Salsaludsod Dagiti Agbasbasa
Impalubos ni Jehova ti poligamia kadagiti nagkauna nga adipenna, dagiti Israelita, ngem iparitna itan. Agbaliwbaliw kadi ti pagalagadanna?
Saan a nagbalbaliw ti panangmatmat ni Jehova iti poligamia. (Salmo 19:7; Malakias 3:6) Saan a paset dayta ti orihinal nga urnosna para kadagiti tattao, idi ken ita. Idi pinarsuana ni Eva kas asawa ni Adan, kinuna ni Jehova a ti pagalagadanna ket maysa nga asawa a babai para iti maysa nga asawa a lalaki. “Dayta ti makagapu a ti maysa a lalaki panawannanto ti amana ken ti inana ket masapul a makitipon iti asawana ket masapul nga agbalinda a maymaysa a lasag.”—Genesis 2:24.
Idi adda ditoy daga ni Jesu-Kristo, inulitna daytoy a pagalagadan kas sungbat kadagidiay nagimtuod maipapan iti diborsio ken pannakiasawa manen. Kinunana: “Saanyo aya a nabasa a ti nangparsua kadakuada nanipud idi damo inaramidna ida a lalaki ken babai ket kinunana, ‘Iti daytoy a rason, ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag’? Iti kasta saandan a dua, no di ket maymaysadan a lasag.” Innayon ni Jesus: “Siasinoman a mangidiborsio iti asawana a babai, malaksid no maibatay iti pannakiabig, ket mangasawa iti sabali makaaramid iti pannakikamalala.” (Mateo 19:4-6, 9) Ibatad daytoy a ti pannakiasawa iti maysa wenno ad-adu pay a kanayonan a babbai ket maibilang a pannakikamalala.
No kasta, apay a naipalubos ti poligamia idi nagkauna a tiempo? Laglagipenyo a saan a kapanunotan ni Jehova dayta. Ti tao a damo a nadakamat iti Biblia nga addaan iti nasursurok ngem maysa nga asawa isu ni Lamec, maysa a kaputotan ni Cain. (Genesis 4:19-24) Idi inyeg ni Jehova ti Layus idi kaaldawan ni Noe, ni Noe ken dagiti tallo nga annakna addaanda laeng iti maysa nga asawa. Dinadael daydi Layus dagiti amin nga addaan iti nasursurok ngem maysa nga asawa.
Sinigsiglo kalpasanna, idi pinili ni Jehova dagiti Israelita kas ilina, agrarairan kadakuada ti poligamia, nupay adayo a gagangay ti maaddaan iti maysa laeng nga asawa a babai. Saan nga imbilin ti Dios ti pannakawarawara dagiti pamilia nga addaan iti nasursurok ngem maysa nga asawa a babai. Imbes ketdi, siiinget a linimitaranna dayta nga aramid.—Exodo 21:10, 11; Deuteronomio 21:15-17.
Temporario laeng ti pannakaipalubos ti poligamia. Nabatad dayta saan laeng nga iti kinuna ni Jesus maipapan iti damo a pagalagadan ni Jehova para iti panagasawa no di pay ket babaen ti insurat ni apostol Pablo nga impaltiing ti nasantuan nga espiritu ti Dios. Kinunana: “Tunggal lalaki maaddaan koma iti bukodna nga asawa ket tunggal babai maaddaan koma iti bukodna nga asawa.” (1 Corinto 7:2) Napaltiingan met ni Pablo a mangisurat a ti asinoman a lalaki a madutokan a kas manangaywan wenno ministerial nga adipen iti kongregasion Kristiano masapul nga “asawa ti maymaysa a babai.”—1 Timoteo 3:2, 12; Tito 1:6.
Gapuna, nagpatingga ti panangipalubos ni Jehova iti poligamia idi nabuangay ti kongregasion Kristiano agarup 2,000 a tawenen ti napalabas. Iti daydi a tiempo, naisubli ti dati a pagalagadan ti panagasawa a naannurot idi pinarsua ti Dios ti lalaki ken babai: maysa laeng ti asawa. Dayta ti pagalagadan ita ti ili ti Dios iti intero a lubong.—Marcos 10:11, 12; 1 Corinto 6:9, 10.