Liberia—Panagrang-ay ti Pagarian iti Laksid ti Gubat
NAGTULTULOY ti gerra sibil iti Liberia iti nasurok a maysa a dekada. Idi ngalay ti 2003, sinerrek dagiti rebelde ti kabesera a siudad a Monrovia. Adu a Saksi ni Jehova ti napilitan a mangpanaw kadagiti pagtaenganda, maulit-ulit pay no dadduma. Namin-ano a nasamsam dagiti sanikuada.
Makapaladingit ta kabayatan ti rinnupak iti kabesera, rinibu ti napapatay. Dua kadakuada ti Saksi, maysa a lalaki ken maysa a babai. Kasano a sinango ti dadduma a kakabsat ti pakarigatan, ken kasanoda a natulongan?
Tulong Kadagidiay Agkasapulan
Iti unos ti pakarigatan, ti sanga nga opisina dagiti Saksi ni Jehova idiay Liberia nangyurnosda iti tulong kadagidiay agkasapulan. Naipaay dagiti taraon, kasapulan iti balay, ken medikal a suplay. Kabayatan ti panangsakup dagiti rebelde iti sangladan, nagkurang ti taraon. Ammon ti sanga nga opisina a mapasamak daytoy isu a nasaksakbay a nangipaay iti suplay para iti dua ribu a Saksi a nagkamang kadagiti Kingdom Hall iti intero a siudad. Imbunong dagiti kakabsat ti suplay a taraon agingga a naluktan manen ti sangladan. Ti sanga nga opisina iti Belgium ken Sierra Leone nangipatulodda kadagiti medikal a suplay, ken ti sanga nga opisina iti Britania ken Francia nangipaayda kadagiti kawes.
Iti laksid ti nakaay-ay-ay a kasasaad, nagtalinaed a positibo ken naragsak dagiti kakabsat. Kastoy ti komento ti adu kadakuada kas kinuna ti maysa a namitlo a pimmanaw iti pagtaenganna: “Dagitoy dagiti mismo a kasasaad nga ikaskasabatayo; agbibiagtayo iti maudi nga al-aldaw.”
Panagtignay iti Naimbag a Damag
Iti laksid ti riribuk iti intero a pagilian, nagtultuloy ti nagsayaat a gapuanan dagiti Saksi iti tay-ak. Naragpatda ti kangatuan a bilang a 3,879 nga agibumbunannag iti Pagarian idi Enero 2003, ken nakaikonduktada iti 15,227 a panagadal iti Biblia idi Pebrero.
Dagus nga aginteres dagiti tattao iti naimbag a damag. Adda maysa a pagarigan iti purok iti abagatan a daya ti pagilian. Maysa a kongregasion ti nangiplano a mangrambak iti Pananglaglagip iti ipapatay ni Kristo iti maysa a dakkel a purok ti Bewahn, a pagnaen iti lima nga oras manipud iti kadawyan a paggigimonganda. Sakbay a napan dagiti kakabsat iti purok tapno iyawisda ti Memorial, inikkanda iti imbitasion ti mayor ti Bewahn. Idi naawatna, innala ti mayor ti Bibliana, napan iti purok, ket imbasana ti teksto a nailanad iti imbitasion, a parparegtaenna ida a tumabuno iti Memorial. Gapuna, idi dimteng dagiti agibumbunannag, adda nangaramiden iti rantada nga aramiden! Ti mayor, agraman dagiti annak ken dua nga assawana, timmabunoda iti Memorial. Agdagup iti 27 ti timmabuno. Sipud idin, naglusulos ti mayor manipud iti Methodist Church, nakipagadal kadagiti Saksi, ken intukonna ti maysa a lote a pagibangonan iti Kingdom Hall.
Panagbalbaliw ti Puso
Ti kondukta dagiti kakabsat binalbaliwanna met ti panangmatmat ti dadduma a bumusbusor iti kinapudno. Usigenyo ti napasamak ken ni Opoku. Maysa nga special pioneer ti nangasaba kenkuana a nangitukon iti magasin a Pagwanawanan. Interesado ni Opoku iti maysa nga artikulo iti dayta a magasin ngem awan ti kuartana. Idi inlawlawag ti payunir nga awan bayadna dayta, inted ti payunir ti magasin ken nakitulag nga agsubli. Iti panagsublina, inyimtuod ni Opoku iti payunir: “Am-ammonak kadi? Ammodak ti kaaduan kadagiti kakaduayo iti ili ti Harper. Dati a paik-ikkatek dagiti annakyo idiay eskuelaan!” Kalpasanna, inlawlawagna nga isu ti prinsipal iti haiskul iti ili ken indadanesna dagiti annak dagiti Saksi ni Jehova gapu iti dida panagsaludo iti bandera.
Ngem natignay ni Opoku a mangbalbaliw iti kababalinna gapu iti tallo nga ulidan ti Nakristianuan nga ayat nga imparangarang dagiti Saksi ni Jehova. Umuna, nakitana nga inaywanan dagiti Saksi ti maysa a kapammatianda nga addaan iti nakaro a sakit. Inyurnosda pay ketdi ti panagpaagasna iti kabangibang a pagilian. Impagarup ni Opoku a “nangato a tao” iti relihionda daytoy a masakit ngem naammuanna a maysa laeng daytoy nga ordinario a Saksi. Maikadua, idi dekada 1990, nagkamang ni Opoku idiay Côte d’Ivoire. Naminsan idi mawaw, napan gimmatang iti danum iti maysa nga agkabannuag a lalaki. Awan ti pangsupli ti baro iti kuartana isu nga intedna laengen a libre ti danum ken ni Opoku. Idi inyawatna ti danum ken ni Opoku, inyimtuod ti baro: “Panagkunayo dumtengto ngata ti tiempo inton dagiti tattao mangtedda kadagiti bambanag a dida agpabayad?” Nagsuspetsa ni Opoku a Saksi ni Jehova daytoy a lalaki, ket kinompirma dayta ti lalaki. Natukay ti riknana iti kinaparabur ken kinaimbag daytoy a kabsat. Maikatlo, idi sidadaan nga inted kenkuana ti special pioneer ti magasin uray awan bayadna pinagpanunotna ni Opoku a di umiso ti panangmatmatna kadagiti Saksi ket masapul a balbaliwanna dayta. Rimmang-ay iti naespirituan ket maysa itan a di bautisado nga agibumbunannag.
Nupay agtultuloy ti nakarigrigat a kasasaad dagiti kakabsat idiay Liberia, agtalekda iti Dios ken simamatalek nga ikasabada ti naimbag a damag nga addanto nasaysayaat a kasasaad iti sidong ti nalinteg a panangituray ti Pagarian ti Dios. Pulos a dinto lipaten ni Jehova ti panagsakripisioda ken ti ayat nga impakitada agpaay iti naganna.—Hebreo 6:10.
[Dagiti Mapa iti panid 30]
(Para iti aktual a pannakaurnosna, kitaem ti publikasion)
MONROVIA
[Dagiti Ladawan iti panid 31]
Iti panawen ti rigat, dagiti adipen ni Jehova mangipapaayda iti naespirituan ken material a tulong kadagidiay agkasapulan