Maika-123 a Panagturpos iti Gilead

Naidagadag Kadagiti Nagturpos iti Gilead a “Rugianda ti Agkali”

ITI panagturpos ti maika-123 a klase ti Watchtower Bible School of Gilead idi Sabado, Setiembre 8, 2007, adda 6,352 a dimmar-ay manipud iti 41 a pagilian. Iti alas dies ti agsapa, ti tserman ti programa a ni Anthony Morris, maysa a kameng ti Bagi a Manarawidwid, inabrasana dagiti timmabuno. Kalpasan ti panglukat a sasao, inyam-ammona ti umuna nga ispiker a ni Gary Breaux, a kameng ti Branch Committee ti Estados Unidos.

Impanamnama ni Kabsat Breaux kadagiti estudiante nga aniaman ti langada, napintasda latta iti imatang ni Jehova basta ar-aramidenda ti pagayatanna. (Jer. 13:11) Indagadagna kadagiti nagturpos a taginayonenda dayta a kita ti kinapintas. Simmaganad, ni Gerrit Lösch a kameng ti Bagi a Manarawidwid, impaganetgetna nga umiso laeng a manginanamatayo iti gunggona no agserserbitayo ken Jehova. (Heb. 11:6) Nupay kasta, rumbeng a ti motibotayo ket di agimbubukodan nga ayat.

Simmaganad, ti manangaywan iti Theocratic Schools Department a ni William Samuelson, indagadagna kadagiti nagturpos nga agtalinaedda iti nadayaw nga annongenda a mangiwaragawag iti agturturayen nga Ari. Naidagadag met nga iparangarangda ti dignidadda babaen ti nasayaat a konduktada.a Ni Sam Roberson, a katulongan a manangaywan ti Theocratic Schools Department, pinaregtana dagiti nagturpos a kanayon a kitaenda dagiti nasayaat a galad dagiti sabsabali. Iti kasta, ad-addanto a kabaelanda ti ‘maaddaan iti ayat iti intero a timpuyog dagiti kakabsat.’​—1 Ped. 2:17.

Kalpasan dagita a makaparegta a palawag, ti instruktor iti Gilead a ni Mark Noumair ininterbiuna ti sumagmamano kadagiti nagturpos a nangisalaysay kadagiti kapadasanda iti tay-ak ti serbisio bayat ti panagadalda iti Gilead. Nalawag a nadlaw ti tallaong ti panagayat dagitoy a misionero iti ministerioda ken ti tarigagayda a tumulong iti sabsabali. Kalpasanna, ni Kent Fischer ti Bethel Office idiay Patterson ininterbiuna dagiti kameng ti Branch Committee manipud iti tallo a pagilian a naaddaan kadagiti misionero. Ti komento dagitoy a naimbag a kakabsat pinatalgedanda ti tallaong, a pakairamanan ti adu a nagannak dagiti nagturpos, a maaywananto a naimbag dagiti baro a misionero kadagiti pakaidestinuanda. Ni Izak Marais iti Translation Services Department simmaruno nga ininterbiuna ti dadduma kadagiti nabayagen a misionero, a dagiti kapadasanda ket nangipaay kadagiti nagturpos iti panirpatan dagiti rag-o a masagrapdanto.

Ti kangrunaan a palawag iti programa, nga imparang ni Geoffrey Jackson a kameng ti Bagi a Manarawidwid, ket natemaan iti “Kalpasan ti Amin a Nangngeganyo​—Ania Itan ti Aramidenyo?” Ni Kabsat Jackson, a nagserbi kas misionero iti dandani 25 a tawen idiay Abagatan a Pacifico, inlawlawagna ti maudi a paset ti Sermon iti Bantay. Iti dayta a palawag, dinakamat ni Jesus ti dua a lallaki​—maysa a maag ken maysa a masirib​—a nangbangon kadagiti balay. Impaganetget ti ispiker a mabalin a naibangon ti dua a balay iti agpada a gagangay a lugar. Nupay kasta, ti nagibangonan daydiay maag ket iti kadaratan, idinto ta daydiay masirib ket nagkali agingga a nakasarak iti pamuon a bato a nangibangonanna iti balayna. Idi dimteng ti napigsa a bagyo, saan a naan-ano ti balay a naibangon iti bato ngem narba daydiay naibangon iti kadaratan.​—Mat. 7:24-27; Luc. 6:48.

Inlawlawag ni Jesus a daydiay maag ket umasping kadagidiay basta dimngeg laeng kadagiti pannursuro ni Jesus. Daydiay masirib ket umasping kadagidiay dimngeg ken nangyaplikar kadagiti pannursuro ni Jesus. Kinuna ni Kabsat Jackson kadagiti nagturpos, “No dagiti nasursuroyo iti panagadalyo iti Biblia ket iyaplikaryo iti pakaidestinuanyo, agbalinkayto a kas iti daydiay masirib a tao.” Kas pangserra, indagadagna kadagiti nagturpos a “rugianda ti agkali” kadagiti pakaidestinuanda.

Kamaudiananna, inawat dagiti nagturpos dagiti diplomada ken naipakaammo ti pakaidestinuanda. Kalpasanna, nangipaay ni Kabsat Morris iti sumagmamano pay a balakad. Pinaregtana ida a kanayon a tuladenda ni Jesus ken itultuloyda ti agpannuray ken Jehova tapno bumilegda. Kalpasanna, nagngudon ti programa ti panagturpos.

[Footnote]

[Kahon iti panid 31]

ESTADISTIKA TI KLASE

Bilang dagiti pagilian a nairepresentar: 10

Bilang dagiti pagilian a pakaibaonan: 24

Bilang dagiti estudiante: 56

Promedio nga edad: 33.5

Promedio a tawen iti kinapudno: 17.9

Promedio a tawen iti amin-tiempo a ministerio: 13.8

[Ladawan iti panid 32]

Ti Maika-123 a Nagturpos a Klase ti Watchtower Bible School of Gilead

Iti listaan ditoy baba, nanumeruan dagiti intar manipud iti sango nga agpalikud, ken nailista dagiti nagan manipud iti kannigid nga agpakannawan iti kada intar.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.