Salsaludsod Dagiti Agbasbasa

Yantangay awan ti tawid dagiti Levita iti nagkauna nga Israel, apay a ti Levita a ni Hanamel adda inlakona a talon iti Levita a kasinsinna a ni Jeremias, kas nadakamat iti Jeremias 32:7?

Maipapan kadagiti Levita, kinuna ni Jehova ken ni Aaron: “Saankanto a maaddaan iti tawid, ket awanto ti binglay nga agbalin a kukuam iti tengngada [ti Israel].” (Numeros 18:20) Nupay kasta, naipaayan dagiti Levita iti 48 a siudad agraman dagiti pagpaarabanda iti nagduduma a paset ti Naikari a Daga. Ni Jeremias ket umili iti Anatot, maysa kadagiti siudad a naited kadagiti “annak ni Aaron a padi.”​—Josue 21:13-19; Numeros 35:1-8; 1 Cronicas 6:54, 60.

Iti Levitico 25:32-34, mabasatayo a nangipaay ni Jehova kadagiti espesipiko a bilin mainaig iti “kalintegan a mangsaka” iti sanikua dagiti Levita. Nalawag a tunggal Levita a pamilia nasken nga addaan kadagiti kalintegan kas agtawid mainaig iti panangikut, panangusar, wenno panangilako kadagiti binglay. Siempre, ramanen dayta ti panangilako ken panangsaka iti sanikua.a Iti adu a pagarigan, nangtagikua ken nagusar dagiti Levita iti sanikua iti wagas nga umasping iti ar-aramiden dagiti Israelita iti dadduma a tribu.

Nalabit a natawid dagiti Levita dagiti sanikuada manipud iti kapuonanda. Ngem no maipapan iti “kalintegan a mangsaka,” Levita laeng ti mabalin a mangsaka iti sanikua a kukua ti sabali a Levita. Kasta met, agparang a ti panangilako ken panangsaka iti daga ket agaplikar laeng iti sanikua iti uneg dagiti siudad, gapu ta saan a mabalin a mailako “ti talon ti pagpaaraban dagiti siudadda” yantangay dayta ket “sanikua agingga iti tiempo a di nakedngan maipaay kadakuada.”​—Levitico 25:32, 34.

Gapuna, mabalin a kasta ti kasasaad ti talon a sinaka ni Jeremias manipud ken ni Hanamel, ta mabalin a mayallatiw babaen ti panangsaka. Nalabit a masarakan dayta iti uneg ti siudad. Pinatalgedan a mismo ni Jehova a kukua ni Hanamel ti nadakamat a “talon” ket addaan ni Jeremias iti “kalintegan a mangsaka.” (Jeremias 32:6, 7) Inusar ni Jehova daytoy a negosasion iti simboliko a pamay-an tapno mapatalgedan ti karina a maisubli kadagiti Israelita ti tawidda a daga kalpasan ti tiempo a pannakakautiboda idiay Babilonia.​—Jeremias 32:13-15.

Awan ti mangipakita a biddut ti panangtagikua ni Hanamel iti sanikua idiay Anatot. Awan ti mangipakita a linabsingna ti linteg ni Jehova idi inallukoyna ni Jeremias a manggatang iti talonna idiay Anatot wenno sibibiddut nga inusar ni Jeremias ti kalinteganna a mangsaka iti talon.​—Jeremias 32:8-15.

[Footnote]