Ti Nasayaat a Kondukta ‘Arkosanna ti Sursuro ti Dios’

NALAING nga agkanta ti agtutubo a ni Maria a taga Kransnoyarsk, Russia, isu nga inraman ti maestrana iti koro ti eskuelaan. Dagus a siraraem nga inasitgan ni Maria ti maysa kadagiti mannursurona tapno ilawlawagna nga adda dagiti saanna a mabalin a kantaen. Apay? Adda dagiti kanta a naglaon kadagiti narelihiosuan nga anag a maikontra kadagiti naibatay iti Biblia a patpatienna. Nasdaaw ti mannursuro, isu nga inyimtuodna, ‘Ania koma ti dakes iti panangipadayag iti Dios babaen ti kanta?’

Tapno mailawlawagna no apay a dina kayat a kantaen dagiti mainaig iti Trinidad a Dios, inukrad ni Maria ti Bibliana ket inlawlawagna a ti Dios ken ni Jesu-Kristo saanda a maysa a Dios, ken ti nasantuan nga espiritu isu ti aktibo a puersa ti Dios. (Mateo 26:39; Juan 14:28; Aramid 4:31) Insalaysay ni Maria: “Saan a nadadael ti relasionko iti mannursuro. Iti pakabuklan, nakasaysayaat dagiti mannursuro iti eskuelaanmi. Kayatda a napudnokami iti kinasiasinomi.”

Iti intero a tawen ti eskuela, nagun-od ni Maria ti panagraem dagiti mannursuro ken kaeskuelaanna gapu iti takderna. Kuna ni Maria: “Timmulong iti panagbiagko dagiti prinsipio iti Biblia. Iti panagturpos ti tawen ti eskuela, nakaawatak iti pammadayaw gapu iti napudno a kababalin ken kinadalimanekko, bayat a nangipaay met ti eskuelaan iti pormal a surat a mangpadpadayaw kadagiti dadakkelko gapu iti nasayaat a panangpadakkelda kaniak.”

Nabautisaran ni Maria idi Agosto 18, 2001. Kunana: “Maragsakanak ta makapagserbiak iti nakaim-imbag a Dios, a ni Jehova!” Dagiti agtutubo a Saksi ni Jehova iti sangalubongan iyap-aplikarda dagiti sasao iti Tito 2:10, a mabasatayo: ‘Arkosanyo ti sursuro ti Manangisalakantayo, ti Dios, iti amin a bambanag.’

[Ladawan iti panid 32]

Surat ti apresasion ken sertipiko ti nagapuanan

[Ladawan iti panid 32]

Ni Maria ken dagiti dadakkelna kalpasan ti bautismona