Dagiti Baro a Kameng ti Bagi a Manarawidwid
IDI agsapa ti Mierkoles, Agosto 24, 2005, ti pamilia ti Bethel idiay Estados Unidos ken Canada, nangngegda ti maysa a makaparagsak a pakaammo babaen ti video. Mangrugi iti Setiembre 1, 2005, manayonan iti dua a baro a kameng ti Bagi a Manarawidwid dagiti Saksi ni Jehova―da Geoffrey W. Jackson ken Anthony Morris III.
Nangrugi a nagpayunir ni Kabsat Jackson idi Pebrero 1971 idiay Tasmania, ti isla nga estado ti Australia. Idi Hunio 1974, inkallaysana ni Jeanette (Jenny). Di nagbayag kalpasanna, nadutokanda nga agserbi kas special pioneer. Sipud 1979 agingga 2003, nagserbida kas misionero idiay Tuvalu, Samoa, ken Fiji―dagiti isla a nasion iti Abagatan a Pacifico. Bayat ti kaaddada kadagiti isla, dakkel met ti naitulong da Kabsat Jackson no iti trabaho a panangipatarus kadagiti literatura a naibatay iti Biblia. Sipud idi 1992, nagserbi ni Kabsat Jackson iti Komite ti Sanga idiay Samoa, ken sipud idi 1996, iti Komite ti Sanga idiay Fiji. Idi Abril 2003, nagbalinda ken ni baketna a kameng ti pamilia ti Bethel iti Estados Unidos ket nagtrabahoda iti Translation Services Department. Di nagbayag kalpasanna, nadutokan ni Kabsat Jackson a tumulong iti Teaching Committee ti Bagi a Manarawidwid.
Nangrugi met a nagpayunir ni Kabsat Morris idi 1971 iti Estados Unidos. Iti Disiembre dayta a tawen, inkallaysana ni Susan, ket nagtultuloyda a nagpayunir iti dandani uppat a tawen agingga a naipasngay ti inauna nga anakda, ni Jesse. Idi agangay, naaddaanda iti maikadua nga anak, ni Paul. Nagpayunir manen ni Kabsat Morris idi 1979. Simmaruno ni baketna idi ageskuelan dagiti ubbing. Nagserbi ti pamiliada iti lugar nga addaan iti dakkel a panagkasapulan idiay Rhode Island ken North Carolina, iti Estados Unidos. Idiay North Carolina, nagserbi ni Kabsat Morris kas kasuno a manangaywan iti sirkito, ken simrek kas regular pioneer dagiti babbaroda. Naawis idiay sanga nga opisina ti Estados Unidos da Jesse ken Paul idi agtawenda iti 19. Kabayatanna, nangrugi nga agserbi ni Kabsat Morris kas manangaywan iti sirkito. Kalpasanna, idi 2002, naawisda ken ni Susan nga agserbi iti Bethel, ket rinugianda ti baro nga annongenda idi Agosto 1. Nagtrabaho ni Kabsat Morris iti Service Department idiay Patterson ken kalpasanna kas katulongan iti Komite ti Serbisio ti Bagi a Manarawidwid.
Malaksid kadagitoy dua a baro a kameng, ti Bagi a Manarawidwid ket buklen da C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; ken D. Sydlik. Napulotan a Kristiano ti amin a kameng ti Bagi a Manarawidwid.