Pakaragsakanda nga Aramiden ti Pagayatan ti Dios
IMPASDEK ni Jesus ti maysa nga ulidan kadagiti amin a Kristiano idi inkararagna ken ni Amana: “Saan koma a ti pagayatak, no di ket ti pagayatam ti maaramid.” (Lucas 22:42) Dayta a napakumbaba nga ebkas ti panagpasakup ken ni Jehova ket iparparangarang ita ti minilion nga adipen ti Dios. Karaman kadakuada ti 52 nga estudiante ti maika-120 a klase ti Watchtower Bible School of Gilead. Idi Marso 11, 2006, maragragsakan ti nagturpos a klase gapu ta pinadpadaananda ti panangitungpalda iti pagayatan ti Dios kadagiti nagduduma a pagilian, uray iti laksid dagiti narigat a kasasaad.
Ania ti nangtignay kadagitoy a nagturpos tapno bay-anda a ti pagayatan ni Jehova ti mangiturong iti biagda? Kastoy ti kuna da Chris ken Leslie, agassawa a naibaon nga agserbi kas misionero idiay Bolivia: “Gapu ta pinaglikudanmin ti bagbagimi, sidadaankami a mangaramid iti aniaman a banag mainaig iti organisasion ni Jehova.” (Marcos 8:34) Innayon da Jason ken Chere, isuda a naibaon idiay Albania: “Adda karit iti tunggal annongen a maawattayo manipud iti organisasion ni Jehova. Nupay kasta, nabigbigmi a maikari ni Jehova iti naan-anay a panagtalektayo.”
Pammaregta a Mangitungpal iti Pagayatan ni Jehova
Ni George Smith, kameng ti pamilia ti Bethel nga agserserbi iti Art Department, linuktanna ti programa ti panagturpos babaen ti kararag. Ni Stephen Lett, kameng ti Bagi a Manarawidwid dagiti Saksi ni Jehova ken tserman iti programa ti panagturpos, inabrasana ti amin a timmabuno. Dagiti sangaili a naggapu iti 23 a pagilian nagbiaheda a napan iti Watchtower Educational Center idiay Patterson, New York, tapno tabunuanda daytoy a naragsak nga okasion. Imbaga ni Kabsat Lett iti nagturpos a klase nga “adda nabileg a banag” nga itungpalda. Intampokna ti “natibker ti pannakasarikedkedna a bambanag”—a pakaibilangan dagiti saan nga umiso a doktrina—a maibalintuag dagiti baro a misionero babaen ti bileg ti Kasuratan. (2 Corinto 10:4, 5) Ingngudona: “Anian a rag-o ti masagrapyo gapu ta us-usarennakayo ni Jehova a mangibalintuag kadagiti bambanag a natibker ti pannakairamutda kadagiti napudno ti panagpuspusoda a tattao iti teritoriayo!”
Ni Harold Jackson, kameng ti hedkuarter, impalawagna ti tema a “Sumagmamano a Banag a Laglagipen.” Kinunana a di koma pulos liplipatan dagiti baro a misionero ti ‘panangbirokda nga umuna iti pagarian ken iti kinalinteg ti Dios.’ (Mateo 6:33) Masapul a laglagipenda a ‘ti ayat ket mangpabileg’ ken maysa dayta a di mapaay a tulbek ti panagballigi. (1 Corinto 8:1) Kinunana: “Ti koma ayat ti mangtignay kadakayo kadagiti pannakilangenyo kadagiti sabsabali.”
Kalpasanna, ni Geoffrey Jackson, kameng ti Bagi a Manarawidwid a nagserbi kas misionero manipud idi 1979 agingga idi 2003, inyimtuodna kadagiti nagturpos, “Ania ti Sungsungbatanyo?” Impaganetgetna ti pateg ti natimbeng a panangmatmat iti bagi ken iti ministerio. Responsabilidad dagiti Kristiano ti agbannog nga agmula ken mangsibug kadagiti bin-i ti kinapudno. Ngem biang ni Jehova ti mangipaay iti naespirituan a panagrang-ay, yantangay ti ‘Dios ti mangpadakkel iti dayta.’ (1 Corinto 3:6-9) Innayon ni Kabsat Jackson: “Kalikaguman ni Jehova nga agtalinaedkayo a napigsa iti naespirituan. Ngem ania ti kangrunaan a responsabilidadyo? Ti panangayatyo ken ni Jehova ken ti panangayatyo kadagiti tattao a tulonganyo.”
Ti instruktor ti Gilead a ni Lawrence Bowen inlawlawagna ti tema nga “Ammuenyo No Kasanokayo a Rumbeng nga Agtignay.” Impalagipna kadagiti estudiante a simimilagro nga inwanwan ken sinalakniban ni Jehova dagiti Israelita sadi let-ang. (Exodo 13:21, 22) Iwanwanwan ken salsalaknibannatayo met ita. Ti maysa a pamay-anna ket babaen ti napulotan a kongregasion Kristiano, “maysa nga adigi ken sadiri ti kinapudno.” (1 Timoteo 3:14, 15) Dagiti baro a misionero masapul nga itandudoda ti kinapudno, a mangipaay iti panangiwanwan ken salaknib kadagiti napakumbaba.
Ni Wallace Liverance, ti sabali pay nga instruktor ti Gilead, indagadagna kadagiti nagturpos a dida liplipatan ti sao ti Dios nga adda iti ‘likudanda.’ Makuna nga adda ti sao ti Dios iti likudantayo iti anag a nakompleto ti Biblia sinigsiglon ti napalabas. Kas iti maysa a pastor nga umaw-awag manipud iti likudan ti maysa nga arban dagiti karnero, adda ni Jehova iti likudan dagiti ad-adipenna, nga iturturongna ida babaen “ti matalek ken masirib nga adipen.” (Isaias 30:21; Mateo 24:45-47) Ti Gilead School tinulonganna dagiti nagturpos tapno maparayrayda ti panangapresiarda iti dayta a klase adipen. Impaay pay ketdi dayta nga “adipen” ti Baro a Lubong a Patarus ti Nasantuan a Kasuratan. Ti ispiker pinaregtana dagiti nagturpos: “Alaenyo daytoy a nakadulin a gameng ti impormasion, ket usarenyo a mangisuro kadagiti tattao.” —Mateo 13:52.
Panangaramid iti Pagayatan ni Jehova iti Tay-ak ti Ministerio
Iti paset ti programa a “Sigagagar nga Ideklara ti Naimbag a Damag,” ti instruktor ti Gilead a ni Mark Noumair intampokna ti dadduma a kapadasan dagiti estudiante iti tay-ak ti pangasabaan bayat ti panageskuelada iti Gilead School. (Roma 1:15) Ipakita dagiti interbiu kadagiti nagturpos a pudno a magagaranda unay a mangasaba iti aniaman a gundaway.
Nakaawat dagiti estudiante iti kanayonan a pammaregta babaen ti maysa nga interbiu nga immatonan ni Kenneth Flodin kadagiti tallo nga agdaldaliasat a manangaywan nga agserserbi ita iti Estados Unidos. Da Richard Keller ken Alejandro Lacayo, a nakapagserbi idi idiay Abagatan ken Central America, inlawlawagda no kasanoda a nadaeran ti nagduduma a pakasuotan ken insalaysayda ti dadduma kadagiti bendision a tinagiragsakda bayat ti panagserbida kas misionero. Insalaysay ni Moacir Felisbino ti pannakasanay a nagun-odna bayat ti sisisinged a pannakipagtrabahona kadagiti misionero idiay Brazil, ti dimmakkelanna a pagilian.
Ininterbiu ni David Schafer ti tallo nga aduan iti kapadasan a misionero, da Robert Jones, Woodworth Mills, ken Christopher Slay. Insalaysay dagitoy tallo a kakabsat no kasano a nasursuroda ti agtignay buyogen ti panagtalek ken ni Jehova no maipasangoda kadagiti rigat. Pinasingkedanda iti klase a nasaganaanda a naimbag dagiti annongenda kas misionero gapu iti pannakasanay a nagun-odda iti organisasion ni Jehova. Kastoy ti pananggupgop ni Kabsat Mills: “Saan a dagiti makapalaing nga impormasion a nagun-odko iti Gilead ti nangnangruna a nakatulong kaniak no di ket ti insuro kaniak ti eskuelaan maipapan iti kinapakumbaba ken ayat.”
Ti kameng ti Bagi a Manarawidwid a ni Guy Pierce indatagna ti kangrunaan a palawag a napauluan “Saan Pulos a Mapaay ni Jehova.” Napaay ni Adan, ngem kayatna kadi a sawen a napaay ti Dios? Napaay kadi ti Dios a mangparsua iti maysa a perpekto nga Adan, kas ipagarup ti dadduma? Pulos a saan, yantangay “ti pudno a Dios inaramidna a nalinteg ti sangatauan.” (Eclesiastes 7:29) Ti panagtalinaed ni Jesus a natarnaw iti sidong ti karigatan a pannubok ditoy daga paneknekanna nga “awan ti mabalin a pagpambar wenno pagrason ni Adan a mapaay koma,” kinuna ti ispiker. Ti pannakasubok ti kinatulnog ni Adan iti minuyongan ti Eden ket adayo a nalaklaka ngem iti pannubok a napagballigian ni Jesus. Kaskasdi a napaay ni Adan. Nupay kasta, saan a pulos a mapaay ni Jehova. Matungpalto ti panggepna. (Isaias 55:11) Kinuna ni Kabsat Pierce kadagiti baro a misionero: “Addaankayo iti pribilehio a mangipadayag ken ni Jehova babaen ti kinamanagsakripisioyo. Sapay koma ta ni Jehova ti kumuyog kadakayo iti sadinoman a pagserbianyo kenkuana kas misionero.”
Kalpasan nga indanonna dagiti kablaaw ti nadumaduma a sanga nga opisina dagiti Saksi ni Jehova, ti tserman a ni Kabsat Lett inyawatnan kadagiti nagturpos dagiti diplomada ken dagiti pakaibaonanda. Ni Vernon Wisegarver, nabayagen a kameng ti pamilia ti Bethel, indauluanna dagiti timmabuno babaen ti maysa a pangserra a kararag.
Narikna ti 6,872 a timmabuno a ti programa ti panagturpos pinarayrayna ti regtada a mangaramid iti pagayatan ti Dios. (Salmo 40:8) Kinuna dagiti nagturpos a da Andrew ken Anna: “Indedikarmi ti biagmi ken ni Jehova. Inkarimi ken ni Jehova nga aramidenmi ti aniaman a kiddawenna kadakami, ket ita kidkiddawen ni Jehova a mapankami idiay Cameroon, Africa.” No maipapan kadakuada ken iti dadduma pay a kameng ti nagturpos a klase, magagaranda a mangirugi iti maysa a kurso a mangyeg kadakuada iti rag-o ken pannakapnek. Wen, pakaragsakanda nga aramiden ti pagayatan ti Dios.
[Kahon iti panid 17]
ESTADISTIKA TI KLASE
Bilang dagiti pagilian a nairepresentar: 6
Bilang dagiti pagilian a pakaibaonan: 20
Bilang dagiti estudiante: 52
Promedio nga edad: 35.7
Promedio a tawen iti kinapudno: 18.3
Promedio a tawen iti amin-tiempo a ministerio: 14.5
[Ladawan iti panid 18]
Ti maika-120 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.