Salsaludsod Dagiti Agbasbasa

Adda kadi ti mabalin nga aramiden no ti maysa a nakapuyen a napulotan a Kristiano ket imposible a makatabuno iti pananglaglagip ti kongregasion iti Pangrabii ti Apo?

Wen, adda ti mabalin ken nasken nga aramiden kas konsiderasion iti maysa a napulotan a Kristiano a nakapuyen ken nalabit naidasay iti iddana ken dinan kabaelan ti tumabuno iti kongregasion tapno rambakan ti Pananglaglagip iti ipapatay ni Kristo. Iti kasta a kasasaad, ti bagi dagiti panglakayen ti mangdutok iti maysa a panglakayen wenno nataengan a Kristiano a lalaki a mangala iti paset dagiti emblema a tinapay ken arak ket ipanna iti dayta a kapammatian iti dayta met laeng a rabii sakbay a lumgak ti init.

Depende iti kasasaad, ti nadutokan a panglakayen wenno sabali a kabsat a lalaki mabalinna ti mangipaay iti ababa a komento ken mangibasa kadagiti maitutop a kasuratan. Mabalinna a suroten ti inaramid ni Jesus idi inyussuatna ti Pangrabii ti Apo. Kas pagarigan, mabalinna a basaen ti Mateo 26:26, sana iyawat ti awan lebadurana a tinapay kalpasan ti maysa a kararag. Kalpasanna, mabalinna nga ibasa ti Mateo kapitulo 26, bersikulo 27 ken 28, sana iyawat ti arak kalpasan ti maysa manen a kararag. Mabalin a mangted iti ababa a komento maipapan iti kaipapanan ti tunggal emblema, ken maitutop nga adda pangserra a kararag.

Siempre, masapul latta nga ikagumaan ti tumabuno iti panangrambak ti kongregasion iti Pangrabii ti Apo. Ngem kasanon no adda iti naisangsangayan a kasasaad ti maysa a napulotan a Kristiano a grabe ti sakitna, naospital, wenno imposible a mangrambak iti Memorial kalpasan ti ilelennek ti init iti Nisan 14? Mabalin nga aprobetsarenna ti pagtuladan a sagudayen ti Mosaiko a Linteg ket pribado a rambakanna dayta kalpasan ti 30 nga aldaw.​—Numeros 9:9-14.