Salsaludsod Dagiti Agbasbasa

Iti ania nga anag a ti laeng nasarakan ti manangummong ket “maysa a lalaki iti tunggal sangaribu” ngem “awan ti uray maysa a babai” kadakuada?​—Eclesiastes 7:28, Ti Baro a Naimbag a Damag Biblia.

Tapno siuumiso a maawatantayo dagitoy naipaltiing a sasao, masapul nga amirisentayo nga umuna no kasano ti panangmatmat ti Dios kadagiti babbai. Ni Ruth, a manugang ti balo a ni Noemi, ket dinakamat ti Biblia kas ‘nakasaysayaat a babai.’ (Ruth 3:11) Sigun iti Proverbio 31:10, ti naimbag nga asawa a babai ket “napatpateg nga adayo ngem iti alahas.” (Ti Baro a Naimbag a Damag Biblia) Ania ngarud ti kayat a sawen ni Ari Solomon iti nagkauna nga Israel idi kinunana: “Nakasarakak . . . iti maysa a napudno a lalaki iti sangaribu, ngem awan a pulos ti napudno a babai”?​—Moffatt.

Ipakita ti konteksto a nababa idi ti moral a pagalagadan dagiti babbai idi kaaldawan ni Solomon. (Eclesiastes 7:26) Nalabit a kaaduanna, resulta dayta ti impluensia dagiti ganggannaet a babbai nga agdaydayaw ken Baal. Uray ni Ari Solomon ket naimpluensiaan ti adu a ganggannaet nga assawana. Kuna ti Biblia nga isu ket “naaddaan iti pito gasut nga assawa, piprinsesa, ken tallo gasut a kamalala, ket ti pusona nagin-inut a pinagannayas dagiti assawana” tapno agdayaw kadagiti didiosen. (1 Ar-ari 11:1-4) Nababa met ti moral a pagalagadan dagiti lallaki​—natakkon ti maysa a nalinteg a lalaki iti tunggal sangaribu, dandani saan pay ket a maibilang a napateg. Kastoy ti konklusion ni Solomon: “Daytoy laeng ti natakuatak, a ti pudno a Dios inaramidna a nalinteg ti sangatauan, ngem isuda nagsapulda iti adu a gakat.” (Eclesiastes 7:29) Maysa dayta a konklusion maipapan iti sangatauan​—ti tao kas ti natauan a puli, saan ket a ti lalaki a maidilig iti babai. Gapuna, ti nadakamat iti Eclesiastes 7:28 ket rumbeng a maibilang kas maysa a komento maipapan iti kaaduan a moral a kasasaad dagiti tattao idi kaaldawan ni Solomon.

Ngem adda pay sabali a mabalin a kayat a sawen dayta a bersikulo. Mabalin a naimpadtuan met dayta, agsipud ta awan pay a pulos ti babai a perpekto a nagtulnog ken Jehova. Ngem adda maysa a kasta a lalaki​—ni Jesu-Kristo.​—Roma 5:15-17.

[Ladawan iti panid 31]

“Maysa a lalaki iti tunggal sangaribu”