Malagipyo Pay?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Mano ti kapitulo ti libro a Mikias, kaano a naisurat, ken ania ti kasasaad idi?

Naglaon iti pito a kapitulo ti libro a Mikias. Ti libro ket insurat ni propeta Mikias idi maikawalo a siglo K.K.P., idi a ti naitulag nga ili ti Dios ket nabingay iti dua a nasion​—ti Israel ken Juda.​—8/15, panid 9.

• Sigun iti Mikias 6:8, ania ti kalikaguman kadatayo ti Dios?

Nasken a ‘watwatentayo ti hustisia.’ Ti wagas ti Dios a panagaramid iti bambanag isu ti estandarte ti hustisia, isu a masapul nga itandudotayo dagiti prinsipiona no iti kinamapagpiaran ken kinatarnaw. Ibagana kadatayo nga ‘ayatentayo ti kinamanangngaasi.’ Dagiti Kristiano impakitada ti naayat a kinamanangngaasi babaen ti panangipaayda kadagiti kasapulan dagiti sabsabali, kas no kalpasan dagiti didigra. Tapno ‘agbalin a naemma iti pannakipagnatayo’ ken ni Jehova, masapul a bigbigentayo dagiti limitasiontayo ken agpannuraytayo kenkuana.​—8/15, panid 20-2.

• No maikkat iti panggedan, ania ti mabalin nga aramiden ti maysa a Kristiano?

Nainsiriban nga usigenna ti istilo ti panagbiagna. Mabalin nga aramidenna a simple ti biagna babaen ti panagakar iti nanumnumo a pagnaedan wenno babaen ti panangikkat kadagiti di nasken a material a sanikua. Napateg la ketdi nga isardeng ti pannakaringgor kadagiti inaldaw a kasapulan, nga agtalek a maaramid ti Dios a posible ti maaddaan kadagiti kasapulan. (Mateo 6:33, 34)​—9/1, panid 14-15.

• Iti kasar, ania ti rumbeng a laglagipentayo no mangted wenno umawattayo iti regalo?

Saan a kasapulan a nangina dagiti regalo, saan met a rumbeng a namnamaen dagita. Ti kapatgan isu ti kababalin ti puso ti mangted. (Lucas 21:1-4) Saan a panangipakita iti konsiderasion no iwaragawag ti nagan ti nagregalo. Mabalin a mapabainan ti nangted. (Mateo 6:3)​—9/1, panid 29.

• Apay a nasken nga agkararagtayo a di agressat?

Ti regular a panagkararag matulongannatayo a mangpabileg iti relasiontayo iti Dios ken kabalannatayo a sumango kadagiti nakaro a pakasuotan. Mabalin nga ababa wenno atiddog dagiti kararagtayo, sigun iti pakasapulan ken kasasaad. Ti kararag pabilgenna ti pammati ken tulongannatayo a mangrisut kadagiti problema.​—9/15, panid 15-18.

• Kasanotayo koma a tarusan ti 1 Corinto 15:29, a naipatarus iti dadduma a bersion kas “bautismo maipaay kadagiti natay”?

Kayat a sawen ni apostol Pablo a dagiti napulotan a Kristiano ket mabautisaran, wenno maitaneb, iti wagas ti panagbiag nga agbanag iti ipapatay gapu iti kinatarnaw a kas iti napasamak ken Kristo. Kalpasanna, mapagungarda iti espiritu a biag kas ken Kristo.​—10/1, panid 29.

• Kasanotayo nga ammo a ti panagbalin a Kristiano saanna laeng a ramanen ti panangliklik kadagiti dakes nga aramid a nadakamat iti 1 Corinto 6:9-11?

Saan a dinakamat ni apostol Pablo a dagiti laeng basol a kas iti pannakikamalala, idolatria, ken panagbartek ti liklikan. Iti panangipakitana a mabalin a kasapulan dagiti kanayonan a panagbalbaliw, intuloyna a kinuna iti sumaganad a bersikulo: “Amin a bambanag nainkalinteganda kaniak; ngem saan nga amin a bambanag makapasayaat.”​—10/15, panid 18-19.

• Idi nagkauna a tiempo, siasino dagiti sumagmamano a babbai a nangparagsak iti puso ti Dios?

Pakaibilangan dagiti mammaltot a da Sifra ken Pua, a saan a nagtulnog iti bilin ni Faraon a panangpapatay kadagiti kappasngay a lallaki nga Israelita. (Exodo 1:15-20) Ti Canaanita a balangkantis a ni Rahab sinalaknibanna dagiti dua nga Israelita a nagsimisim. (Josue 2:1-13; 6:22, 23) Gapu iti kinasimbengna, timmulong ni Abigail a nangispal iti biag ken nanglapped ken ni David nga agbasol iti dara. (1 Samuel 25:2-35) Dagitoy ket nasayaat nga ulidan a suroten dagiti babbai ita.​—11/1, panid 8-11.

• Kasano a “manipud langit nakirupak dagiti bituen” maibusor ken Sisera, kas nadakamat iti Uk-ukom 5:20?

Kuna ti dadduma a tumukoy daytoy iti tulong ti Dios. Dagiti dadduma tukoyenda ti tulong dagiti anghel, panagtinnag dagiti layap, wenno ti panagpannuray ni Sisera kadagiti astrolohikal a padto. Yantangay awanantayo kadagiti detalye iti Biblia, mabalintayo a tarusan dagita a sasao a mangipasimudaag iti sumagmamano a kita ti ibaballaet ti Dios tapno matulongan ti buyot ti Israel.​—11/15, panid 30.

• Iti laksid ti panangyaleng-aleng ken panangidumduma iti relihion nga agraraira iti lubong, apay nga adu latta ti mangibaga a mamatida iti Dios?

Adda dagiti makimisa nga agsapsapul iti talna ti panunot. Dadduma ti mangnamnama iti biag nga agnanayon kalpasan ti ipapatay, wenno salun-at, kinabaknang, ken balligi. Iti sabali a bangir, dagiti tattao sapsapulenda ti mangpennek iti naespirituan a pannakawawda a resulta ti madama a panagraira ti ambision dagiti kapitalista kasukat ti ideolohia dagiti Komunista. Matulongan ti maysa a Kristiano a mangirugi iti makagunggona a saritaan no sipapanunot kadagita a rason.​—12/1, panid 3.