Kiddaw ti Intero a Lubong

ILADAWANYO iti panunotyo ti ginasut a milion, wenno binilion pay ketdi a tattao, nga agkidkiddaw iti maymaysa a banag. Ikarkararagda iti kangatuan nga autoridad iti uniberso a patganna ti maysa nga espesipiko a dawatda. Ngem manmano kadakuada ti makaammo no ania a talaga ti kaipapanan ti kidkiddawenda. Posible ngata a mapasamak dayta? Kinapudnona, inaldaw a mapaspasamak dayta. Ania dayta a kiddaw ti amin a tattao? Ti iyaay ti Pagarian ti Dios!

Sigun iti maysa a pattapatta, adda agarup 37,000 a relihion nga agkunkuna a Kristianoda, a patienda a ni Jesu-Kristo ti Liderda. Nasurok a dua a bilion ti miembro dagita a relihion. Nagadu kadakuada ti mangikarkararag iti masansan a maawagan iti Amami wenno ti Kararag ti Apo. Pamiliarkayo kadi iti dayta a kararag? Kas insuro ni Jesus kadagiti pasurotna, kastoy ti rugi dayta: “Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.”​—Mateo 6:9, 10.

Kadagiti simbaan, dagita a sasao ket ginasgasuten a tawen a sipapasnek nga ulit-uliten dagiti managdaydayaw. Ilulualo met dayta dagiti pamilia ken indibidual no adda dagiti nasayaat wenno dakes a pasamak. Sipapasnek wenno naimpusuan pay ketdi ti panangikararagda iti dayta. Inkabesa payen dayta dagiti dadduma sada ulit-uliten bayat iti panaglualoda ngem manmano wenno saanda pay ketdi nga ut-utoben ti kaipapananna. Ngem saan la a dagita a miembro ti Kakristianuan ti mangin-inanama ken mangikarkararag iti iyaay ti Pagarian ti Dios.

Umasping a Kiddaw Dagiti Saan a Kristiano

Adda nalatak a kararag dagiti Judio nga aw-awaganda iti Kaddish wenno lualo dagiti agladladingit. Nupay saan a direkta a mainaig dayta iti ipapatay wenno panagladingit, gagangay a mailualo no adda nagminatay. Kastoy ti kiddaw dayta a kararag: “Sapay koma ta ipasdek [ti Dios] ti Pagarianna bayat ti panagbiagmo . . .  ken aramidenna koma a dagus dayta.”a Iti sabali pay a kararag kadagiti nagkauna a sinagoga, nadakamat ti pananginanama iti Pagarian ti Mesias manipud iti balay ni David.

Magustuan met ti dadduma kadagiti saan a Kristiano ti ideya maipapan iti Pagarian ti Dios. Sigun iti The Times of India, kastoy ti kinuna ti maysa a prominente a lider ti relihion idi maika-19 a siglo nga agtarigagay a mamagkaykaysa kadagiti Hindu, Muslim, ken Kristiano: “Saan a maipasdek ti pudno a pagarian ti Dios malaksid no agkaykaysa ti daya ken laud.” Iti maysa a periodiko, kastoy met ti nabiit pay nga insurat ti prinsipal iti maysa a kolehio dagiti Islam idiay Strathfield Australia: “Kas kadagiti amin a Muslim, mamatiak nga agsublinto ni Jesus tapno ipasdekna ti pudno a Pagarian ti Dios.”

Awan duadua a binilionen ti mangin-inanama ken mangikarkararag iti Pagarian ti Dios. Ngem usigenyo ti maysa a makapainteres a kinapudno.

Mabalin nga ammoyo a dakami a Saksi ni Jehova, a mangipabpablaak iti daytoy a magasin, ket mapmapan iti binalaybalay iti lugaryo tapno makisarita kadagiti tattao maipapan iti Biblia. Bayat a maisursurat daytoy, ar-aramidenmi dayta a trabaho iti intero a lubong, iti 236 a pagilian ken iti nasurok nga 400 a lenguahe. Ti Pagarian ti Dios ti kangrunaan a tema ti panangasabami. Kinapudnona, ti laengen pakabuklan a paulo daytoy a magasin ket Ti Pagwanawanan Mangibumbunannag iti Pagarian ni Jehova. Masansan nga isalsaludsodmi kadagiti tattao no ikarkararagda dayta a Pagarian ket wen ti sungbat ti adu kadakuada. Ngem no damagenmi no ania dayta a Pagarian, kaaduanna nga ibagada a dida ammo, wenno di nalawag ken di masinunuo ti sungbatda.

Apay nga adu ti mangkidkiddaw iti Pagarian uray dida maaw-awatan no ania dayta? Gapu kadi ta ti Pagarian ti Dios ket komplikado ken narigat a maawatan? Saan. Ti Pagarian ket naan-anay ken sibabatad a nailawlawag iti Biblia. Kanayonanna, ti mensahe ti Biblia maipapan iti Pagarian ket makaipaay kadakayo iti pudno a namnama kadagitoy narikut a tiempo. Iti sumaganad nga artikulo, makitatayo no kasano nga ilawlawag ti Biblia dayta a namnama. Kalpasanna, maawatantayto no kaano a masungbatan ti kararag nga insuro ni Jesus maipapan iti iyaay dayta a Pagarian.

[Footnote]