“Agtultuloykayo nga Agbantay”

IDI nagkauna a tiempo, dagiti agay-aywan iti ruangan nagserbida kadagiti pagserkan ti siudad ken templo ken, no dadduma, kadagiti pribado a pagtaengan. Malaksid a siguraduenda a nakarikep dagiti ruangan no rabii, agserbida met a guardia. Nakapatpateg dayta nga annongen, agsipud ta ti kinatalged ti siudad agpannuray iti ipakaammoda a pakdaar no adda peggad.

Pagaammo ni Jesu-Kristo ti trabaho dagiti agay-aywan iti ruangan. Naminsan, inyarigna dagiti adalanna kadagiti agay-aywan iti ruangan ket pinaregtana ida nga agtultuloy nga agbantay mainaig iti panungpalan ti Judio a sistema ti bambanag. Kinunana: “Agtultuloykayo a kumita, agtultuloykayo a siririing, ta saanyo nga ammo no kaano ti naituding a tiempo. Dayta ket kas iti tao nga agdaldaliasat iti sabali a daga a pinanawanna ti balayna ket . . . binilinna ti agay-aywan iti ruangan nga agtultuloy nga agbantay. Gapuna agtultuloykayo nga agbantay, ta saanyo nga ammo no kaano nga umay ti apo ti balay.”​—Marcos 13:33-35.

Umasping iti dayta, daytoy a pagbasaan, Ti Pagwanawanan, ket nasurok a 125 a tawenen nga ipakpakaammona ti ‘panagtultuloy a panagbantay’ kas imparegta ni Jesus. Kasano? Kas nailanad iti panid 2, daytoy a magasin “sipsiputanna dagiti pasamak iti lubong bayat a tungtungpalenda ti padto ti Biblia. Liwliwaenna amin a tattao babaen ti naimbag a damag nga iti mabiiten dadaelento ti Pagarian ti Dios dagidiay mangirurrurumen iti padada a tattao ken pagbalinennanto a paraiso ti daga.” Ti Pagwanawanan ti kasaknapan a maiwarwaras a narelihiosuan a magasin iti sangalubongan, a nasurok a 26,000,000 a kopia ti maiwarwaras iti 150 a lenguahe. Babaen dayta, dagiti Saksi ni Jehova, kas kadagiti agay-aywan iti ruangan, parparegtaenda dagiti tattao iti sadinoman nga ‘agtultuloy nga agbantay’ iti naespirituan agsipud ta ti Apo, ni Jesu-Kristo, asidegen nga agsubli ken mangukom iti daytoy sistema dagiti bambanag.​—Marcos 13:26, 37.