Salsaludsod Dagiti Agbasbasa

Apay a nagtalinaed a maysa a Nazareo ni Samson idinto ta nasagidna dagiti bangkay ti tattao a pinapatayna?

Iti nagkauna nga Israel, mabalin a boluntario nga agsapata ti maysa a tao ket agbalin a Nazareo iti uneg ti naituding a panawen.a Kastoy ti naipaulog mainaig iti maysa kadagiti maiparit nga aramiden daydiay agsapata: “Iti amin nga aldaw ti panagtalinaedna a naisina maipaay ken Jehova saanna a mabalin ti umasideg iti aniaman a natay a kararua. Saanna a mabalin a tulawan ti bagina uray gapu iti amana wenno inana wenno kabsatna a lalaki wenno kabsatna a babai no matayda.” No ngay ti maysa “pettat a matay iti sibayna”? Matulawan ti takderna kas Nazareo no aksidente a masagidna ti bangkay. Gapuna, naibaga: “Saanto a maibilang ti immun-una nga al-aldaw.” Kasapulan a maipasidong iti seremonia a panangdalus ket mangrugi manen kas Nazareo.​—Numeros 6:6-12.

Ngem naiduma ti kina-Nazareo ni Samson. Sakbay a naipasngay ni Samson, kinuna ti anghel ni Jehova ken ni nanangna: “Adtoy! agsikogkanto, ket sigurado a mangipasngaykanto iti anak a lalaki, ket rebbeng nga awan ti labaha nga umay iti rabaw ti ulona, agsipud ta maysa a Nazareo ti Dios ti pagbalinanto ti ubing iti ipapanawna iti tian; ket isunto ti mangidaulo ti panangisalakan iti Israel manipud ima dagiti Filisteo.” (Uk-ukom 13:5) Saan a nagsapata ni Samson tapno agbalin a Nazareo. Ti Dios a mismo ti nangdutok kenkuana kas Nazareo, ken tungpal biag ti panagbalinna a Nazareo. Saan a maiparit kenkuana ti panangsagid iti bangkay. No maiparit dayta kenkuana ket aksidente a masagidna ti maysa a bangkay, kasano koma nga irugina manen ti tungpal biag nga annongenna kas Nazareo a nangrugi iti pannakaipasngayna? Nalawag ngarud a dagiti makalikaguman kadagidiay tungpal biag a Nazareo ket adda nakaidumaanda kadagiti makalikaguman kadagidiay boluntario a Nazareo.

Usigenyo dagiti bilin ni Jehova kadagiti tallo a tungpal biag a Nazareo​—da Samson, Samuel, ken Juan a Mammautisar​—a nadakamat iti Biblia. Kas nadakamat itay, nabilin ni Samson a saanna a pukisan ti buokna. Mainaig iti mayinaw pay laeng nga anakna​—ni Samuel​—insapata ni Anna: “Ipaaykonto ken Jehova iti amin nga al-aldaw ti panagbiagna, ket awanto ti labaha nga umay iti rabaw ti ulona.” (1 Samuel 1:11) Iti kaso ni Juan a Mammautisar, kinuna ti anghel ni Jehova: “Saan a pulos uminum iti arak ken naingel nga inumen.” (Lucas 1:15) Kanayonanna, “daytoy met laeng a Juan adda pagan-anayna a dutdot ti kamelio ken barikes a lalat iti aglawlaw dagiti lomona; ti taraonna met ket insekto a dudon ken atap a diro.” (Mateo 3:4) Saan a naibilin kadagitoy a tallo nga adaywanda ti bangkay ti tao.

Nupay maysa a Nazareo, ni Samson ket maysa kadagiti ukom a dinutokan ni Jehova a mangisalakan kadagiti Israelita iti ima dagiti manangkamkam kadakuada. (Uk-ukom 2:16) Iti panangitungpalna iti dayta nga annongen, nasagidna dagiti bangkay. Iti maysa a pasamak, pinapatay ni Samson ti 30 a Filisteo ket inuksobna dagiti aruatenda. Naminsan, kinabilna dagiti kabusor, nga “inggabsuonna dagiti saka kadagiti luppo iti dakkel a pananggudas.” Nangala met iti sadiwa a tulang ti panga ti maysa a kalakian nga asno ket pinapatayna ti sangaribu a lallaki babaen iti dayta. (Uk-ukom 14:19; 15:8, 15) Inaramidna amin dayta buyogen ti anamong ken tulong ni Jehova. Iti Kasuratan, natukoy ni Samson kas lalaki a mapagulidanan ti pammatina.​—Hebreo 11:32; 12:1.

Dagiti kadi sasao a ni Samson pinisangna ti maysa a leon “no kasano a ti maysa pisangenna a guduaen ti maysa a kalakian nga urbon a kalding” ipamatmatna a gagangay nga aramid idi kaaldawanna ti panangpisang kadagiti urbon a kalding?

Awan ti pammaneknek nga idi kaaldawan dagiti Uk-ukom, gagangay kadagiti tattao ti mangpisang kadagiti urbon a kalding. Kuna ti Uk-ukom 14:6: “Nagtignay kenkuana [ni Samson] ti espiritu ni Jehova, iti kasta pinisangna a ginudua [ti maysa a burboran a bumaro a leon], no kasano a ti maysa pisangenna a guduaen ti maysa a kalakian nga urbon a kalding, ket awan a pulos ti aniaman a banag iti imana.” Mabalin a maysa nga ilustrasion dayta a komento.

Mabalin a dua ti kaipapanan ti ebkas a “pinisangna a ginudua.” Mabalin a pinisang ni Samson dagiti panga ti leon, wenno pinirsapirsayna ti bagi ti leon. No ti kaipapananna ket ti immuna, kabaelan dayta nga aramiden ti tao iti maysa nga urbon a kalding. Iti dayta a kaso, ipakita ti ilustrasion a saan a narigat para ken ni Samson ti ima-ima a panangparmek iti leon no maysa laeng dayta a kalakian nga urbon. Ngem ania ngay no ni Samson pinapatayna ti leon babaen ti panangpirsapirsayna iti dayta? No kasta, mamatmatan ti komento kas maysa a simile. No simile dayta, ti espiritu ni Jehova pinabilegna ni Samson a mangitungpal iti maysa a banag nga agkalikagum iti di gagangay a pisikal a pigsa. Aniaman kadagita, ti panamagdilig a mabasa iti Uk-ukom 14:6 ipakitana a babaen ti tulong ni Jehova, kabaelan ni Samson a parmeken ti maysa a nabileg a leon no kasano a ti maysa a tao a gagangay ti pigsana kabaelanna a parmeken ti maysa nga urbon a kalding.

[Footnote]