Dagiti Saludsod Manipud Kadagiti Managbasa
◼ No ti maysa a Kristiano saan a makaatender iti selebrasion iti Pangrabii ti Apo, ania koma ti aramidenna?
Napateg a dagiti Kristiano agatenderda iti tinawen a selebrasion iti tinawen a Pangrabii iti Apo, ta kinuna ni Jesus idi inrugina dayta: “Aramidenyo daytoy a panglaglagip kaniak.” (Lucas 22:19) Dagiti immuna a Kristiano inaramidda ti kasta. Ni apostol Pablo ngarud nagsurat maipapan kadagiti kakabsat idiay Corinto a tunggal tawen ‘nagtitiponda kas maysa a kongregasion,’ wenno ‘nagtitiponda,’ a maipaay iti Memorial iti sakripisial nga ipapatay ni Jesus. (1 Corinto 11:20, The New English Bible; NW) Ngem ania koma ti maaramidanda maipapan iti Memorial kadagiti naririkut a kasasaad? Kas pangarigan, ania ti inaramid ni Pablo a mismo bayat dagiti tawtawen nga isut’ naibalud (a naguardiaan ken nalabit naposasan idiay Ceasarea?—Aramid 23:35; 24:26, 27.
Gapu iti nalawag a bilin ni Jesus, uray pay no ni Pablo ti naiputputong iti dayta nga okasion iti Pangrabii ti Apo, pudno a mabalin a renepasona dagiti Nainkasuratan a paspaset iti pasamak. Kas maysa a napulotan a Kristiano, mabalin nga isut’ nangaramid iti amin a panangikagumaan a mangan ken uminum iti mainugot unay a bambanag a mabalinna nga usaren a maipaay nga emblema. Ti arak idi ti maysa a gagangay nga inumen, gapuna nupay isut’ maysa a balud mabalin a ni Pablo ti addaan iti arak ken tinapay nga usaren. Mabalin nga ad-adda pay a mapasamak dayta idi nga isut’ naibalud idiay Roma, a sadiay isut’ mapalubosan a maaddaan kadagiti bisita. Nalabit dadduma a kakabsat idiay Roma ti nangpadas a “nagtitipon” a kaduana iti maysa a bassit a grupo tapno selebraranda ti Pangrabii ti Apo.—Aramid 28:30.
Iti agliklikmut ti lubong ita, dagiti kongregasion dagiti Saksi ni Jehova agtitiponda iti petsa a katupag iti Nisan 14 a maipaay iti Memorial ti ipapatay ni Kristo. Ngem no dadduma dagiti saan a gagangay a lapped ti tumaud. No dadduma, dagiti nakaro a bagyo wenno laylayus ti manglapped iti maysa a kongregasion, wenno dadduma kadagiti miembrona, nga agtitipon kas naiplano. Kadagiti mammano a kaso, ti martial law ti agan-andar a dagiti armado a soldado ti manglapped kadagiti umili manipud iti kaaddada iti ruar kalpasan ti ilelennek ti init. Dadduma a Kristiano ti mabalin a saanda a makapan iti selebrasion iti kongregasion agsipud ta naospitalda wenno nakaro ti sakitda. Ania ti mabalin nga aramiden kadagiti kakasta a paspasamak?
Nupay mainugot ti panagtitipon ti intero a kongregasion a maipaay iti daytoy napateg a pasamak, dagiti kasasaad kas iti naibaga iti ngato ti mabalin a mamagbalin iti dayta nga imposible. No ti nakaro a kasasaad ti panniempo, ti gagangay a didigra, wenno ti kapada daytoy, ti naan-anay a manglapped ti maysa a pamilia wenno ti paset iti kongregasion a makipagtipon iti kongregasion, dagiti naiputputong ti mabalin nga agtitipon ket salaysayenda dagiti Nainkasuratan a salaysay kas masarakan iti Lucas 22:7-23, 28-30 ken 1 Corinto 11:20-31, agraman ti panangsalaysayda ti kaipapanan iti okasion. Umasping iti dayta, no ti maysa a naipaulog a curfew ti mamagbalin nga imposible para iti maysa a kongregasion nga agtitipon iti mainugot a rabii, ti panagtitipon kadagiti grupo iti Panagadal iti Libro iti Kongregasion wenno grupo iti sangakaarrubaan ti mabalin a kasayaatan a pamusposan, ti nakagupgopan dagidiay a nagatender ti agserbi a bilang dagiti nagatender iti report ti kongregasion. Maysa nga ababa a palawag ti mabalin nga ipaay ti maysa a makabael, dedikado a kabsat iti grupo. Awan koma ti pakaseknan nga awan dagiti mainugot nga emblema a magun-odan no la ket no awan ti maysa iti daytoy nga emerhensia a kasasaad a nakipaset ti tinapay ken arak idi napalabas kas maysa a napulotan a Kristiano.
Ti Linteg ti Dios iti Israel addaan iti naisangsangayan nga urnos a maipaay iti maysa nga awan iti kasasaad a makipaset iti regular a paskua; ti indibidual mabalin nga aramidenna dayta maysa a bulan (30 nga al-aldaw) kalpasanna. (Numeros 9:10, 11; 2 Cronicas 30:1-3, 15) Maidilig iti dayta, iti sidong ti maysa a kasasaad a ti maysa a naespirituan nga Israel naan-anay a saanna a mabalin ti agatender wenno maidiayaan kadagiti emblema iti Nisan 14, isu ti mabalin a makipaset 30 nga al-aldaw kalpasanna. Daytoy ti agaplikar laeng iti kaso ti maysa a napulotan a Kristiano a naikkan iti bilin a makipaset iti tinapay ken arak.—Galacia 6:16.
Inton sumaganad a memorial, kalpasan ti ilelennek ti init, dagiti kongregasion dagiti pudno a Kristiano iti agliklikmut ti daga agtitipondanto kas panagtulnog iti bilin ni Jesus: “Aramidenyo daytoy a panglaglagip kaniak.” Awisendakayo a makipagtipon kadakuada.—1 Corinto 11:25, NE.