“Ti Tulongko Aggapu Ken Jehova”

Bendisionan ni Jehova Dagiti Managsakripisio

MAYSA a lalaki ti nagdaliasat babaen ti bisikleta iti nasulinek a kabakiran ti Cameroon. Uppat nga oras a nagbisikleta kadagiti nadanum a kalsada ken iti kapitakan, a linasatna ti peggad tapno mapabilegna dagiti sabsabali. Tapno mayadalan ti maysa a naiputputong a grupo, dadduma met idiay Zimbabwe ti magna iti 15 a kilometro, a lumasatda kadagiti adalem a karayan, a susuonenda dagiti kawes ken sapatosda tapno saan a mabasa. Iti sabali pay a lugar, maysa a babai ti bumangon iti alas kuatro ti parbangon tapno sarungkaran ken iyadalanna iti maysa nga oras ti nars a parbangon laeng ti wayana.

Ania ti pagpapadaan dagiti tattao a mangar-aramid kadagiti kasta a panagregget? Makipaspasetda amin iti trabaho a panangisuro iti kinapudno iti Biblia kas amin-tiempo a ministro dagiti Saksi ni Jehova, a pakaibilangan dagiti regular ken special pioneer, misionero, agdaldaliasat a manangaywan, ken rinibu a boluntario kadagiti pagtaengan ti Bethel iti sangalubongan. Ket ti kinamanagsakripisio ti galad a pakabigbiganda.a

Umiso a Motibo

Ipangpangag dagiti Saksi ni Jehova ti pammagbaga ni apostol Pablo ken ni Timoteo: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.” (2 Timoteo 2:15) Ngem ania ti mangtigtignay kadagiti ginasgasut a ribu a Saksi tapno agserbida kas amin-tiempo a ministro?

No mayimtuod kadagiti amin-tiempo nga ad-adipen no apay a naanepda nga agserbi ken ni Jehova, ibagada a maigapu dayta iti ayatda iti Dios ken kadagiti padada a tattao. (Mateo 22:37-39) Maitutop unay dayta, agsipud ta ubbaw ti aniaman a panangikagumaan no saan nga ayat ti motibo.​—1 Corinto 13:1-3.

Panagserbi a Nabuyogan iti Panagsakripisio

Amin a dedikado a Kristiano impangagda ti awis ni Jesus: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan ket agtultuloy a surotennak.” (Mateo 16:24) Ti panangtallikud iti bagitayo kaipapananna a sidadaan nga agpasakup ken agpaiwanwantayo ken ni Jehova a Dios ken ni Jesu-Kristo. Para iti adu, kaipapananna dayta ti panagserbida kas amin-tiempo a ministro buyogen ti panagsakripisio.

Adu a Saksi ti mangikagkagumaan a mangpalawa iti serbisioda ken ni Jehova. Usigenyo ti agtawen iti 56 a ni Júlia, maysa a regular pioneer idiay São Paulo, Brazil. “Maysa a Tsino a kabsat ti nagtelepono ken nangyimtuod kaniak no kayatko ti agadal iti Tsino,” kunana. “Gapu ta baketakon, saanko pulos a pinanunot ti agadal iti baro a lenguahe. Ngem kalpasan ti sumagmamano nga aldaw, inawatko dayta a karit. Ita, kabaelakon ti mangasaba iti Tsino.”

Ipadamag ti sanga nga opisina dagiti Saksi ni Jehova idiay Peru: “Kadagiti nabiit pay a tawen, ginasgasut a regular pioneer ti immakar kadagiti di pay mawanwanas a teritoria, a mangipakpakitada iti kinatured ken kinamanagsakripisio. Immakarda kadagiti adayo nga ili nga awanan kadagiti kangrunaan a serbisio ken limitado ti pagtrabahuan. Dagitoy a kakabsat a lallaki ken babbai sidadaanda a mangaramid iti amin a kasapulan a panagsakripisio tapno makapagtalinaedda kadagiti teritoriada. Ngem kapatgan iti amin, ti ministerioda ket bendision iti adu a lugar. Ipadamag dagiti agdaldaliasat a manangaywan a nabuangay dagiti baro a grupo babaen ti tulong dagitoy a managsakripisio a regular pioneer.”

Dadduma a Kristiano ti nangirisgo iti biagda tapno matulonganda dagiti kapammatianda. (Roma 16:3, 4) Impadamag ti maysa a manangaywan iti sirkito iti maysa a lugar idiay Africa a pakapaspasamakan ti gubat: “Sakbay a nadanonmi ken ni baketko ti maudi a barikada iti nagbaetan ti teritoria dagiti rebelde ken ti teritoria ti gobierno, pinalikmutandakami dagiti uppat a komander dagiti rebelde ken dagiti guardiada, nga inimtuodda no siasinokami. Bayat a sinukimatda dagiti kard a pakabigbiganmi, naammuanda a naggapukami iti lugar a kontrolado ti gobierno, isu a nagatapda. Kinunada a maysaak nga espia. Gapuna, inkeddengda nga itinnagdak iti abut. Inlawlawagko no siasinokami, ket winayawayaandakami met laeng.” Anian ti yaman dagiti kongregasion gapu ta nagballigi dagitoy a managsakripisio nga agassawa a sumarungkar kadakuada!

Iti laksid dagiti narigat a kapadasanda, umad-adu dagiti amin-tiempo a ministro iti sangalubongan. (Isaias 6:8) Dagitoy a naanep a trabahador tagipatgenda ti pribilehioda nga agserbi ken ni Jehova. Buyogen ti umasping a kinamanagsakripisio, minilion a sabsabali pay ti agdaydayaw ita ken ni Jehova. Iti kasta, siwawadwad a bembendisionanna met ida. (Proverbio 10:22) Gapu ta agtalekda iti agtultuloy a bendision ken suporta, dagitoy a naanep a trabahador iyanninawda ti kababalin ti salmista a nangikanta: “Ti tulongko aggapu ken Jehova.”​—Salmo 121:2.

[Footnote]

[Blurb iti panid 9]

“Dagiti tattaom situtulok nga idatondanto ti bagbagida iti aldaw ti puersa militarmo.”​—SALMO 110:3.

[Kahon iti panid 8]

IPATPATEG NI JEHOVA DAGITI NAPASNEK NGA ADIPENNA

“Agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.”​—1 Corinto 15:58.

“Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.”​—Hebreo 6:10.