Ti Naulpit a Lubong iti Kaaldawantayo

NI Maria ket agtawen iti 64 ken agsolsolon nga agbibiag. Natakuatan a natay idiay balayna gapu iti pannakakabkabil ken pannakabekkel babaen iti barut.

Adda grupo dagiti makapungtot a managderraaw a nangkabkabil iti tallo a polis nga atapenda a nangkidnap iti dua a babbarito. Binukbokanda iti gasolina ti dua kadagitoy a polis sada inuram dagitoy. Nakalibas ti maikatlo a polis.

Gapu iti panagtelepono ti maysa a di nangyam-ammo iti kinasiasinona, adda makaklaat a natakuatan. Iti maysa a hardin, nakalida dagiti bangkay ti uppat a lallaki a bakasionista iti dayta a lugar. Nakapiringda ken nakagalut dagiti imada. Sigun iti autopsia, sibibiagda idi naikalida.

Dagitoy a nakas-ang a pasamak ket saan nga eksena kadagiti pelikula a mangitampok iti kinaulpit ken makapasidduker a kinaranggas. Dagitoy ket bin-ig nga agpayso a pasamak a nabiit pay a nagbalin a paulo ti damdamag iti maysa a pagilian iti Latin-America. Nupay kasta, saan laeng nga iti dayta a pagilian a mapaspasamak dagita.

Inaldaw a gagangayen ti kinaulpit. Dagiti panagbomba, panangatake dagiti terorista, panangpapatay, panangraut, panagpipinnaltog, ken panangrames ti sumagmamano laeng kadagita. Maulit-ulit ken agdadata nga ipabpabuya ti media dagita a kinaulpit, isu a nairuamen dagiti tattao a mangbuya wenno makadamag iti kasta a kinaulpit.

Mabalin a mapanunotyo: ‘Ania ti mapaspasamaken iti agdama a lubong? Awan kadin a pulos ti panangikabilangan ti dadduma iti rikna ti sabsabali ken awanen ti panagraemda iti biag?’ Apay a rumbeng nga agnaedtayo iti kastoy a lubong?

Ita usigentayo ni Harry, maysa a lakay nga agtawenen iti 69 ken addaan iti kanser. Ni baketna ket agsagsagaba iti multiple sclerosis. Nupay kasta, situtulok a tumultulong dagiti kaarruba ken gagayyemda. “Diak ammo no ania ti kasasaadmi no awan amin dagitoy a tumultulong kadakami,” kinuna ni Harry. Iti maysa a panagadal idiay Canada a pagnanaedanna, nasurok a 50 a porsiento kadagiti mangay-aywan iti lallakay ken babbaket ti tumultulong kadagiti dida kapkapin-ano. Awan duadua nga adda dagiti am-ammom nga ordinario a tattao a kanayon a mangipakita iti kinaasi ken naimbag a nakem kadagiti kaarrubada. Wen, kabaelan dagiti tattao ti agbalin a naasi ken naimbag imbes nga agbalinda a naulpit.

Apay ngarud nga agraraira ti kinakas-ang? Apay nga agtignay a siuulpit dagiti tattao? Kabaelan kadi dagidiay naulpit ti agbalbaliw? Agpatingganto pay kadi ti kinaulpit? No kasta, kasano ken kaano?

[Picture Credit Line iti panid 3]

Tren: CORDON PRESS