“Ania ti Sekretom?”

DAYTA a saludsod ti maysa a lakay ti nangsorpresa ken ni Muriel bayat ti kaaddana iti restawran a kaduana dagiti tallo nga annakna. Impadoktor ni Muriel dagiti annakna, ket maladawdan a tumabuno kadagiti Nakristianuan a gimong no agawidda pay tapno mangrabii. Isu a nanganda nga agiina iti maysa nga asideg a restawran.

Idi dandanin malpas ti pannanganda, immasideg ti lakay ket kinunana ken ni Muriel: “Palpaliiwenkayo sipud simrekkayo ditoy. Napaliiwko ti dakkel a nakaidumaan dagiti annakmo iti kaaduan nga ubbing. Paliiwem ti pampamay-anda kadagiti lamisaan ken tugaw. Ingatoda dagiti sakada iti lamisaan. Warawaraenda dagiti tugaw. Ngem natalna ken nasingpet dagiti annakmo. Ania ti sekretom?”

Insungbat ni Muriel: “Dakami ken ni lakayko regular nga ad-adalenmi ti Biblia a kaduami dagiti annakmi, ken ikagkagumaanmi nga iyaplikar dagiti maad-adalmi. Naitimpuyogkami kadagiti Saksi ni Jehova.” Kinuna ti lakay: “Maysaak a Judio a nakalasat iti Holocaust. Nakitak ti pannakaidadanes idi dagiti Saksi ni Jehova idiay Alemania. Uray idi, nakadkadlaw ti nakaidumaanda. Talaga a magustuak ti kababalin dagiti annakmo. Nasken a sukimatek ti relihionyo.”

Ti Biblia ket maysa a nagsayaat a libro a mangiwanwan iti panangpadakkel kadagiti ubbing. Interesado unay dagiti Saksi ni Jehova a tumulong kadagiti sabsabali a magunggonaan iti panangiwanwan a masarakan iti Kasuratan. Sibabara nga itukonmi kadakayo dagiti sumaganad.