SIUDAD DAGITI LEVITA

Saan a naipaayan dagiti Levita iti bingay a teritoria, ta ni Jehova ti tawidda. (Nu 18:20; De 18:1, 2) Ngem imbilin ti Dios a ti dadduma a tribu ti Israel ipaayanda ida iti dagup nga 48 a siudad ken dagiti pagpaaraban nga adda iti aglikmut dagita. (Nu 35:1-8) Dagita a siudad ket naituding kadagiti Levita idi kamaudiananna (Jos 21:1-8), ket 13 kadagita ti nagbalin a siudad ti papadi. (Jos 21:19; kitaenyo ti SIUDAD TI PAPADI.) Kadagiti 48 a siudad, 6 ti naituding kas siudad a pagkamangan maipaay kadagiti di inggagara a nakapapatay.​—Jos 20:7-9; kitaenyo ti SIUDAD A PAGKAMANGAN.

Ti pannakaiwarawara dagiti Levita iti nagtetengngaan ti dadduma a tribu ti Israel ket kaitungpalan ti padto ni Jacob idi matmatayen.​—Ge 49:5-7.

Addaan dagiti Levita iti kalintegan a mangsaka, iti aniaman a tiempo, iti balbalay nga inlakoda iti las-ud dagiti siudadda, wenno dagitoy ket maisubli kadakuada bayat ti tawen a Jubileo. Ngem saan a pulos mabalin nga ilako dagiti daga a pagpaaraban a karaip dagiti siudadda.​—Le 25:32-34; kitaenyo ti LEVITA.