Ti Ritual Dagiti Judio iti Panagdigus​—Nangrugian ti Bautismo?

NI JUAN A MAMMAUTISAR inkasabana ti “bautismo kas simbolo ti panagbabawi.” Imbilin met ni Jesus kadagiti pasurotna a mangaramidda kadagiti adalan ken bautisaranda ida.​—Marcos 1:4; Mateo 28:19.

Isursuro ti Biblia a dagiti mabautisaran kas Kristiano nasken a naan-anay a maitanebda iti danum. Kuna ti libro a Jesus and His World: “Dagiti umasping a ritual ket mabalin a makita iti adu a relihion, idi ken ita, iti adu a pagilian ken kultura.” Pasingkedan dayta a libro a “ti Judaismo ti nangrugian ti Nakristianuan a bautismo.” Pudno kadi dayta?

Dagiti Pagdigusan a Nausar iti Ritual Dagiti Judio

Dagiti arkeologo nga agkalkali iti asideg ti Bantay ti Templo iti Jerusalem nakabakabda ti dandani 100 a pagdigusan a maus-usar idi iti ritual dagiti Judio. Napetsaan dagita iti umuna a siglo K.K.P. ken umuna a siglo K.P. Sigun iti kitikit iti maysa a sinagoga manipud idi maikadua wenno maikatlo a siglo K.P., naaramid dagita a pagdigusan agpaay “kadagiti sangaili a makasapul kadagita.” Adda dagiti nasarakan a dadduma pay a pagdigusan iti paset ti Jerusalem a pagnanaedan idi dagiti pamilia ti papadi ken babaknang; dandani tunggal balay adda bukodna a pagdigusan nga us-usarenda idi iti ritualda.

Dagiti pagdigusan ket rektanggulo a tangke a natikap manipud iti nagdakkel a bato wenno nakali iti daga sa nakabite iti ladrilio wenno bato. Napalitadaan dagitoy tapno saan nga agubo. Agarup 1.8 por 2.7 a metro ti rukod ti kaaduan. Adda dagiti kalasugan a pagayusan ti tudo nga agturong kadagitoy a tangke. Di kumurang a maysa ket kagudua a metro ti kaadalem ti danum tapno mabalinmo ti interamente a rumareb no agrukobka. No dadduma, adda ababa a dibision iti nagbaetan ti agdan nga agturong iti tangke. Maipagarup a nausar ti maysa a bangir nga umulogan agingga iti manggugor a pagdigusan, no narugit idi ti agdigus. Iti met bangir ti umulianna tapno saan a marugitan.

Dagita a pagdigusan ket us-usaren idi dagiti Judio para iti ritual a panagdalusda. Ania ti nairaman idi iti dayta?

Ti Linteg ken Tradision Maipapan iti Panagdigus

Impaganetget ti Mosaiko a Linteg a masapul a nadalus ti ili ti Dios, iti man naespirituan wenno pisikal a wagas. Adda idi nadumaduma a kasasaad a mamagbalin kadagiti Israelita a narugit, isu a masapul a gugoranda ti bagida babaen ti panagdigusda ken pananglabada kadagiti kawesda.​—Levitico 11:28; 14:1-9; 15:1-31; Deuteronomio 23:10, 11.

Ni Jehova a Dios ket naan-anay a nadalus ken nasantuan. Isu a naikalikagum kadagiti papadi ken Levita a bugguanda dagiti ima ken sakada sakbay nga umadanida iti altarna ta no saan, madusada iti ipapatay.​—Exodo 30:17-21.

Patien dagiti eskolar nga idi umuna a siglo K.P., gapu iti pannakaipasdek ti relihion a Judaismo, ti panagdalus ti papadi ket naipaannurot metten kadagiti saan a Levita. Masansan nga agbuggo idi dagiti Essene ken Fariseo kas kaugalianda. Kastoy ti kuna ti maysa a reperensia maipapan idi kaaldawan ni Jesus: “Maikalikagum iti maysa a Judio ti ritual a kinadalus sakbay a sumrek iti Bantay ti Templo, sakbay nga agdaton, sakbay nga awatenna ti bingayna iti indaton ti padi ken agpaay iti dadduma pay nga umasping a panggep.” Kuna dagiti teksto iti Talmud a mainanama a naan-anay a rumareb dagiti agdigus.

Binabalaw ni Jesus dagiti Fariseo gapu iti panangipilitda iti ritual a panagdalus. Nabatad nga ar-aramidenda idi ti “nadumaduma a bautismo,” agraman ti panangbautisar babaen ‘kadagiti kopa, harra, ken basehas a gambang.’ Kinuna ni Jesus a dagiti Fariseo linabsingda dagiti bilin ti Dios tapno maipapilitda dagiti bukodda a tradision. (Hebreo 9:10; Marcos 7:1-9; Levitico 11:32, 33; Lucas 11:38-42) Awan ti nailanad iti Mosaiko a Linteg a nangikalikagum iti naan-anay a panangirareb iti bagi.

Ti kadi Nakristianuan a bautismo ket nangrugi babaen ti ritual a panagdigus nga ar-aramiden idi dagiti Judio? Saan!

Ritual a Panagdigus ken Nakristianuan a Bautismo

Inaramid dagiti Judio ti ritual a panagdalus agpaay iti bagbagida. Ngem ti bautismo nga inaramid ni Juan ket saan a ti kita ti ritual a panagdigus nga ar-aramiden dagiti Judio. Yantangay nagdinamag ni Juan kas ti Mammautisar, naiduma ngarud ti panangitaneb nga inaramidna. Ti papangulo ti relihion dagiti Judio ket nangibaon pay ketdi iti grupo a nangdamag kenkuana iti kastoy: “Apay . . . a mangbautisarka?”​—Juan 1:25.

Ti panagdalus nga impaannurot ti Mosaiko a Linteg ket nasken a maulit-ulit a kas iti kasansan ti panagbalin a narugit ti maysa nga agdaydayaw. Saan a kasta ti bautismo nga inaramid ni Juan wenno ti inaramid dagiti Kristiano idi agangay. Impakita ti bautismo ni Juan a ti nagbautisar ket nagbabawin ken inlaksidnan ti dati a wagas ti panagbiagna. Ti Nakristianuan a bautismo ket simbolo a ti maysa ket indedikarnan ti bagina iti Dios. Maminsan laeng nga aramiden dayta ti maysa a Kristiano, saan a maulit-ulit.

Ti ritual a panagdigus a naaramid kadagiti pagtaengan ti papadi a Judio ken kadagiti pangpubliko a pagdigusan iti Bantay ti Templo ket agparang laeng a kaasping ti Nakristianuan a bautismo. Naan-anay a naiduma ti kaipapanan dagitoy a panangitaneb. Kuna ti The Anchor Bible Dictionary: “Adda makapnek a panagtutunos dagiti eskolar a ni Juan [a Mammautisar] saanna a tinulad ti aniaman a partikular a bautismo iti lugarna,” kayatna a sawen, manipud iti Judaismo. Kasta met laeng ti mabalintay a maikuna iti bautismo a maar-aramid iti kongregasion Kristiano.

Ti Nakristianuan a bautismo irepresentarna ti “panagkiddaw iti Dios iti naimbag a konsiensia.” (1 Pedro 3:21) Daytat’ mangisimbolo a ti maysa a tao naan-anay nga indedikarnan ti bagina ken Jehova tapno agserbi Kenkuana kas maysa nga adalan ti Anakna. Ti naan-anay a pannakaitaneb iti danum ti maitutop a mangisimbolo iti dayta a dedikasion. Ti kasta a pannakaitaneb ti maysa a tao ti mangisimbolo iti ipapatayna iti dati a panagbiagna. Ti irurukuasna iti danum ti mangisimbolo a napagbiag manen tapno aramidennan ti pagayatan ti Dios.

Ni Jehova a Dios ipaayanna iti naimbag a konsiensia dagidiay nagdedikar ken nagbautisaren, isu a kastoy ti naipaltiing a kinuna ni apostol Pedro kadagiti kapammatianna: “[Ti bautismo] isalsalakannakayo met.” Dayta ket maysa a banag a di maaramidan ti aniaman a ritual iti panagdigus nga ar-aramiden dagiti Judio.