Maysa a Siudad iti Rabaw ti Maysa a Bantay
“ITI nalatak a Sermonna iti Bantay, kinuna ni Jesus kadagiti adalanna: “Dakayo ti silaw ti lubong. Ti maysa a siudad saan a mabalin nga ilemmeng no naisaad iti rabaw ti maysa a bantay.”—Mateo 5:14.
Adu kadagiti ili ti Judea ken Galilea ti masarakan iti bambantay imbes a kadagiti tanap. Ti kangrunaan a rason iti panangpilida iti turod ket gapu iti kinatalged. Malaksid kadagiti rumaut a buyot, adda idi dagiti bunggoy ti tulisan a masansan a mangrebbek kadagiti pagnanaedan dagiti Israelita. (2 Ar-ari 5:2; 24:2) Dagiti maingel nga umili nalaklakada nga idepensa ti agaassideg a balbalay iti rabaw ti bantay ngem iti tanap nga agkasapulan iti daddadakkel a pader nga agpaay a salaknib.
Yantangay kadawyanna a napalitadaan iti apug dagiti pader ti balbalay dagiti Judio, ti agaassideg a puraw a balbalay nga adda iti turod ket nalaka a makita iti sumagmamano a milia iti aglikmut. (Aramid 23:3) Iti naraniag a lawag ti init iti Palestina, dagitoy nga ili iti turod ket agsilnag a kasla parola, kas kadagiti ili ti Mediteraneo iti kaaldawantayo.
Inusar ni Jesus daytoy a naidumduma nga aspeto ti away ti Galilea ken Judea tapno isurona kadagiti pasurotna ti akem ti pudno a Kristiano. Kinunana kadakuada: “Kasta met agsilnag koma ti silawyo iti sanguanan ti tattao, tapno makitada dagiti nasayaat nga aramidyo ket idayawda ti Amayo nga adda iti langlangit.” (Mateo 5:16) Nupay saan nga agaramid iti naimbag dagiti Kristiano tapno dayawen ida dagiti tattao, saan a mailemmeng ti naimbag a kababalinda.—Mateo 6:1.
Nabatad a mapaliiw ti kasta a naimbag a kababalin kabayatan dagiti kombension distrito dagiti Saksi ni Jehova. Maipapan iti napalabas a kombension, kuna ti maysa a periodiko idiay España: “Nupay mapukpukawen ti interes iti relihion iti nadumaduma a denominasion, saan a kasta kadagiti Saksi ni Jehova. Gapu ta dida kayat a mapukaw ti pateg ti Biblia, agbibiagda a mayannurot iti ibagbaga ti Sao ti Dios.”
Ni Thomas, nga agay-aywan iti istadium idiay amianan a laud ti España nga us-usaren a kanayon dagiti Saksi, ket maragsakan a makipulapol kadagiti tattao a mangyap-aplikar iti Sao ti Dios. Intantanna ti panagretirona iti sumagmamano a lawas tapno makatabuno iti kombension distrito dagiti Saksi ni Jehova. Nakalua ni Thomas idi a kalpasan ti kombension, immasideg kenkuana ti adu kadagiti delegado, a pakairamanan dagiti ubbing, tapno agyamanda gapu iti pannakitinnulongna iti napalabas a tawtawen ken kablaawanda iti panagretirona. Kinunana: “Ti pannakaam-ammok kadakayo ti maysa kadagiti kasayaatan a pagteng iti biagko.”
Ti maysa a siudad iti bantay ket makaawis iti maysa a managpaliiw gapu ta nakakadkadlaw dayta ken gapu ta ti aniaman a puraw a balay nga adda iti dayta isilnagna ti raniag ti init. Kasta met, naiduma dagiti pudno a Kristiano agsipud ta ikagkagumaanda a suroten dagiti nangato a Nainkasuratan a pagalagadan iti kinamapagtalkan, moralidad, ken pannakipagrikna.
Mainayon pay, iyan-anninaw dagiti Kristiano ti lawag ti kinapudno babaen ti trabahoda a panangasaba. Kinuna ni apostol Pablo maipapan kadagiti Kristiano idi umuna a siglo: “Yantangay adda kadakami daytoy a ministerio sigun iti asi a naipakita kadakami, saankami a sumuko . . . no di ket babaen ti panangiparangarang iti kinapudno nga irekrekomendami ti bagbagimi iti tunggal natauan a konsiensia iti imatang ti Dios.” (2 Corinto 4:1, 2) Nupay adda dagiti bimmusor kadakuada iti sadinoman a pangasabaanda, binendisionan ni Jehova ti ministerioda, isut’ gapuna nga idi tawen 60 K.P., naikuna ni Pablo a naikasaban ti naimbag a damag “iti isuamin a parsua nga adda iti baba ti langit.”—Colosas 1:23.
Dagiti Saksi ni Jehova kadagitoy a tiempo, sipapasnek a tungtungpalenda ti annongenda a ‘mangisilnag iti silawda iti sanguanan ti tattao,’ kas imbilin ni Jesus. Babaen ti pannakisaritada a mismo ken dagiti publikasion, iranranud dagiti Saksi ni Jehova ti naimbag a damag ti Pagarian iti 235 a pagilian iti intero a lubong. Tapno dumanon ti lawag ti kinapudno iti ad-adu a tattao, maipabpablaak ita dagiti naibatay iti Biblia a publikasionda iti agarup 370 a pagsasao.—Mateo 24:14; Apocalipsis 14:6, 7.
Iti adu a lugar, inkarigatan dagiti Saksi ti agadal kadagiti pagsasao dagiti tattao nga immakar kadagiti pagilian a maiparit ti mangasaba. Kas pagarigan, iti sumagmamano a dadakkel a siudad idiay North America, nagsangpet dagiti tattao a naggapu idiay China ken Russia. Dagiti Saksi kadagita a lugar inkagumaanda ti nagadal iti Tsino, Ruso, ken dadduma pay a pagsasao tapno maikasabada ti naimbag a damag kadagiti agsangpet. Kinapudnona, dagiti kurso a nadisenio a mangpapartak iti panagadal kadagitoy a pagsasao ket maikonkondukta tapno maikasaba ti naimbag a damag kadagiti sabsabali pay bayat a ti talon ket “purawdan a maipaay iti pannakaani.”—Juan 4:35.
Impadto ni propeta Isaias: “Mapasamakto iti kamaudianan a paset dagiti aldaw a ti bantay ti balay ni Jehova sititibkerto ti pannakaipasdekna a nangatngato ngem iti tapaw ti bambantay, ket sigurado a maipangatonto iti ngatuen dagiti turod; ket amin dagiti nasion agayusdanto nga agturong iti dayta.” Babaen ti kondukta ken ministerioda, tultulongan dagiti Saksi ni Jehova dagiti tattao iti sadinoman a sumang-at iti “bantay ti balay ni Jehova” tapno masursuruanda maipapan iti daldalan ti Dios ken magnada iti danana. (Isaias 2:2, 3) Kas kinuna ni Jesus, ti naragsak a pagbanaganna isu ti sangsangkamaysa a ‘panangidayawda iti Ama nga adda iti langlangit,’ ni Jehova a Dios.—Mateo 5:16; 1 Pedro 2:12.