Ania a Relihion ti Rumbeng a Pakitimpuyogam?

‘DAGITI nagduduma a relihion ket nagduduma laeng a dalan a maymaysa ti turongenda. Iti kinapudnona, maymaysa laeng ti Dios, di ngamin?’ Kasta ti kapanunotan ti adu nga agkuna a nupay napateg ti pannakimiembro iti relihion, saan a nasken no ania a relihion ti pakitimpuyogan.

No di usigen, kasla rasonable dayta nga argumento, yantangay pudno a maymaysa ti Dios, ti Mannakabalin-amin. (Isaias 44:6; Juan 17:3; 1 Corinto 8:5, 6) Ngem ditay mabalin a tagilag-anen ti nabatad a panagduduma​—panagkokontra pay ketdi​—dagiti adu a narelihiosuan a grupo a mangibagbaga nga agserserbida iti pudno a Dios. Agsupadi unay ti ar-aramid, patpatien, sursuro, ken dagiti ipapaannurotda. Gapu iti dakkel a nagdudumaanda, dagiti kameng ti maysa a relihion wenno grupo marigatanda a mangtarus wenno mangawat iti isursuro wenno patpatien dagiti dadduma.

Maisupadi iti dayta, kinuna ni Jesus: “Ti Dios maysa nga Espiritu, ket dagidiay agdaydayaw kenkuana masapul nga agdayawda a buyogen ti espiritu ken kinapudno.” (Juan 4:24) Ti kadi panagdayaw iti Dios buyogen ti kinapudno kaipapananna ti adu nga agkokontra a kapanunotan maipapan iti kinasiasino ti Dios, no ania dagiti panggepna, ken no kasano ti kayatna a panagdayaw kenkuana? Lohikal kadi a patien a saan a napateg iti Mannakabalin-amin a Dios no kasano ti panagdayawtayo kenkuana?

Dagiti Pudno a Kristiano Idi ken Ita

Adda no dadduma ti saan a pagtutunosan dagiti Kristiano idi umuna a siglo. Kas pagarigan, kinuna ni apostol Pablo kadagiti taga Corinto: “Naibutaktak kaniak ti maipapan kadakayo, kakabsatko, babaen kadagiti kameng ti balay ni Cloe, nga adda dagiti di panagtutunos kadakayo. Ti kayatko a sawen isu daytoy, a ti tunggal maysa kadakayo kunana: ‘Kaduanak ni Pablo,’ ‘Ngem siak kaduanak ni Apolos,’ ‘Ngem siak kaduanak ni Cefas,’ ‘Ngem siak kaduanak ni Kristo.’”​—1 Corinto 1:11, 12.

Tinagilag-an kadi ni Pablo daytoy a panagduduma? Ti kadi indibidual ti agpili no ania a dana ti mangispal kenkuana? Adayo a kasta! Imbalakad ni Pablo: “Bagbagaankayo, kakabsat, babaen ti nagan ni Apotayo a Jesu-Kristo a rebbeng nga agsaokayo amin a sangsangkatunos, ket awan koma dagiti panaglalasin kadakayo, no di ket naan-anay nga agkaykaysakayo koma iti isu met laeng a panunot ken iti isu met laeng a wagas ti panagpampanunot.”​—1 Corinto 1:10.

Siempre, saan a magun-odan ti panagkaykaysa babaen ti panangpilit. Maragpat la dayta no dagiti indibidual siaannad nga usigenda dagiti bambanag ket matinong ken awatenda ti maymaysa a kapanunotan. Gapuna, ti personal a panagadal iti Sao ti Dios ken ti napudno a tarigagay a mangyaplikar iti naadal ket napategda nga addang tapno matagiragsak ti kita ti panagkaykaysa a dinakamat ni Pablo. Adda kadi masarakan a kasta a panagkaykaysa? Kas nakitatayon, nabayag a nakilangen ti Dios kadagiti tattaona kas maysa a grupo. Posible kadi a mailasin dayta a grupo ita?

Dagiti Pagimbagan ti Umiso a Timpuyog

Inyimtuod idi ni salmista a David: “O Jehova, siasinonto ti sangaili iti toldam? Siasinonto ti agtaeng iti nasantuan a bantaymo?” Mamagpanunot la ketdi dayta a saludsod. Sinungbatan dayta ni David: “Daydiay magmagna nga awan pagkuranganna ken mangan-annurot iti kinalinteg ken agsasao iti kinapudno iti pusona.” (Salmo 15:1, 2) Babaen ti umiso a pannakaawat iti Biblia, matulongan ti maysa a mangilasin iti relihion a mangar-aramid kadagita a kalikagum ti Dios. Sa babaen ti pannakitimpuyog iti dayta a grupo, matagiragsakna ti makapabileg a pannakikadua kadagiti tattao nga agdaydayaw iti Dios buyogen ti panagkaykaysa ken “buyogen ti espiritu ken kinapudno.”

Dagiti Saksi ni Jehova impakitada a posible a maragpat ti panagkaykaysa iti patpatien ken ar-aramid uray iti nasinasina a lubong ita. Adda kadakuada ti sigud a miembro ti nagadu a nagduduma a relihion ken etniko a grupo. Dati nga agnostiko wenno ateista ti dadduma a nagbalin a Saksi. Adda met dagidiay dida idi pagan-ano ti relihion. Manipud kadagiti nagduduma a relihion, kultura, ken pilosopia, adda dagiti indibidual a mangtagtagiragsak ita iti narelihiosuan a panagkaykaysa iti tengnga ti nasinasina a lubong ita.

Ti nakaibatayan ti kasta a panagkaykaysa isu ti Sao ti Dios, ti Biblia. Siempre, ammo dagiti Saksi ni Jehova a saanda a mabalin nga idiktar kadagiti tattao no ania ti aramidenda. Ngem apresiarenda ti pribilehio a mangparegta kadagiti sabsabali nga agadal iti Biblia tapno ti panagpilida mainaig iti panagdayaw ket naibatay iti dayta a nalagda a pundasion. Iti kasta a pamay-an, adu pay dagiti mabalin a mangtagiragsak iti panagdayaw iti Dios “buyogen ti espiritu ken kinapudno.”

Ita, dakkel ti peggad a matnag kadagiti makadangran nga impluensia ken pannulisog. Napateg ti panangpili iti umiso a kita ti timpuyog. Kuna ti Biblia a “daydiay makipagna kadagiti masirib a tattao agbalinto a masirib” ken “dagiti dakes a pannakitimpuyog dadaelenda dagiti makagunggona nga ugali.” (Proverbio 13:20; 1 Corinto 15:33) Maysa a salaknib ti pannakitimpuyog kadagiti pudno nga agdaydayaw iti Dios. Gapuna, ipalagip kadatayo ti Biblia: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw.” (Hebreo 10:24, 25) Anian a bendision no dagiti pudno a gagayyem, dagiti naespirituan a kakabsat, siaayat nga agtitinnulongda a mangaramid kadagiti pagrebbenganda iti Dios!

Pinatalgedan ni Ottmar daytoy a panangmatmat. Nupay napadakkel iti maysa a Katoliko a pamilia idiay Alemania, insardengna ti makimisa. Inlawlawagna: “Kada makimisaak, rummuarak nga awan ti naadalko a kas idi simrekak.” Kaskasdi, nagtultuloy a mamati iti Dios. Idi agangay, nakatungtongna dagiti Saksi ni Jehova ket nakombinsir nga isuda dagiti pudno nga adipen ti Dios. Nautobna a kasapulanna ti makitimpuyog kadakuada. Kunana ita: “Gapu iti panagbalin nga aktibo iti sangalubongan nga organisasion, tagtagiragsakek ti talna ti panunot ken puso. In-inut a matultulonganak a maaddaan iti umiso a pannakaammo iti Biblia. Tagipatgek unay dayta.”

Maysa nga Awis Kadagidiay Agsapsapul

Dagiti mannakitunos a tattao nga agtartrabaho a sisisinged kas maysa a grupo maitungpalda ti maysa a trabaho iti pamay-an nga adayo a mas epektibo ngem kadagiti indibidual nga agtartrabaho nga independente. Kas pagarigan, kastoy ti pammakada a pammilin ni Jesus kadagiti pasurotna: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Kasano a naan-anay a maitungpal ti kasta a trabaho no awan ti panangiwanwan wenno organisasion? Kasano a ti maysa maibanagna daytoy a Nainkasuratan a bilin no agwaywayas nga agserbi iti Dios?

Bayat ti napalabas a tawen, dagiti Saksi ni Jehova iti sangalubongan nakaiwarasda iti 91,933,280 a naibatay-Biblia a libro, bokleta, ken broshur, agraman 697,603,247 a magasin. Iti kasta, dimmanon ti mensahe ti Sao ti Dios kadagiti ginasgasut a milion a tao iti 235 a daga. Anian a nagsayaat a pammaneknek nga adayo nga ad-adu ti maaramidan ti panagregget ti nagkaykaysa, organisado a grupo ngem iti panagregget ti agbukbukod nga indibidual!

Malaksid iti panangiwaras kadagiti literatura a naibatay iti Biblia, dagiti Saksi ni Jehova nangikonduktada kadagiti libre a panagadal iti Biblia tapno matulongan dagiti tattao a maaddaan iti nauneg a pannakaawat kadagiti kalkalikaguman ti Dios. Idi napalabas a tawen, agpromedio iti 5,726,509 a kasta a panagadal iti Biblia ti linawas a naikondukta kadagiti indibidual wenno grupo. Daytoy a naibatay-Biblia a panangisuro tinulonganna ti minilmilion a tattao a maaddaan iti nalagda a pagibatayan iti panagpilida no maipapan iti panagdayaw. Maawiskayo a mangadal kadagiti kalikaguman ti Dios kas nailanad iti Biblia. Iti kasta, makaaramidkayo iti panagpili.​—Efeso 4:13; Filipos 1:9; 1 Timoteo 6:20; 2 Pedro 3:18.

No kayatyo nga ay-aywen ti Dios, napateg a makitimpuyogkayo​—ngem saan nga iti aniaman a narelihiosuan a grupo wenno denominasion. Ti panagpiliyo iti relihion masapul a maibasar iti umiso a pannakaammo iti Biblia, saan a kadagiti di napatalgedan a doktrina wenno sursuro ti tao. (Proverbio 16:25) Adalenyo dagiti makalikaguman para iti pudno a relihion. Idiligyo ida kadagiti patpatienyo. Sa agpilikayo maitunos iti dayta.​—Deuteronomio 30:19.

[Dagiti Ladawan iti panid 7]

Adda panagkaykaysa dagiti Saksi ni Jehova iti lubong a nasinasina