Rumbeng Kadi nga Agkararagtayo Kadagiti Anghel No Kasapulantayo ti Tulong?
MAIPARBENG kadi ti agkararag kadagiti anghel no adda pakarigatan? Kasta ti panangmatmat ti adu a tattao. Kinapudnona, kuna ti New Catholic Encyclopedia: “Adda agkararag . . . kadagiti anghel . . . ngem iti laeng anag nga agserbida a mangibaet kadatayo iti Dios.” Maiparbeng kadi nga ikararagtayo kadagiti anghel nga agserbida kas manangibabaettayo?
Dua laeng a matalek nga anghel ti Dios ti nadakamat iti Saona, da Miguel ken Gabriel. (Daniel 8:16; 12:1; Lucas 1:26; Judas 9) Yantangay nadakamat dagitoy a nagan iti Biblia, matarusantayo a ti tunggal anghel ket maysa nga espiritu a persona nga addaan iti nagan, saan laeng a basta enerhia wenno puersa. Kaskasdi, dagiti dadduma nga anghel agkedkedda a mangibaga iti naganda. Kas pagarigan, idi dinamag ni Jacob no ania ti nagan ti anghel a bimmisita kenkuana, nagkedked a mangibaga. (Genesis 32:29; Uk-ukom 13:17, 18) Saan a nailista iti Biblia ti nagnagan dagiti anghel, iti kasta maliklikan dagiti tattao ti mangipaay iti nalabes nga atension kadakuada.
Ti maysa kadagiti annongen dagiti anghel isu ti panangidanon kadagiti mensahe ti Dios kadagiti tattao. Iti kinapudnona, ti orihinal a Hebreo ken Griego a sasao a naipatarus kas “anghel” literal a kaipapananna “mensahero.” Ngem dagiti anghel saanda nga agserbi kas mangibabaet a mangidanon kadagiti kararag dagiti tattao iti trono ti Kangatuan. Inkeddeng ti Dios a dagiti kararag maiturongda kenkuana iti nagan ti Anakna, ni Jesu-Kristo, a nagkuna: “Uray ania ti dawatenyo iti Ama iti naganko itedna koma dayta kadakayo.”—Juan 15:16; 1 Timoteo 2:5.
Sisasagana ni Jehova a Dios nga umimdeng kadatayo no umiso ti wagas ti iyaadanitayo kenkuana. Impatalged ti Biblia: “Ni Jehova asideg kadagidiay amin nga umaw-awag kenkuana, kadagidiay amin nga umawag kenkuana iti kinapudno.”—Salmo 145:18.