Maysa nga Agnanayon a Sagut Manipud iti Namarsua
DIYO kadi pakasdaawan a dagiti banag a patien dagiti sientista a napateg iti biag iti aniaman a planeta ket nadakamat wenno direkta a naipasimudaag iti umuna a kapitulo iti Biblia? Ania dagitoy?
Tapno masustiner ti biag, masapul nga adu ti danum, kas iti nadakamat iti Genesis 1:2. Masapul a kalkalainganna ti temperatura tapno saan nga agyelo ti danum. Rumbeng ngarud a kalkalainganna ti distansia ti planetatayo manipud iti init. Ti init ken ti epektona iti daga ket maulit-ulit a naitampok iti salaysay ti Genesis.
Tapno mabalin a pagnaedan ti tattao, ti maysa a planeta ket agkasapulan iti atmospera nga addaan iti partikular a naglalaok a gas. Nadakamat iti Genesis 1:6-8 daytoy napateg nga aspeto. Ti panagtubo ti mulmula, a nailadawan iti Genesis 1:11, 12 ket maysa a kangrunaan a pagtataudan ti nawadwad nga oksihena. Ti planeta a mabalin nga agtultuloy a pagbiagan ti adu ken nadumaduma nga animal ket nasken nga addaan iti namaga ken nabunga a daga, kas nailadawan iti Genesis 1:9-12. Kamaudiananna, tapno kalkalainganna ti paniempo, ti maysa a planeta ket masapul a nakalikig iti umiso nga anggulo ken agtalinaed a kasta—no maipapan iti kasasaad ti daga, adda maaramidan ti grabidad ti bulantayo. Naitampok iti Genesis 1:14, 16 ti kaadda daytoy a satellite ken ti dadduma kadagiti maitulongna.
Nupay awan ti tulong ti moderno a siensia, kasano a ti mannurat idi ugma a ni Moises nabaelanna nga itampok dagiti nadakamat a banag? Basta laeng kadi addaan ni Moises iti naisangsangayan a pannakaawat isu a natarusanna ti kinapateg dagita? No apay nga addaan ni Moises iti pannakaawat kadagita a banag ket gapu ta pinaltiingan ti Namarsua iti langit ken daga. Napateg nga ikabilangan dayta no panunotentayo ti nasientipikuan a kinaumiso ti salaysay ti Genesis.
Pasingkedan ti Biblia nga adda panggep dagiti nakaskasdaaw a maim-imatangantayo iti unibersotayo. Kuna ti Salmo 115:16: “No maipapan iti langlangit, kukua ni Jehova ti langlangit, ngem ti daga intedna iti annak ti tattao.” Kuna pay ti sabali a salmo: “Imbangonna ti daga kadagiti naipasdek a dissona; saanto a mapagdiwengdiweng dayta agingga iti tiempo a di nakedngan, wenno iti agnanayon.” (Salmo 104:5) No adda Namarsua a nangdisenio ken nangaramid iti uniberso ken iti napintas a planetatayo, sigurado a nainkalintegan a patien a kabaelanna met a sustineren dagitoy. Kaipapanan daytoy a makapagtalekka a matungpalto daytoy nagsayaat a kari: “Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Masiguradotayo ngarud a ti Dios “saanna a pinarsua [ti daga] a maipaay laeng iti awan kapapay-anna” no di ket ‘binukelna tapno pagnaedan’ nga agnanayon dagiti managyaman a tattao a mangbigbigbig iti ar-aramidna.—Isaias 45:18.
Sigun kadagiti Kasuratan, immay idi ni Jesus ditoy daga tapno isurona ti maipapan iti Dios ken ti panggep ni Amana a mangted iti biag nga agnanayon iti natulnog a sangatauan. (Juan 3:16) Mainanamatayo nga asidegen a ‘dadaelen ti Dios dagidiay mangdaddadael iti daga,’ ngem makalasat dagiti managayat iti talna a tattao manipud iti amin a nasion a mangakseptar iti probisionna a pannakaisalakan. (Apocalipsis 7:9, 14; 11:18) Anian a nagsayaatto ti biag bayat nga agnanayon nga itultuloy dagiti tattao a takuaten ken tagiragsaken dagiti nakaskasdaaw a parsua ti Dios!—Eclesiastes 3:11; Roma 8:21.
[Picture Credit Line iti panid 8]
Rinetrato ti NASA