Adda Bukodda a Sirib

“ADDA sirib dagiti nataengan, ngem adda bukodda a sirib dagiti ubbing,” kuna ti maysa a pagsasao idiay Nigeria. Dayta ti napaneknekan ni Edwin, maysa a Kristiano a panglakayen idiay Nigeria.

Maysa nga aldaw iti pagtaenganda, nakasarak ni Edwin iti metal a kahon iti sirok ti lamisaanna.

“Makinkukua iti daytoy?” insaludsod ni Edwin kadagiti tallo nga annakna.

“Kukuak dayta,” insungbat ti agtawen iti walo a ni Emmanuel. Pinasarunuanna a dagus ti nangikuna a dayta nga aglatlati, lima pulgada a kuadrado a metal a kahon nga adda giwang iti rabawna ket para iti kontribusion iti sangalubongan a trabaho dagiti Saksi ni Jehova. “Gapu ta saan nga inaldaw ti ipapanko iti Kingdom Hall,” inlawlawagna, “inkeddengko ti agaramid iti kahon a pagitinnagak iti diak magasto a balonko.”

Iti pagtaenganda, adda kahon ti ama ni Emmanuel a pagurnonganda iti kuarta nga aramatenda iti itatabuno iti kombension distrito. Ngem gapu iti dakkel a pakasapulan, nausarda ti kuarta. Tapno masigurado a saan a mausar iti sabali a panggep ti kontribusionna a kuarta, pinaselioan ni Emmanuel ti lata a kahon iti maysa a welder. Idi naammuan ti welder no ania ti pakausaran ti lata, inyaramidanna ni Emmanuel iti kahon a naaramid iti pirgis ti metal. Uray ni Michael, ti agtawen iti lima a kabsat ni Emmanuel, ket nagkiddaw met iti kahon.

Gapu ta masdaaw iti inaramid dagiti ubbing, dinamag ni Edwin no apay a nagpaaramidda iti kahon. Insungbat ni Michael: “Kayatko ti agidonar!”

Di ammo dagiti dadakkel da Emmanuel, Michael, ken ti siam ti tawenna a kabsatda a babai a ni Uchei, nga ur-urnongenda kadagiti kahon ti dadduma a pangmerienda a kuartada. Apay a napanunotda dayta? Apaman a mabalindan ti agiggem iti kuarta, insuro ida dagiti dadakkelda nga agitinnag iti kuarta iti kahon ti kontribusion iti Kingdom Hall. Nabatad nga inyaplikar dagiti ubbing ti naisuro kadakuada.

Idi napnon dagiti kahon, linuktanda dagitoy. Agdagup ti naurnongda iti $3.13 (U.S.)​—saan a bassit a kantidad dayta no iti pagilian a ti promedio a tinawen a sapul ket sumagmamano laeng a gasut a doliar. Ti kasta a boluntario a donasion suportaranna ti trabaho a panangasaba dagiti Saksi ni Jehova a maar-aramid ita iti 235 a pagilian iti sangalubongan.