitan a Pagarian, maysa a namnama nga agtalektayo a naragpatnan.—1 Tesalonica 4:15-18; Apocalipsis 14:13.
[Footnote]
a Daytoy ket kaipapananna ti ipapatay bayat nga aktibo ti maysa iti trabahona.
[Ladawan iti panid 31]
Agarup 25 a tawen a nagtrabaho ni Kabsat Swingle iti pagaramidan ti tinta
[Ladawan iti panid 31]
Nadekket da Lyman ken Crystal