Salsaludsod Dagiti Agbasbasa
Kasano kapaut a nagsagaba ni Job?
Pagarupen ti dadduma a tattao a nagpaut iti adu a tawen ti pannakasuot ni Job, ngem saan a dakamaten ti libro ni Job ti kasta a naunday a panagsagaba.
Ti immuna a dupag ti pannakasuot ni Job, ti pannakapukaw dagiti miembro ti pamiliana ken sanikuana ket agparang nga apagbiit laeng. Mabasatayo: “Ita dimteng ti aldaw a ti annakna a lallaki ken ti annakna a babbai mangmangan ken umin-inumda iti arak iti balay ti kabsatda nga inauna.” Immawat ni Job iti nagsasaruno a damag kadagiti pukawna—kadagiti baka, asno, karnero, kameliona, ken kadagiti adipen a mangay-aywan kadagita nga animal. Agparang a kalpasan la unay dayta, naammuan ni Job ti ipapatay ti annakna a lallaki ken babbai, a “mangmanganda idi ken umin-inumda iti arak iti balay ti kabsatda nga inauna.” Agparang a napasamak amin dagitoy iti maysa nga aldaw.—Job 1:13-19.
Ti simmaruno a dupag ti pannakasuot ni Job ti mabalin a naun-unday a napasamak. Immadani ni Satanas ken Jehova ket kinunana a saan a masalimetmetan ni Job ti kinatarnawna no isu ti mismo nga agsagaba—ti bukodna a bagi. Kalpasanna, nakabil ni Job “iti naut-ot a busali manipud iti dapan ti sakana agingga iti kuppokuppona.” Mabalin a nagpaut ti panagsaknap daytoy a sakit iti intero a bagina. Ken mabalin a bimmayag sakbay a ti “isuamin daytoy a didigra” ket naipadamag kadagiti manangliwliwananto, a nagporsegi a mapan kenkuana.—Job 2:3-11.
Ni Elifaz ket naggapu iti Teman iti daga ti Edom, ket ni Zofar naggapu iti maysa a lugar ti makin-amianan a laud ti Arabia, isu a dagiti ili a pagnanaedanda ket saan nga adayo ken Job idiay Uz, a nalabit adda iti makin-amianan nga Arabia. Nupay kasta, ni Bildad ket maysa a Suhita, ket nalawag a dagiti kailianna nagnaedda iti igid ti Eufrates. No adda ni Bildad iti taengna iti daydi a tiempo, nalabit naglabas pay ti lawlawas wenno bulbulan sakbay a madamagna ti kasasaad ni Job ken agdaliasat a mapan idiay Uz. Siempre, posible nga adda dagiti tallo iti kabangibang ni Job idi nangrugi ti panagsagabana. Aniaman ti kasasaad, idi simmangpet dagiti tallo a kadua ni Job, “nakipagtugtugawda kenkuana iti daga iti pito nga aldaw ken pito a rabii” a dida nagsasao.—Job 2:12, 13.
Dimteng itan ti maudi a dupag ti pannakasuot ni Job, a dagiti detalyena ti nangpunno iti adu a kapitulo ti libro. Nagsasaruno ti debate wenno panagbitla dagidiay manangliwliwa koma, ket masansan a simmungbat ni Job. Kalpasan a nagngudo dayta, nangtubngar ni agtutubo nga Eliu, ket ni Jehova kinorehirna ni Job manipud langit.—Job 32:1-6; 38:1; 40:1-6; 42:1.
No kasta, ti panagsagaba ni Job ken ti pannakaileppasna ti mabalin a napasamak iti las-ud ti sumagmamano a bulan, nalabit nakurang a maysa a tawen. Mabalin a pagaammoyo a sigun iti kapadasan, kasla agpaut iti agnanayon dagiti narigat a pakasuotan. Ngem ditay koma liplipatan nga agpatingga dagita, kas iti napasaran ni Job. Uray pay kasano ti kapaut dagiti suot a sarsarangtentayo, laglagipentay koma ti pannaranay ti Dios, kas naibinsabinsa iti naipaltiing a sasao: “Ta nupay ti rigat ket apagkanito ken nalag-an, pataudenna kadakami ti dayag a naringringbaw pay ti dagsenna ken agnanayon.” (2 Corinto 4:17) Insurat ni apostol Pedro: “Kalpasan ti panagsagabayo iti apagbiit, ti Dios ti isuamin a di kaikarian a kinamanangngaasi, a nangayab kadakayo iti agnanayon a kinadayagna a maikaykaysa ken Kristo, turposennanto a mismo ti panagsanayyo, patibkerennakayto, papigsaennakayto.”—1 Pedro 5:10.