Dagiti Saludsod Manipud Kadagiti Managbasa

No saan a makatabuno ti maysa a Kristiano iti panangrambak iti Memorial gapu ta masakit wenno agbibiahe, rumbeng kadi a rambakanna dayta kalpasan ti makabulan?

Iti nagkauna nga Israel tinawen a maangay ti Paskua iti maika-14 nga aldaw ti umuna a bulan, a napanaganan iti Nisan (wenno, Abib). Ngem adda naisangsangayan nga urnos a nailanad idiay Numeros 9:10, 11: “Ibagam kadagiti annak ti Israel, a kunam, ‘No siasinoman a tao kadakayo wenno kadagiti kaputotanyo saanto a nadalus gapu iti bangkay ti tao a natay wenno adda iti dalan nga adayo, nupay kasta ngilinennanto ti paskua ken Jehova. Iti maikadua a bulan [a napanaganan iti Iyyar, wenno Ziv], iti maikasangapulo ket uppat nga aldaw iti sumipnget, isu ti ngilinendanto. Kanendanto agraman ti di nalebaduraan a tinapay ken napait a natnateng.’”

Paliiwenyo a di nangipasdek daytoy iti dua a petsa a pagpilian para iti Paskua (Nisan 14 wenno Ziv 14), a mapalubosan ti asinoman nga Israelita wenno sangakabbalayan nga agpili, depende no aniat’ kumbeniente kadakuada. Kadagiti laeng naisangsangayan a kasasaad a marambakan ti Paskua iti maikadua a bulan, kas koma no narugit ti maysa nga Israelita iti imatang ti linteg iti Nisan 14 wenno adda iti lugar nga adayo iti pakaangayan ti regular a selebrasion.

Ti laeng nairekord a pasamak a naipakat daytoy nga urnos ket idi tiempo nga insubli ni matalek nga Ari Ezekias ti panangngilin iti Piesta ti Di Nalebaduraan a Tinapay. Awan gundawayda idi nga agsagana para iti umuna a bulan (saan ngamin a nakasagana dagiti papadi ken dagiti tattao a naummong), isu a naangay dayta iti maika-14 nga aldaw ti maikadua a bulan.​—2 Cronicas 29:17; 30:1-5.

Malaksid kadagita a naisangsangayan a kasasaad, nginilin dagiti Judio ti Paskua iti petsa nga intuding ti Dios. (Exodo 12:17-20, 41, 42; Levitico 23:5) Nagrambak ni Jesus ken dagiti adalanna kas impaannurot ti Linteg, a saanda nga imbilang daytoy a petsa a gagangay laeng. Ipadamag ni Lucas: “Dimteng ti aldaw ti awan lebadurana a tinapay, nga isu ti pannakasapul a maparti ti karnero ti paskua; ket imbaon [ni Jesus] da Pedro ken Juan, a kinunana: ‘Inkayo ket agsaganakay iti maipaay kadatayo iti paskua tapno mangantayo.’”​—Lucas 22:7, 8.

Iti dayta nga okasion, inyusuat ni Jesus ti tinawen a selebrasion a pagaammo dagiti Kristiano kas Pangrabii ti Apo. Saan a maipaganetget nga aglablabes ti pateg ti itatabuno dagiti Kristiano. Kadagiti Saksi ni Jehova, daytoy ti kapapatgan a pasken iti tawen. Ipakita dagiti sao ni Jesus no apay; kinunana: “Itultuloyyo nga aramiden daytoy a panglaglagip kaniak.” (Lucas 22:19) No kasta, rumbeng nga agplano ti tunggal Saksi ni Jehova iti sumagmamano a bulan a nasaksakbay tapno awan ti makalapped kenkuana a tumabuno iti naikeddeng a petsa ti selebrasion. Inton Martes, Abril 6, 1993 a marambakan ti Pangrabii ti Apo, kalpasan ti ilelennek ti init.

No dadduma dagiti di mapakpakadaan a pasamak, kas ti sakit wenno parikut iti panagbiahe, mabalin a lapdanda ti maysa a Kristiano a tumabuno uray no implanona. Aniat’ rumbeng nga aramiden iti kasta a kasasaad?

Bayat ti selebrasion, maidiaya ti awan lebadurana a tinapay ken ti nalabaga nga arak, ket makiraman dagidiay pinulotan ti nasantuan nga espiritu ti Dios ken napili a maipaay iti biag idiay langit. (Mateo 26:26-29; Lucas 22:28-30) No naidalit iti balayna wenno naiyospital iti daytoy a tawen ti maysa a tinawen a makipaspaset, mangdutok dagiti panglakayen iti lokal a kongregasion iti maysa kadakuada a mangipan iti tinapay ken arak iti masakit, mangusig kadagiti maitutop a teksto ti Biblia, ken mangidiaya kadagiti emblema. No ti maysa a napulotan a Kristiano ket adda iti lugar nga adayo iti kongregasion a nakaitimpuyoganna, rumbeng nga ipamuspusanna ti mapan iti kongregasion iti lugar a yanna iti dayta a petsa.

Gapuna, kadagiti laeng naisangsangayan unay a kasasaad a rambakan ti maysa a napulotan a Kristiano ti Pangrabii ti Apo kalpasan ti 30 nga aldaw (maysa a lunar a bulan), a kas maitunos iti bilin idiay Numeros 9:10, 11 ken ti pangarigan idiay 2 Cronicas 30:1-3, 15.

Dagidiay kameng ti klase “sabsabali a karnero” ni Jesus, a mangnamnama iti biag nga agnanayon iti paraiso a daga, saanda a nabilin a makiraman iti tinapay ken iti arak. (Juan 10:16) Napateg ti itatabuno iti tinawen a panangrambak, ngem saanda a makipaset kadagiti emblema. Isu a no adda maysa kadakuada a masakit wenno agbibiahe ket ngarud saan a makatabuno iti aniaman a kongregasion iti dayta a rabii, mabalinna a basaen a personal dagiti maitutop a kasuratan (agraman ti salaysay maipapan iti panangiyusuat ni Jesus iti selebrasion) ken ikararagna ti panangbendision ni Jehova iti dayta a pasken iti intero a lubong. Ngem iti daytoy a kasasaad saan a kasapulan ti aniaman a kanayonan nga urnos nga agtitipon wenno naisangsangayan a Biblikal a panangsalaysay kalpasan ti makabulan.