Talaga Kadi a Mabalintayo nga Am-ammuen ti Dios?

“Daytoy kaipapananna ti agnanayon a biag, ti pananggun-odda iti pannakaammo maipapan . . . ti maymaysa a pudno a Dios.”​—Juan 17:3.

“O NAGUNEGEN ti kinabaknang ken sirib ken pannakaammo ti Dios!” kinuna ni apostol Pablo sana innayon: “Anian a di pannakasukimat kadagiti panangukomna ken di pannakatalunton kadagiti dalanna!” (Roma 11:33) Kaipapanan kadi dayta a saan a kabaelan dagiti tattao a gun-oden ti sirib ken pannakaammo maipapan iti Dios isu a saanda a mabalin a maam-ammo isuna agraman dagiti panggepna?

Para iti dadduma a relihioso a managpanunot, imposible a maam-ammotayo ti Dios. Kastoy ti kuna ti The Encyclopedia of Religion maipapan iti daytoy a kapanunotan: “Limitado ti kabaelantay nga ammuen maipapan iti Dios. . . . Ti Dios ket saan a mabalin a mainaganan wenno madepinar. Adda ngamin limitasion ti aniaman a nagan wenno depinasion, idinto ta ti Dios . . . awan ti limitasionna. . . . Saantay a mabalin nga am-ammuen agsipud ta imposible a maam-ammo.”a

Sigun iti magasin a Newsweek, adu a tattao kadagiti saan a relihioso a kagimongan ti agannayas a mangawat iti “maysa a kita ti baro a pilosopia” a ti prinsipiona no ar-arigen ket, “adda laeng maymaysa a kinapudno, ken ti kinapudno ket awan a talaga daytoy a kinapudno.”

Kaskasdi nga adu ti saan a makagun-od iti sungbat kadagiti saludsodda maipapan iti panggep ti biag. Makitkitada ngamin dagiti nakaro a parikut a nainaig iti kinapanglaw, sakit, ken kinaranggas. Kasta unay ti pannakaupayda gapu ta dida ammo ti mapasamak iti masanguanan. Mabalin nga agragutda a maammuan dagiti sungbat, ngem no awan ti masarakanda, mabalin a pagarupenda nga awan a talaga ti sungbat kadagiti saludsodda. Pagbanaganna, adu kadakuada ti immikkaten iti nakaikamenganda a relihion ket isudan ti makaammo iti kayatda a wagas ti iyaadani iti Dios​—no bilang mamatida pay laeng nga adda Dios.

Ti Panangmatmat ti Biblia

Dagidiay mamati iti Biblia ken agtarigagay a mangakseptar ken Jesu-Kristo kas ti Pannakangiwat ti Dios sigurado a kayatda a maammuan ti panangmatmat ti Biblia. Nalabit malagipmo a nadakamat idi ni Jesus ti dua a dalan, maysa nga ‘akaba ken nalawa . . . a dalan nga agturong iti pannakadadael’ ken ‘nailet . . . a dalan nga agturong iti biag.’ Inlawlawagna no kasanotayo a mailasin dagidiay magmagna iti tunggal dalan babaen ti panagkunana: “Babaen kadagiti bungada mailasinyonto ida.” Babaen kadagiti ania a kita ti bunga? Saan a babaen ti ibagbagada, no di ket babaen ti ar-aramidenda, kas iti inlawlawag ni Jesus: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid ti pagayatan ni Amak nga adda iti langlangit.” Saan nga umdas ti panangibagatayo a mamatitayo iti Dios. Masapul nga aramidentayo ti pagayatanna. Nainkalintegan ngarud a masapul a maaddaantayo nga umuna iti umiso a pannakaammo maipapan iti pagayatan ti Dios.​—Mateo 7:13-23.

Sibabatad nga insuro ni Jesus a talaga a mabalintayo nga am-ammuen ti Dios. Kinunana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Nalawag a mabalintayo a gun-oden ti sirib ken pannakaammo nga impalgak ti Dios no la ket ta ikagumaantayo a biroken dagitoy. Nupay kasta, ti sagut ti Dios kadagidiay mangaramid iti kasta ket biag nga agnanayon, isu a sigurado a makagunggona dayta a panagbirok.

[Footnote]

[Ladawan iti panid 4]

Imbaga ni Jesus a ti nailet a dalan ket agturong iti biag