Pagpannurayan ti Kinatalgedmo?

Iti maysa a bassit a purok idiay Makinlaud nga Africa, nagpayapay ti agtutubo a ni Josué idi agpakada iti pamilia ken gagayyemna.a Napan iti dakkel a siudad tapno agsapul iti pinansial a kinatalged. Ngem di nagbayag kalpasan ti isasangbayna, limmidem ti namnamana idi maamirisna a saan a kaskarina ti bumaknang iti siudad.

GAPU iti rigat ti panagbiag iti siudad, napalalo ti pannakaupay ni Josué. Ti kasasaad iti dakkel a siudad ket saan a kas iti inar-arapaapna. Kabayatanna, mailiw idi ni Josué nga agsubli iti pamilia ken gagayyemna iti dayta nanumo a purok a pinanawanna. Ngem maamak ta uyawen ti dadduma a pumurok. ‘Tagibassitendakto,’ kunana, ‘agsipud ta saanak a nagballigi iti siudad.’

Ad-adda pay a pakaburiboranna ti pannakapaay dagiti dadakkelna. Mangnamnamada iti pinansial a tulongna. Bayat nga ikagkagumaanna nga iliwliwag ti pakariribukanna, nagtrabaho ni Josué iti adu nga oras iti nanumo a panggedan ken nagsueldo iti sangkapaset laeng ti inarapaapna. Napaksuyan iti nalabes a panagtrabahona. Iti panaglabas ti tunggal lawas, bumasbassit ti tiempo a mabati para kadagiti Nakristianuan nga aktibidad nga ipatpategna unay. Mariknana ti ladingit ken panagmaymaysa gapu iti kinaadayona manipud iti nasinged a pamilia ken gagayyemna. Nabigbigna a saan a naipaay ti siudad ti kinatalged a tinartarigagayanna.

Nupay nagduduma dagiti nagan ken lugar, gagangay ti naladingit a kapadasan ni Josué. Saan a gapu iti kinaagum a tinarigagayan ni Josué ti umakar​—kayatna laeng ti agsapul iti kinatalged. Nariknana a dakdakkel ti gundawayna a rumang-ay iti siudad ngem iti nanumo a purokna. Siempre, mabalin nga umasenso iti pinansial ti maysa a tao, ngem dina kaipapanan dayta ti pudno a kinatalged. Talaga a saan a naaddaan ni Josué iti kinatalged, ket uray ti kaaduan a nangsapul iti kinatalged iti kasta a pamay-an. Gapuna, maisaludsodtayo, ‘Ania ti kinatalged?’

Nagduduma ti panangmatmat dagiti tattao iti kinatalged. Ti kinatalged ket depinaren ti maysa a diksionario kas “pannakawayawaya iti peggad” wenno “pannakawayawaya iti pakadanagan wenno pakaringgoran.” Mabigbig ti kaaduan a tattao nga awan ita ti makuna a naan-anay a “pannakawayawaya iti peggad.” Mapnekdan basta mariknada a natalgedda, iti laksid dagiti mangipangpangta a kasasaad a mabalin a mamagpeggad kadakuada.

Sika ngay? Pangsapsapulam iti kinatalged? Masarakan kadi dayta iti siudad, saan nga iti purok, kas impagarup ni Josué? Wenno maipaay kadi dayta ti kuarta, sadinoman wenno kasanoman ti pananggun-odmo iti dayta? Babaen kadi ti panangragpat iti nangato a saad iti kagimongan? Aniaman ti patiem a pagpannurayan ti kinatalgedmo, kasano kapaut dayta a kinatalged, para kenka ken iti pamiliam?

Usigentayo ti tallo a pamay-an no kasano a ti adu a tattao sapsapulenda ti kinatalged​—lugar; kuarta; saad. Kalpasanna, usigentayo no ania ti pagpannurayan ti pudno, permanente a kinatalged.

[Footnote]