Paneknekam a ni Jehova ti Diosmo

IDI panawen ti Biblia, adda dagiti indibidual a nangtagiragsak iti nasinged a relasion ken ni Jehova ket nakuna nga isu ti Diosda. Kas pagarigan, iti Kasuratan, natukoy ni Jehova kas “ti Dios ni Abraham,” “ti Dios ni David,” ken ti “Dios ni Elias.”​—Genesis 31:42; 2 Ar-ari 2:14; 20:5.

Kasano a naaddaan dagitoy a lallaki iti nasinged a relasion iti Dios? Ania ti maadaltayo kadakuada tapno maaddaan ken mataginayontayo met ti maysa a nalagda a personal a relasion iti Namarsua?

Naaddaan ni Abraham “iti Pammati ken Jehova”

Ni Abraham ti kaunaan a tao a dinakamat ti Biblia a naaddaan iti pammati ken Jehova. Ti pammati, a kangrunaan a galad ni Abraham, ti makagapu no apay a nagun-odna ti anamong ti Dios. Kinapudnona, tinagiragsak ni Abraham dayta nga anamong ni Jehova agsipud ta ti Namarsua inyam-ammona ken ni Moises ti kinasiasinona kas “ti Dios ni Abraham” ken ti anak ken apokona, da Isaac ken Jacob.​—Genesis 15:6; Exodo 3:6.

Kasano a naaddaan ni Abraham iti kasta a pammati iti Dios? Umuna iti amin, natibker ti pundasion ti pammati ni Abraham. Nalabit a nasursuruan iti dalan ni Jehova babaen iti anak ni Noe a ni Sem, a nakaimatang kadagiti panangispal nga inaramid ti Dios. Nakita ni Sem no kasano a ni Jehova “inaywananna ni Noe, maysa a manangaskasaba iti kinalinteg, a sitatalged agraman ti pito a sabsabali pay idi nangyeg iti layus iti lubong dagiti di nadiosan a tattao.” (2 Pedro 2:5) Nalabit a naammuan ni Abraham manipud ken ni Sem a no adda inkari ni Jehova, sigurado a tungpalenna. Aniaman kadagita, idi nagkari ti Dios ken ni Abraham, nagragsakanna dayta ken nagbiag sigun iti natalged a pannakaammona a matungpal dayta a kari.

Gapu ta addaan iti nalagda a pundasion, ad-adda a bimmileg ti pammati ni Abraham babaen kadagiti aramidna. Insurat ni apostol Pablo: “Babaen iti pammati nagtulnog ni Abraham, idi naayaban, a mapan iti disso a naikeddeng nga awatenna kas tawid; ket napan, nupay saanna nga ammo no sadino ti pagturonganna.” (Hebreo 11:8) Ti pammati ni Abraham ket nabuyogan iti kinatulnog, a makagapu no apay nga insurat ni adalan a Santiago: “Makitam a ti pammatina nagtignay a maibuyog iti ar-aramidna ket babaen iti ar-aramidna naan-anay ti pammatina.”​—Santiago 2:22.

Kanayonanna, impalubos ni Jehova a masubok ti pammati ni Abraham, nga ad-adda a nangpatibker iti dayta. Intuloy a kinuna ni Pablo: “Babaen iti pammati, idi isu nasubok, ni Abraham kaslanan indaton ni Isaac.” Ti pannubok ket manggugor ken mangpatibker iti pammati, a mamagbalin iti dayta “a dakdakkel unay ti pategna ngem ti balitok.”​—Hebreo 11:17; 1 Pedro 1:7.

Nupay saan a nakita ni Abraham ti amin a kaitungpalan ti kari ti Dios, naaddaan iti rag-o a makakita iti panangsurot ti sabsabali iti ulidanna. Ti asawana a ni Sara ken ti tallo pay a kameng ti pamiliana​—da Isaac, Jacob, ken Jose​—nakomendaranda met iti Biblia gapu iti naisangsangayan a pammatida.​—Hebreo 11:11, 20-22.

Pammati a Kas ken Abraham

Napateg ti pammati para iti asinoman nga agtarigagay a mangbigbig ken ni Jehova kas Diosna. ‘No awan ti pammati di mabalin nga ay-aywen a naan-anay ti Dios,’ insurat ni Pablo. (Hebreo 11:6) Kasano a ti adipen ti Dios ita mapatanorna ti pammati a kas ken Abraham?

Kas ken Abraham, rumbeng a natibker ti pundasion ti pammatitayo. Ti kasayaatan a panangaramidtayo iti dayta ket babaen ti regular a panagadal iti Biblia ken kadagiti publikasion a naibatay iti Biblia. Ti panagbasa iti Biblia ken panangmennamenna iti nabasa ket mangted kadatayo iti pammatalged a matungpal dagiti kari ti Dios. Iti kasta, matignaytayo a mangbalbaliw iti biagtayo maibatay iti dayta a sigurado a namnama. Ad-adda pay a tumibker ti pammatitayo no natulnogtayo a makiraman iti ministerio iti publiko ken tumabuno kadagiti Nakristianuan a gimong.​—Mateo 24:14; 28:19, 20; Hebreo 10:24, 25.

Sigurado a masubok ti pammatitayo, nalabit babaen ti ibubusor, nakaro a sakit, ipupusay ti maysa nga ing-ingungoten, wenno iti dadduma pay a pamay-an. Ti panagtalinaed a nasungdo ken ni Jehova iti sidong ti pannubok patibkerenna ti pammatitayo, a mamagbalin iti dayta a napatpateg ngem iti balitok. Makitatayo man wenno saan ti kaitungpalan ti amin a kari ti Dios, ti pammatitayo ti ad-adda a mangyadani kadatayo ken ni Jehova. Maysa pay, ti ulidantayo tignayenna ti dadduma a mangtulad iti pammatitayo. (Hebreo 13:7) Kasta ti kaso ni Ralph, a nangpaliiw ken nangtulad iti pammati dagiti dadakkelna. Kunana:

“Idi makipagnanaedak pay laeng idiay balaymi, dagiti dadakkelko pinaregtada ti intero a pamiliami nga agriing a nasapa tapno sangsangkamaysa nga agbasakami iti Biblia. Nabasami ti intero a Biblia iti kasta a wagas.” Agingga ita, basbasaen ni Ralph ti Biblia tunggal agsapa, isu a nasayaat ti panangirugina iti tunggal aldaw. Linawas idi a makikadua ni Ralph ken ni tatangna a mangasaba. “Gapu iti dayta, nasursurok ti agsarungkar ken mangikondukta iti panagadal iti Biblia.” Agserserbi ita ni Ralph kas maysa a boluntario iti maysa kadagiti sanga nga opisina dagiti Saksi ni Jehova idiay Europa. Anian a nagsayaat a gunggona iti pammati dagiti dadakkelna!

Maysa nga Inanamongan ti Puso ni Jehova

Ni David, a nayanak agarup 900 a tawen kalpasan ni Abraham, ket maysa a naisangsangayan nga adipen ni Jehova a nadakamat iti Kasuratan. No maipapan iti panangpili ni Jehova ken ni David kas masanguanan nga ari, kinuna ni mammadto a Samuel: “Sigurado a mangsapulto ni Jehova maipaay kenkuana iti maysa a lalaki a naanamongan iti pusona.” Nakasingsinged ti relasion da Jehova ken David isu a ni mammadto nga Isaias dinakamatna ken ni Ari Ezekias ti maipapan ken ni “Jehova a Dios ni David nga amam.”​—1 Samuel 13:14; 2 Ar-ari 20:5; Isaias 38:5.

Nupay makaay-ayo ni David iti puso ni Jehova, adda dagiti gundaway nga impangpangrunana dagiti tarigagayna. Tallo a daras a nakaaramid iti serioso a kamali: Impalubosna a mayakar idiay Jerusalem ti lakasa ti tulag iti di umiso a wagas; nakikamalala ken ni Bat-seba ken insikatna ti pannakapapatay ti asawana a ni Urias; ken nangipatungpal iti maysa a panangbilang iti umili ti Israel ken Juda a saan nga imbilin ni Jehova. Kadagita a gundaway, sinalungasing ni David ti Linteg ti Dios.​—2 Samuel 6:2-10; 11:2-27; 24:1-9.

Ngem idi naipabigbig kenkuana dagiti nagbasolanna, inawatna dagiti nagkamalianna ket dina impabasol dayta kadagiti sabali. Inaminna a saan nga umiso ti wagas ti pannakayakar ti Lakasa, sana innayon a kinuna a “saantay a binirok [ni Jehova] maitunos iti kaugalian.” Idi imbutaktak ni mammadto a Natan ti pannakikamalala ni David, kinunana: “Nagbasolak a maikaniwas ken Jehova.” Ken apaman a nakita ni David a minamaag ti panangbilang kadagiti tattao, inaminna: “Nagbasolak iti kasta unay iti inaramidko.” Pinagbabawyan ni David dagiti basolna ket nagtalinaed a nasinged ken ni Jehova.​—1 Cronicas 15:13; 2 Samuel 12:13; 24:10.

No Makabasoltayo

Iti panangikagumaantayo nga agserbi ken ni Jehova kas Diostayo, makaparegta ti ulidan ni David. No ti maysa a makaay-ayo iti puso ni Jehova ket makaaramid pay latta kadagiti kasta a nadagsen a basol, ditay koma maupay no makaaramidtayo no dadduma iti kamali wenno nadagsen pay ketdi a basol iti laksid ti panagreggettayo. (Eclesiastes 7:20) Makaliwliwa kadatayo ti kinapudno nga idi nagbabawi ni David, napakawan dagiti basolna. Kasta ti napasamak ken ni Uwea sumagmamano a tawen ti napalabas.

Maysa a panglakayen ni Uwe iti kongregasion dagiti Saksi ni Jehova. Naminsan, naaddaan iti di umiso a tarigagay ket nakaaramid iti imoralidad. Idi damo, pinadas ni Uwe nga ilimed dayta a banag, kas iti inaramid ni Ari David, a ninamnamana a palabsen lattan ni Jehova dayta a basolna. Ngem idi agangay, kasta unay ti pannakaburibor ti konsiensia ni Uwe isu nga impudnona ti basolna iti padana a panglakayen ket adda naaramid a panangtulong ken ni Uwe tapno makalung-aw manipud iti naespirituan a pannakadidigrana.

Nagbabawyan ni Uwe dagiti basolna ket nagtalinaed a nasinged ken ni Jehova ken iti kongregasion. Agyaman unay iti tulong a naawatna isu a nagsurat kadagiti panglakayen sumagmamano a lawas kalpasanna tapno iyebkasna ti napasnek ken nasged a panagyamanna iti saranay a naawatna. “Tinulongandak a mangikkat iti aniaman a pakababalawan ti nagan ni Jehova,” insuratna. Nataginayon ni Uwe ti relasionna ken ni Jehova ket idi agangay, nadutokan manen nga agserbi iti dayta met laeng a kongregasion.

“Maysa Idi a Tao nga Addaan iti Rikna a Kas Kadatayo”

Ni Elias, a nagbiag kalpasan ti panawen ni David, ket maysa kadagiti kangrunaan a mammadto ti Israel. Intandudo ni Elias ti pudno a panagdayaw kabayatan ti panawen a nasaknap ti kinalulok ken imoralidad, ket di pulos kimmapuy ti debosionna ken ni Jehova. Saan ngarud a pakasdaawan a ti simmaruno kenkuana, ni Eliseo, inawaganna naminsan ni Jehova kas ti “Dios ni Elias”!​—2 Ar-ari 2:14.

Ngem awan nakaidumaan ni Elias kadagiti gagangay a tao. Insurat ni Santiago: “Ni Elias maysa idi a tao nga addaan rikna a kas kadatayo.” (Santiago 5:17) Kas pagarigan, kalpasan nga impakatna ti maysa a nasaem a pannakaabak kadagiti agdaydayaw ken ni Baal idiay Israel, impangta ni Reyna Jezebel a papatayenna ni Elias. Ania ti reaksionna? Nagbuteng ni Elias ket nagkamang iti let-ang. Bayat a situtugaw sadiay iti sirok ti maysa a kayo a retama, inyasug ni Elias: “Umanayen dayta! Ita, O Jehova, alaem ti kararuak, ta saanak a naim-imbag ngem kadagidi ammak.” Kaykayat ni Elias a matay laengen ngem ti agserbi kas propeta.​—1 Ar-ari 19:4.

Ngem maawatan ni Jehova ti rikna ni Elias. Pinabilegna ken impanamnamana nga isu ket saan nga agmaymaysa, ta adda dadduma pay a nasungdo iti pudno a panagdayaw. Maysa pay, nagtalek latta kenkuana ni Jehova ket inikkanna iti annongen nga iringpasna.​—1 Ar-ari 19:5-18.

Ti pannakaburibor ni Elias ket saan a pagilasinan a napukawna ti anamong ti Dios. Agarup 1,000 a tawen kalpasanna, idi nagbalbaliw ti langa ni Kristo-Jesus iti imatang da Pedro, Santiago, ken Juan, siasino ti pinili ni Jehova nga agparang a kadua ni Jesus iti dayta a sirmata? Da Moises ken Elias. (Mateo 17:1-9) Nalawag a ni Jehova minatmatanna ni Elias kas naisangsangayan a mammadto. Nupay ni Elias ket ‘maysa laeng a tao nga addaan iti rikna a kas kadatayo,’ impateg ti Dios ti panagreggetna a mangisubli iti nasin-aw a panagdayaw ken mangsantipikar iti naganna.

Ti Pannakaburibortayo

Adda dagiti gundaway a makarikna iti pannakaupay wenno panagdanag dagiti agdama nga adipen ni Jehova. Anian a makaliwliwa a maammuan a nakapasar met ni Elias iti kasta a pannakaburibor! Ken anian a mangpatalged iti rikna a maammuan a no kasano a naawatan ni Jehova ti rikrikna ni Elias, maawatanna met dagiti pannakaburibortayo.​—Salmo 103:14.

Ay-ayatentayo ti Dios ken dagiti padatayo a tattao ken tarigagayantayo nga aramiden ti trabaho ni Jehova a panangiwaragawag iti naimbag a damag ti Pagarian. Iti sabali a bangir, nalabit a maupaytayo no saan a mangipangag dagiti kaskasabaantayo wenno madanagantayo gapu kadagiti pangta dagiti bumusbusor iti pudno a panagdayaw. Ngem no kasano a ni Jehova nagtultuloy a kinabalanna ni Elias, kabalanna met dagiti adipenna ita. Alaentay a pagarigan ti kaso da Herbert ken Gertrud.

Idi 1952, nabautisaran da Herbert ken Gertrud kas Saksi ni Jehova idiay Leipzig, iti dati a German Democratic Republic. Narigat idi ti kasasaad dagiti adipen ti Dios gapu ta maiparit ti ministerioda iti publiko. Ania ti makuna ni Herbert maipapan iti panangasaba iti binalaybalay?

“Madanagankami no dadduma. No agbalaybalaykami, dimi ammo no kellaat lattan a dumteng dagiti autoridad ket arestuendakami.” Ania ti nakatulong ken ni Herbert ken kadagiti dadduma a nangparmek iti butengda? “Inggaedmi ti personal a panagadalmi iti Biblia. Ken pinabilegnakami ni Jehova a mangitultuloy iti panangasabami.” Iti ministeriona iti publiko, adu ti kapadasan ni Herbert a nangpabileg kenkuana​—makapakatawa pay ketdi.

Naam-ammo ni Herbert ti maysa a nataengan a babai a nangipakita iti interes iti Biblia. Idi sinarungkaran ni Herbert kalpasan ti sumagmamano nga aldaw, adda sadiay ti maysa nga agkabannuag a lalaki nga umim-imdeng iti saritaanda. Kalpasan ti sumagmamano a minuto, nagtibbayo ti barukong ni Herbert iti nakitana. Adda kallugong ti polis a nakaparabaw iti maysa a tugaw iti suli ti siled. Ti lalaki gayam ti makinkukua iti dayta, a nalawag a maysa a polis a determinado a mangarestar ken ni Herbert.

“Maysaka kadagiti Saksi ni Jehova!” impukkaw ti lalaki. “Kitaek man ti ID card-mo.” Inyawat ni Herbert. Di ninamnama ti simmaruno a napasamak. Imballaag ti babai iti polis: “No adda dakes a mapasamak iti daytoy a ministro ti Dios, dikanton pulos makabaddek iti daytoy a balay.”

Nagsarimadeng ti lalaki, insublina ti ID ni Herbert, ket binaybay-anna. Naammuan ni Herbert nga agar-arem ti lalaki iti balasang nga anak ti babai. Siempre, kaykayatna a maitultuloy ti panagaremna ngem iti panangtiliwna ken ni Herbert.

Paneknekantayo a ni Jehova ti Diostayo

Ania ti maadaltayo kadagitoy a pasamak? Kas ken Abraham, rumbeng nga addaantayo iti nabileg a panagtalek kadagiti kari ni Jehova. Kas ken David, nasken a pudpudno nga agbabawitayo ken dumawat iti pammakawan ni Jehova no makabasoltayo. Kas ken Elias, masapul a ni Jehova ti pagpannurayantayo iti kired kadagiti panawen ti pakadanagan. No aramidentayo dayta, ipakpakitatayo a ni Jehova ti Diostayo ita ken iti agnanayon, yantangay isu ti “sibibiag a Dios, a Manangisalakan iti amin a kita ti tattao, nangnangruna kadagidiay matalek.”​—1 Timoteo 4:10.

[Footnote]

[Dagiti Ladawan iti panid 25]

Gapu iti panagtulnog, rimmayray ti pammati ni Abraham

[Ladawan iti panid 26]

Kas ken David, nasken nga agbabawitayo no makabasoltayo

[Ladawan iti panid 28]

Maawatan ni Jehova ti rikriknatayo no kasano a naawatanna met idi ti rikrikna ni Elias