Sertipiko ti Kinaekselente

DAYTA ti ipapaay ti Association of Congolese and African Journalists for the Development (AJOCAD) idiay Democratic Republic of Congo kas “panangbigbig kadagiti indibidual wenno organisasion ti kagimongan nga agdindinamag gapu iti maitultulongda iti panagrang-ay idiay [Congo].”

Idi Nobiembre 17, 2000, ti Sertipiko ti Kinaekselente ket naipaay kadagiti Saksi ni Jehova gapu iti “naitulongda iti panagrang-ay dagiti indibidual iti Congo [babaen] ti edukasion ken sursuro a linaon dagiti publikasionda.”

Iti panagkomentona maipapan iti dayta a pammadayaw, kinuna ti pagiwarnak a Le Phare idiay Kinshasa: “Manmano ti taga Congo a saan a nakabasa iti magasin a Pagwanawanan ken Agriingkayo! wenno dadduma a publikasion nga impablaak dagiti Saksi ni Jehova. Saklawen dagitoy a magasin ti amin nga aspeto ti panagbiag.” Dinakamat pay ti pagiwarnak a dagiti publikasion dagiti Saksi ipakitada “no kasano a parmeken dagiti parikut ita” ken ilawlawagda “ti pudno a kaipapanan dagiti agdama a pasamak.” Tunggal ruar ti Agriingkayo! ket “kanayon a neutral iti politika ken saan a mangidumduma iti puli.” Kanayonanna, dagiti publikasion pabilgenda ti “panagtalek iti kari ti Namarsua a natalna ken natalged a baro a lubong a dandanin mangsukat iti agdama a dakes, nakillo a sistema ti bambanag.”

Kas imbaga ti AJOCAD, dagiti publikasion dagiti Saksi ni Jehova ket napaneknekan a makagunggona kadagiti adu nga umili ti Congo. Yantangay naipablaak dagitoy iti ginasut a pagsasao, makagunggona met kadakayo ti mangted-namnama a mensahe a linaon dagitoy.

Pangngaasiyo ta basaenyo ti impormasion iti baba no kasanokayo a magunggonaan kadagita.