Salsaludsod Dagiti Agbasbasa

Aginggat’ sadino nga agaplikar kadagiti Kristiano ita dagiti alagaden iti Linteg Mosaiko a mangiparit iti panagasawa ti agkabagian?

Saan a detalyado a dinakamat ti Linteg nga inted ni Jehova iti nasion ti Israel ti maipapan kadagiti seremonia ken pagannurotan ti kasar. Nupay kasta, adda dagiti nailanad nga alagaden a mangiparit iti dadduma a relasion a mainaig iti panagasawa. Kas pagarigan, iti Levitico 18:6-20, adda masarakantayo a maiparit a relasion mainaig iti ‘nasinged a nainlasagan a kabagian.’ Imbinsabinsa dayta a teksto no siasino kadagiti agkakabagian ti saan a mabalin a maaddaan iti seksual a relasion iti maysa ken maysa. Siempre, awan dagiti Kristiano iti sidong ti Linteg Mosaiko wenno dagiti alagaden daytoy. (Efeso 2:15; Colosas 2:14) Nupay kasta, dina kayat a sawen nga iyaleng-aleng dagiti Kristiano daytoy a banag no siasino ti pakiasawaanda. Adda sumagmamano a rason no apay a kasta.

Umuna, adda dagiti sekular a linteg maipapan iti panagasawa dagiti asideg nga agkabagian, ket obligado dagiti Kristiano nga agtulnog kadagiti linteg ti pagilian a pagnanaedanda. (Mateo 22:21; Roma 13:1) Siempre, nagduduma dagiti kasta a linteg, sigun iti lugar. Kangrunaanna, a naibatay kadagiti pisikal a makagapu ti kaaduan kadagitoy a linteg iti kaaldawantayo. Pagaammo a ti annak dagiti agassawa nga asideg nga agkabagian ket ad-adda a maaddaan kadagiti pisikal a depekto ken sakit. Iti daytoy a rason ken gapu iti ‘panagpaiturayda kadagiti nangatngato nga autoridad,’ dagiti Kristiano a sumrek iti panagasawa agtulnogda kadagiti lokal a linteg iti panagasawa.

Adda met dagiti banag a maakseptar ken di maakseptar iti lugar a pagnanaedantayo. Gistay tunggal kultura ket addaan kadagiti paglintegan ken kostumbre a mangbabalaw iti panagasawa dagiti asideg nga agkabagian, a masansan a mamatmatan dagiti kasta a panagtipon kas insesto ket ngarud, maiparit. Nupay ti maiparit a relasion ket agdepende iti nadumaduma a kultura, kuna ti The Encyclopædia Britannica a “kas sapasap a pagannurotan, no as-asideg ti panagkabagian ti dua a tao, naing-inget ken napaspasnek ti pannakaipatungpal ti lokal a kostumbre a mangiparit wenno manglapped iti seksual a relasion iti nagbaetanda.” Gapuna, uray no awan ti nainaig nga insesto, saan nga agtignay dagiti Kristiano iti wagas a naan-anay a di mangikabilangan kadagiti naipasdek a kostumbre wenno dagiti nainkalintegan a kababalin ti komunidad, tapno saanda a makaipaay iti pakaumsian ti kongregasion Kristiano wenno iti nagan ti Dios.​—2 Corinto 6:3.

Saantay met a liplipatan ti inted-Dios a konsiensia. Nayanak ti amin a tao nga addaan pannakaammo iti umiso ken di umiso, iti naimbag ken dakes. (Roma 2:15) Ti konsiensiada ti mangibaga kadakuada no ania ti normal ken umiso ken no ania ti di nainkasigudan ken makadangran, malaksid no ballikug wenno nabibinegen ti konsiensiada gapu kadagiti rinuker nga aramid. Impasimudaag ni Jehova daytoy idi intedna kadagiti Israelita ti lintegna maibusor iti panagasawa dagiti asideg nga agkabagian. Mabasatayo: “Ti wagas nga aramiden ti daga ti Egipto, a nagnaedanyo, dikay aramiden; ket ti wagas nga aramiden ti daga ti Canaan, a pangipanak kadakayo, dikay aramiden; ket kadagiti paglinteganda dikay magna.” (Levitico 18:3) Ipatpateg dagiti Kristiano ti naibatay-Biblia a konsiensiada ken dida ipalubos a maimpluensiaan dayta iti ballikug a panangmatmat dagiti nasion iti umiso ken di umiso.​—Efeso 4:17-19.

Ania ngarud ti konklusiontayo? Nupay awan dagiti Kristiano iti sidong ti Linteg Mosaiko, silalawag nga ibaga kadakuada ti konsiensiada a ti panagasawa dagiti asideg nga agkabagian​—kas iti agama, agina, ken agkabsat​—ket naan-anay a maiparit kadagiti Kristiano.a Bayat nga umadu dagiti agkakabagian, bigbigen dagiti Kristiano nga adda dagiti linteg ken pagalagadan maipapan iti legal a panagasawa ken adda dagiti pagalagadan nga anamongan ti kagimongan ken kultura. Masapul a maikonsiderar dagitoy tapno matungpaltayo ti bilin ti Kasuratan: “Ti panagasawa nadayaw koma iti tengnga dagiti isuamin.”​—Hebreo 13:4.

[Footnote]