Ania ti Pagarian ti Dios?

ANIA ti tema ti panangasaba ni Jesus? Sigun a mismo kenkuana, isu dayta ti Pagarian ti Dios. (Lucas 4:43) Idi dimngeg kenkuana dagiti tattao, sigurado a namin-adu a nangngegda ti panangdakamatna iti Pagarian. Nasdaaw wenno nariroda kadi? Dinamagda kadi kenkuana no ania dayta a Pagarian? Saan. Iti salaysay dagiti Ebanghelio, awan ti nadakamat maipapan kadagita a saludsod. No kasta, pamiliar kadi dagidi a tattao iti Pagarian ti Dios?

Kinaagpaysuanna, ti nagkauna a Kasuratan nga imbilang dagiti Judio kas nasantuan dineskribirna dayta a Pagarian. Babaen kadagiti nalaka a maawatan a termino, silalawag nga impakaammona no ania dayta ken no ania ti ibanagnanto. Iti kaaldawantayo, ad-adu pay ti maammuantayo maipapan iti Pagarian no sukimatentayo ti Biblia, kas iti inaramid idi dagiti Judio. Usigentayo ti pito a kinapudno nga isursuro kadatayo ti Biblia maipapan iti Pagarian. Ti umuna a tallo ket mabalin idin a maammuan dagiti Judio idi kaaldawan ni Jesus wenno kasakbayanna. Ti simmaganad a tallo ket impakaammo laeng ni Kristo wenno dagiti apostolna idi umuna a siglo. Ti naudi ket bimmatad iti kaaldawantayo.

1. Ti Pagarian ti Dios ket maysa a pudno a gobierno nga agtalinaed iti agnanayon. Impalgak ti kaunaan a padto ti Biblia a ti Dios ket mangibaon iti maysa a mangisalakan iti matalek a sangatauan. Isu ket naawagan kas ti ‘bin-i,’ Daydiay mangrisut kadagiti amin a parikut a nangrugi gapu iti iyaalsa da Adan, Eva, ken Satanas. (Genesis 3:15) Idi agangay, adda makapagagar a naipakaammo ken matalek nga Ari David maipapan iti dayta a ‘bin-i,’ wenno Mesias. Isu ket agturayto iti maysa a Pagarian. Dayta a gobierno ket naidumanto iti amin a dadduma a turay agsipud ta agtalinaedto iti agnanayon.​—2 Samuel 7:12-14.

2. Ti Pagarian ti Dios pagpatinggaennanto dagiti amin a gobierno ti tao. Ni propeta Daniel ket naikkan iti maysa a sirmata a nakakitaanna iti pito nga agsasaruno a kabilgan a turay iti lubong, manipud idi un-unana agingga iti kaaldawantayo. Kitaenyo ti makapagagar a tampok dayta a sirmata: “Iti kaaldawan dagidiay [maudi a tattao] nga ar-ari mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.” No kasta, amin a pagarian wenno gobierno daytoy a lubong​—agraman dagiti ar-aramidenda a gubat, panangirurumen, ken kinadakes​—ket mapukawton iti agnanayon. Kas ipakita ti padto ni Daniel, ti Pagarian ti Dios asidegen nga iturayanna ti intero a daga. (Daniel 2:44, 45) Saan laeng nga agpayso dayta a Pagarian no di ket daytanto ti kakaisuna a gobierno nga agtalinaed ditoy daga.a

3. Ti Pagarian ti Dios pagpatinggaennanto dagiti gubat, sakit, bisin, ken uray ti ipapatay. Ipalgak dagiti makaparagsak a padto ti Biblia dagiti aramidento ti Pagarian ti Dios para iti daga. Dayta a gobierno ti mangibanag iti di naaramidan ti aniaman a gobierno ti tao wenno iti aniaman a dida kabaelan nga aramiden. Agasenyo, naan-anay a madadaelton dagiti amin a pakigubat nga igam! “Pagsardengenna dagiti gubat agingga iti ungto ti daga.” (Salmo 46:9) Awanton dagiti doktor, ospital, wenno aniaman a kita ti sakit. “Awanto ti agtataeng nga agkuna: ‘Masakitak.’” (Isaias 33:24) Awanton ti bisin, kinakirang ti taraon, wenno malnutrision. “Maaddanto ti naruay a bukbukel iti daga.” (Salmo 72:16) Awanton dagiti puneraria, lamay, sementerio, morge, wenno ti panagsagaba a kakuykuyog dagita. Mapukawton ti ipapatay nga isu ti awanan asi a kabusortayo. Ti Dios “pudno nga alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.”​—Isaias 25:8.

4. Ti Pagarian ti Dios ket addaan iti Agturay a pinili ti Dios. Saan a ti Mesias ti nangdutok iti bagina kas Agturay. Saan met a dagiti imperpekto a tattao ti nangpili kenkuana. Mismo a ni Jehova a Dios ti nangpili kenkuana. Dayta ti ipasimudaag ti mismo a titulona a Mesias ken Kristo, a ti pareho a kaipapananda ket “Daydiay Napulotan.” No kasta, dayta nga Ari ket pinulotan, wenno dinutokan a mismo ni Jehova iti naisangsangayan nga akemna. Kinuna ti Dios kenkuana: “Adtoy! Ti adipenko, nga ig-iggamak a nalaing! Daydiay pinilik, nga inanamongan ti kararuak! Inkabilko kenkuana ti espirituk. Kinahustisia kadagiti nasion isunto ti iyegna.” (Isaias 42:1; Mateo 12:17, 18) Adda pay kadi nalalaing ngem iti Namarsua kadatayo a makaammo no ania a kita ti Agturay ti kasapulantayo?

5. Ti Agturay iti Pagarian ti Dios impakitanan iti intero a sangatauan nga isu ket maikari iti saadna. Ni Jesus iti Nazaret pinaneknekanna ti bagina nga isu ti naipadto a Mesias. Isu ket naipasngay iti pamilia a pinili a mismo ti Dios. (Genesis 22:18; 1 Cronicas 17:11; Mateo 1:1) Idi adda ditoy daga, tinungpalna ti nagadu a padto maipapan iti Mesias a naisurat sinigsiglo a nasaksakbay. Isu ket sinaksian met ti langit kas ti Mesias. Kasano? Bueno, ti Dios ket nagsao manipud langit nga inyam-ammona ni Jesus kas ti mismo nga Anakna; impatuldo dagiti anghel a ni Jesus ti naipadto a Mesias; ken nagaramid ni Jesus kadagiti milagro​—masansan nga iti imatang ti ginasut wenno rinibu pay ketdi a nakasaksi​—a sipapanayag nga inaramidna dayta babaen iti pannakabalin ti Dios.b Maulit-ulit nga impakita ni Jesus no ania a kita ti Agturay ti pagbalinanna. Isu ket saan laeng nga addaan iti pannakabalin a tumulong kadagiti tattao no di ket tarigagayanna met nga aramiden dayta. (Mateo 8:1-3) Isu ket mannakipagrikna, natured, napakumbaba, ken di agimbubukodan. Ti pakasaritaan ti biagna ditoy daga ket nailanad iti Biblia tapno mabasa ti amin.

6. Ti Pagarian ti Dios ket addaan iti 144,000 a makipagturay ken Kristo. Imbaga ni Jesus nga adda sabsabali, a pakairamanan dagiti apostolna, nga agturay a kaduana. Inawaganna dayta a grupo kas “bassit nga ipastoran.” (Lucas 12:32) Idi agangay, naibaga ken apostol Juan a ti bassit nga ipastoran ket agdagup iti 144,000. Addaanda iti makapainteres a trabaho idiay langit nga agturay a kadua ni Kristo kas ar-ari ken papadi.​—Apocalipsis 5:9, 10; 14:1, 3.

7. Ti Pagarian ti Dios ket agturturayen idiay langit ken sisasaganan nga agturay iti intero a daga. Dayta a maudi a kinapudno ket maysa kadagiti makapagagar unay a banag a maammuantayo. Ti Biblia ket mangted iti aglaplapusanan nga ebidensia a ni Jesus ket naikkanen iti autoridad kas Ari idiay langit. Isu ket agturturay itan idiay langit, ket asideg metten nga iturayanna ti intero a daga ken ibanagna dagiti naisangsangayan a padto a nadakamat itay. Ngem kasanotay a masigurado nga agturturayen ti Pagarian ti Dios? Ken kaano a mangrugi ti panagturayna iti intero a daga?

[Footnotes]