Pannakasarak iti Pudno a Pannakalawlawag

DISIEMBRE 18, 1810 idi. Medio rumabiin. Iti nadawel a taaw iti makin-abagatan a daya ti kosta ti Scotland, naiwawa ti HMS Pallas a bapor ti British Navy. Gapu ta rumabiin ken agtintinnag ti niebe, rumigrigat para kadagiti tripulante a makita ti lawag ti parola tapno maiturongda ti barko iti natalged a lugar. Agasenyo ti pannakabang-arda idi adda makitadan a lawag a nangituronganda iti barkoda! Ngem nakalkaldaang ta saan a dagitoy dagiti mangigiya a lawag a kasapulanda. Kinapudnona, dagitoy ket silaw dagiti trabahador iti asideg ti kosta. Naisadsad ti Pallas iti kabatuan a naan-anay a nakadadaelanna. Nalmes ti 11 a marino. Anian a nakalkaldaang a pasamak!

Gapu iti maysa a biddut, simmangbay ti trahedia iti Pallas. Ngem no dadduma, maipasango dagiti marino iti dadakkel pay a peggad​—ti mangyaw-awan a lawag. Nairanta a maikabil dagiti lawag tapno maiturong dagiti barko iti nabato a kosta a pakadadaelanna ken pakasamsamanna, sigun iti libro a Wrecks, Wreckers and Rescuers.

‘Sagrado a Sursurat a Mangiturong Kenka iti Pannakaisalakan’

Iti panagbirokmo iti pannakalawlawag, maipasangoka kadagiti peggad a kaasping ti napasamak kadagiti marino. Nalabit a mangyaw-awan nga impormasion ti sursurotem, wenno mabalin pay ketdi nga agbalinka a biktima ti inggagara a panangallilaw. Dagita a dana mabalin nga iturongdaka iti didigra. Ania ti maaramidam tapno masalaknibam ti bagim? Siguraduem a ti gubuayan ti pannakalawlawagmo ket pudno ken mapagtalkan. Iti nasuroken a 125 a tawen, intandudo daytoy a magasin ti naipaltiing a Sao ti Dios, ti Biblia, kas ti mapagpannurayan unay a gubuayan ti pannakalawlawag gapu iti linaonna a “sagrado a sursurat nga addaan bileg a mamagsirib kenka ken mangiturong kenka iti pannakaisalakan.”​—2 Timoteo 3:15-17, New English Bible.

Siempre, tapno maaddaanka iti panagtalek iti Biblia kas gubuayan ti mapagpannurayan a mangiwanwan a lawag, nainkalintegan laeng a sukimatem no umiso dayta. (Salmo 119:105; Proverbio 14:15) Dika bumdeng nga agsurat kadagiti nangipablaak iti daytoy a magasin tapno magun-odam ti impormasion a nakatulongen iti minilion a tattao tapno patienda a ti Biblia ket pudpudno nga impaltiing Dios. Kas pagarigan, basaem ti broshur a napauluan iti Libro Para iti Amin a Tao.a Idatagna ti adu nga impormasion a mangipakita a ti Biblia ket umiso, napaypayso, ken naipaltiing.

Dagiti Kangrunaan a Kinapudno

Ania ngarud ti sumagmamano a kangrunaan a kinapudno a linaon daytoy “sagrado a sursurat?” Usigenyo dagiti sumaganad a pagarigan.

Adda maymaysa a Mannakabalin-amin a Dios ken Namarsua iti amin a banag. (Genesis 1:1) Addatayo ‘agsipud ta pinarsua ti Dios ti amin a bambanag’ ken inikkannatayo iti biag. (Apocalipsis 4:11) Dayta ti gapuna nga isu laeng ti maikari a pagdayawantayo. Ti Namarsua ti kangrunaan a Gubuayan ti amin a pannakalawlawag. (Salmo 36:9; Isaias 30:20, 21; 48:17, 18) Adda personal a naganna a kayatna nga usarentayo. (Exodo 3:15) Dayta a nagan a naisurat iti Hebreo a letra a katupag ti YHWH, ket masarakan iti Biblia iti agarup 7,000 a daras. Sinigsiglo a naus-usaren dayta iti iloko iti porma a “Jehova.”​—Salmo 83:18.

Ni Jehova inaramidna ti lalaki ken babai nga agbiag nga agnanayon iti Paraiso a kasasaad ditoy daga. Inikkanna dagiti tattao iti naespirituan a kualidad a mangyanninaw kenkuana. Impaayanna ida iti saguday ken abilidad tapno matagiragsakda ti agnanayon ken makapnek a biag ditoy daga. (Genesis 1:26-28) Saanna a pinanggep a ti daga ket maysa a lugar a pakasubokan dagiti lallaki ken babbai​—a pakaisaganaanda sakbayda nga agbiag idiay langit kas espiritu, a kasla sadiay laeng a matagiragsakda ti pannakirelasion iti Dios.

Awan ti dakes kadagiti tattao a pinarsua ti Dios. Timmaud laeng ti dakes idi a ti dadduma a parsua ti Dios​—agpadpada ti tao ken espiritu​—di umiso nga inusarda ti wayawayada nga agpili ken bimmusorda iti Dios. (Deuteronomio 32:5) Dagiti immuna a nagannak kadatayo ginamgamda ti kalintegan a mangikeddeng no ania ti naimbag ken dakes. (Genesis 2:17; 3:1-5) Dayta ti nangyeg iti ipapatay iti amin a tao. (Genesis 3:19; Roma 5:12) Tapno marisut dagiti isyu a pinataud ti iyaalsa, inkeddeng ni Jehova a temporario nga ipalubosna ti kinadakes. Ngem saan a nagbaliw ti panggepna agpaay iti daga ken iti tattao. (Isaias 45:18) Agbiagto nga agnanayon dagiti tattao iti Paraiso a kasasaad iti nadalusanen a daga.​—Mateo 6:10; Apocalipsis 21:1-5.

Ni Jesu-Kristo ket Anak ti Dios, saan a Mannakabalin-amin a Dios. Insuro a mismo ni Jesu-Kristo kadagiti adalanna nga ikararagda: “Amami nga adda iti langlangit, masantipikar koma ti naganmo.” (Mateo 6:9) Dina pulos minatmatan a kapadana ti Dios. Imbes ketdi, kinunana: “Ti ama dakdakkel ngem siak.”​—Juan 14:28.

Napateg ti akem ni Jesus iti pannakatungpal ti panggep ti Dios. Imbaonna ni Jesus “kas maysa a silaw iti lubong, tapno tunggal maysa nga addaan iti pammati [kenkuana] saan nga agtalinaed iti sipnget.” (Juan 12:46) Sigun ken apostol Pedro, ‘awanen ti sabali pay a pakaisalakanan.’ (Aramid 4:12) Pudno daytoy agsipud ta ti pannakaisalakantayo ket agpannuray iti napateg a dara ni Kristo. (1 Pedro 1:18, 19) Inted ni Jesu-Kristo ti biagna kas pangsubbot a daton tapno maispal ti sangatauan manipud basol nga inyeg ti immuna a nagannak kadatayo, da Adan ken Eva. (Mateo 20:28; 1 Timoteo 2:6) Kasta met, inusar ti Dios ni Jesus a mangipalgak iti pagayatan ken panggepna.​—Juan 8:12, 32, 46, 47; 14:6; Aramid 26:23.

Nangipasdek ti Dios iti Nailangitan a Pagarian, wenno gobierno, a buklen ni Jesu-Kristo ken dagidiay napili manipud sangatauan. Maulit-ulit a masarakan daytoy a mensahe iti intero a Biblia. Ti Dios intalekna iti daytoy a gobierno ti annongen a mangibanag iti pagayatanna ditoy daga kas idiay langit. (Mateo 6:10) Saan a paset ti orihinal a panggep ti Dios a mapan idiay langit ti asinoman a tao. Ti daga ti nairanta a pagnaedanda. Ngem idi nagbasol ti tao, adda baro iti panggep ti Dios. Inyurnosna ti mangpili kadagiti tattao “manipud iti tunggal tribu ken pagsasao ken ili ken nasion” tapno “agturayda a kas ar-ari” a kadua ni Kristo iti nailangitan a gobierno. (Apocalipsis 5:9, 10) Dayta a Pagarian a gobierno “rumekennanto ken pagpatinggaenna” ti amin a natauan a turay, a nangyeg iti kasta unay a ladingit ken rigat kadagiti tattao.​—Daniel 2:44.

Matay ti kararua. Adu ti lawlawagan daytoy a kinapudno a masarakan iti Biblia maipapan iti tao ken ti namnamana. Ikkatenna met ti di umiso a pannakaawat ken impormasion a nangriro kadagiti tattao maipapan iti kasasaad dagiti natay.

Kuna ti umuna a libro ti Biblia: “Ni Jehova a Dios binukelna ti tao manipud tapok a naggapu iti daga ket impuyotna kadagiti abut ti agongna ti anges ti biag, ket ti tao nagbalin a kararua a sibibiag.” (Genesis 2:7) Maawatanyo kadi ti kayat a sawen dayta? Ti kararua ket saan a kasla anniniwan nga adda iti uneg ti bagi ti tao. Ti tao ket awanan iti kararua. Isu ti kararua​—dagiti nagtipon nga elemento a masarakan iti “tapok iti daga” ken ti puersa ti biag a nagtaud iti Dios. Ti kararua ket saan nga imortal. No matay ti tao, matay ti kararua.​—Genesis 3:19; Eclesiastes 9:5, 10.

Dagiti natay maisubli ti biagda babaen ti panagungar. No nagpatinggan ti temporario a panangipalubos ti Dios iti kinadakes, “amin dagidiay adda kadagiti pakalaglagipan a tanem mangngegdanto ti timekna [ni Jesus] ket rummuarda, dagidiay nagaramid iti naimbag a bambanag iti panagungar iti biag, dagidiay nangyugali iti nakadakdakes a bambanag iti panagungar iti pannakaukom.” (Juan 5:28, 29; Aramid 24:15) Ti panagungar ti mangisubli iti biag dagiti tattao iti paraiso a daga, ti kita ti biag nga orihinal a pinanggep ti Dios para kadagiti tattao.

Sukimatenyo a Naimbag ti Kasuratan iti Inaldaw

Makitayo kadi no kasano a makatulong kadakayo ti pannakaammo kadagiti kasta a kangrunaan a kinapudno? Iti daytoy napeggad ken nariribuk a panawen, ti kasta a pannakaammo salaknibannakayo manipud iti “barengbareng pannakaawagna kas ‘pannakaammo’” nga isaksaknap ni Satanas a Diablo. Ni Satanas pagparangenna ti bagina a “kasla anghel ti lawag,” ken dagiti pasurotna a “kasla ministro ti kinalinteg.” (1 Timoteo 6:20; 2 Corinto 11:13-15) Ti umiso a pannakaammo iti Biblia ti mangsalaknib kadakayo manipud iti makunkuna a pannakalawlawag a naibasar iti pilosopia dagiti “mamasirib ken nasaririt,” iti daytoy a lubong a ‘nangilaksid iti mismo a sao ni Jehova.’​—Mateo 11:25; Jeremias 8:9.

Gapu ta nagadu dagiti mangyaw-awan a sursuro ken pilosopia idi kaaldawan ni apostol Juan, binallaaganna dagiti umuna a siglo a Kristiano. Kinunana: ‘Saanyo a patien ti tunggal naipaltiing nga ebkas. Subokenyo dagiti naipaltiing nga ebkas tapno makitayo no nagtaudda iti Dios.’ (1 Juan 4:1) Usigenyo daytoy. No nakaawatkayo iti mensahe nga addaan dakkel nga epekto iti biagyo, mamatikayo kadi lattan gapu laeng ta kasla nagtaud dayta iti mapagtalkan a gubuayan? Siempre saan. Nalabit ammuenyo pay nga umuna ti gubuayanna ken sukimatenyo ti linaonna sakbay a surotenyo dayta.

Babaen ti panangipaayna iti naipaltiing a naisurat a rekord a naglaon kadagiti kangrunaan a kinapudno, pinagbalin ti Dios a posible dayta, tapno ‘masiguradoyo’ a dagiti sursurotenyo a mangigiya a lawag ket pudpudno. (1 Tesalonica 5:21) Nakomendaran dagiti natakneng ti panagpampanunotda a tattao idi umuna a siglo gapu ta “siaannad a suksukimatenda ti Kasuratan iti inaldaw” iti kasta masiguradoda a ti nasursuroda ket talaga a kinapudno. (Aramid 17:11) Maaramidanyo met dayta. Ipalubosyo a ti Biblia ti mangigiya kadakayo iti kinatalged, kas “iti pagsilawan nga agsilsilnag iti nasipnget a disso.” (2 Pedro 1:19-21) No kasta ti aramidenyo, ‘masarakanyonto ti mismo a pannakaammo iti Dios.’​—Proverbio 2:5.

[Footnote]

[Ladawan iti panid 4]

Ti Sao ti Dios ket kas iti pagsilawan

[Ladawan iti panid 5]

Ania ti nagan ti Dios?

[Ladawan iti panid 5]

Ania ti masakbayan ti sangatauan?

[Ladawan iti panid 6]

Ni Jesus kadi ti Mannakabalin-amin a Dios?

[Ladawan iti panid 6]

Sadino ti ayan dagiti natay?

[Ladawan iti panid 7]

Ti panagungar dagiti natay ti maysa kadagiti kangrunaan a kinapudno nga isursuro ti Biblia