Situtulok nga Agpausarda

“DAGITI tattao situtulok nga idatonda ti bagbagida.” (Salmo 110:3) Adda naisangsangayan a kaipapanan dagita a sasao kadagiti 46 nga estudiante iti maika-118 a klase ti Watchtower Bible School of Gilead. Ania ti inaramidda a panagsagana tapno matabunuanda daytoy nga eskuelaan, a mangsansanay kadagiti agbalin a misionero tapno maipaayda dagiti naespirituan a kasapulan dagiti tattao kadagiti sabali a pagilian? Da Mike ken Stacie a kameng ti maika-118 a klase, inlawlawagda: “Ti desisionmi nga agbiag a simple ket nakatulong a mangikkat kadagiti pakasingaanmi ken mangipangpangruna kadagiti naespirituan a bambanag. Dimi ipalubos a ti naballigi a negosiomi ti mangsinga kadagiti naespirituan a kalatmi.” Kas kada Mike ken Stacie, dagiti dadduma nga estudiante iti daytoy a klase ti situtulok a nagpausar ket iwarwaragawagda itan ti Pagarian iti uppat a nagduduma a kontinente.

Iti Sabado, Marso 12, 2005, adda 6,843 a siraragsak a nagdengngeg iti programa ti panagturpos. Nagserbi a tserman ni Theodore Jaracz, kameng ti Bagi a Manarawidwid dagiti Saksi ni Jehova. Kalpasan a sibabara nga inabrasana dagiti bisita manipud iti 28 a pagilian, intampokna ti pateg ti edukasion ti Biblia. Iti panangadawna ken ni William Lyon Phelps, maysa nga Amerikano a mannursuro, kinuna ti ispiker: “Maibilang nga edukado ti asinoman nga addaan iti adu a pannakaammo iti Biblia.” Nupay mabalin a makagunggona ti sekular nga edukasion, natantan-ok ti edukasion ti Biblia. Tulonganna dagiti tattao a gumun-od iti pannakaammo iti Dios, nga agturong iti biag nga agnanayon. (Juan 17:3) Ni Kabsat Jaracz kinomendaranna dagiti estudiante gapu ta situtulokda a maaddaan iti dakdakkel a pannakiraman iti programa a panangisuro iti Biblia a maitungtungpal iti nasurok a 98,000 a kongregasion dagiti Saksi ni Jehova iti intero a lubong.

Naintiempuan a Pammaregta Kadagiti Agturpos

Kalpasan ti panglukat a sasao ti tserman, inlawlawag ni William Samuelson ti suheto a “No Kasano nga Agbalinkayo a Nabaludbod a Kayo nga Olibo iti Balay ti Dios,” a naibatay iti Salmo 52:8. Inlawlawagna a ti kayo nga olibo ket piguratibo a nausar iti Biblia kas simbolo ti kinabunga, kinangayed, ken dignidad. (Jeremias 11:16) Iti panangidiligna kadagiti estudiante iti kaykayo nga olibo, kinuna ti ispiker: “Ibilangnakayo ni Jehova a nangayed ken addaan iti dignidad no simamatalek nga itungpalyo ti trabahoyo a panangikasaba iti Pagarian kadagiti lugar a pagserbianyo kas misionero.” No kasano a ti kayo nga olibo kasapulanna dagiti nabileg a ramut tapno agtultuloy a makapagbiag kabayatan ti tikag, kasapulan met a palagdaen dagiti estudiante ti naespirituan a ramutda tapno maanduranda ti panangidumduma, ibubusor, wenno dadduma a suot a pakaipasanguanda bayat ti panagserbida iti sabali a pagilian.​—Mateo 13:21; Colosas 2:6, 7.

Ni John E. Barr, maysa kadagiti tallo a kameng ti Bagi a Manarawidwid nga addaan iti paset iti programa, inlawlawagna ti tema a “Dakayo ti Asin ti Daga.” (Mateo 5:13) Impatuldona a no kasano a ti literal nga asin ket mangpreserba iti taraon, ti panangikasaba dagiti misionero iti Pagarian ti Dios ispalenna dagidiay mangipangag iti dayta, a mangsalaknib kadakuada manipud iti moral ken naespirituan a panagrakaya. Kalpasanna, iti naamaan a timek, indagadag ni Kabsat Barr kadagiti nagturpos a ‘salimetmetanda a natalna’ ti relasionda kadagiti dadduma. (Marcos 9:50) “Patanorenyo ti bunga ti espiritu, ken siguraduenyo a ti kondukta ken panagsasaoyo ket kanayon a makaay-ayo ken nakonsiderar,” imparegta ti ispiker.

“Agtalinaed a Nakalugan iti Bapor iti Adalem a Dandanum” ti tema ti palawag ni Wallace Liverance, maysa kadagiti instruktor iti Gilead. No kasano a ti maysa a bapor iti adalem a dandanum ket makapaglayag iti umiso a direksion, ti panangtarus “iti nauuneg a bambanag ti Dios”​—dagiti kinapudno mainaig iti panggep ti Dios ken no kasano a maibanag dayta​—tulonganna ti maysa a rumang-ay iti naespirituan. (1 Corinto 2:10) Malapdan ti panagrang-aytayo no basta agtalinaedtayo kadagiti narabaw a naespirituan a dandanum babaen ti panagbalin a kontento lattan “kadagiti pamunganayan a banag dagiti sagrado a pammakdaar ti Dios” ken mabalin a dakdakkel ti posibilidad nga agturong dayta iti “pannakarba maipapan iti pammati[tayo].” (Hebreo 5:12, 13; 1 Timoteo 1:19) “Bay-anyo a ‘ti kinabaknang ken sirib ken pannakaammo ti Dios’ ti mangsaranay kadakayo kadagiti pakaibaonanyo kas misionero,” inngudo ni Kabsat Liverance.​—Roma 11:33.

Ni Mark Noumair, ti sabali pay nga instruktor iti Gilead, nagpalawag iti tema a “Paneknekanyo Kadi ti Tawidyo?” Iti nasuroken nga 60 a tawen, nasayaat ti pakasarsaritaan ti Watchtower Bible School of Gilead gapu iti ‘bunton ti nasayaat a panangsaksi’ nga impaay dagiti nagturpos iti daytoy nga eskuelaan. (Genesis 31:48) Nagtultuloy daytoy a patawid ti Gilead kadagiti estudiante ti maika-118 a klase. Ni Kabsat Noumair pinaregtana dagiti estudiante a tuladenda dagiti nagkauna a Tecoita idi kaaldawan ni Nehemias babaen ti sipapakumbaba a pannakitunosda iti lokal a kongregasion ken kadagiti padada a misionero. Naidagadag a dida tultuladen ti natangsit a kababalin “dagidiay nadaeg” a tinukoy ni Nehemias no di ket situtulok nga agtrabahoda a sitatalna ken sipapakumbaba.​—Nehemias 3:5.

Dagiti Makaisuro a Kapadasan ken Interbiu

Ti simmaruno a paset ti programa ket napauluan iti “Nagtultuloy a Rimmang-ay ti Sao ti Dios.” (Aramid 6:7) Iti panangimaton ti instruktor iti Gilead a ni Lawrence Bowen, indemostra dagiti estudiante dagiti kapadasanda iti tay-ak ti ministerio bayat ti panageskuelada. Dagiti kapadasanda ipakitana a sireregta nga impakaammo dagiti estudiante ti Sao ti Dios ken sibabaknang a binendisionan ni Jehova dagiti panagreggetda.

Ni Richard Ashe ininterbiuna dagiti kameng ti pamilia ti Bethel a nakatrabaho dagiti estudiante. Silalawag nga inladawan dagiti komentoda no kasano a ti pamilia ti Bethel sinuportaranda dagiti estudiante tapno naan-anay a magunggonaanda bayat ti panageskuelada. Kalpasanna, kinasarita ni Geoffrey Jackson ti dadduma nga immun-unan a nagturpos iti Gilead. Intampokda dagiti adu nga oportunidad a linuktan ti kinamisionero tapno maidaydayaw ken maitan-okda ni Jehova. Kinuna ti maysa: “Dagiti tattao makitada ti amin nga ar-aramidem kas misionero. Imdengan, paliiwen, ken laglagipendaka.” Gapuna, naparegta dagiti estudiante nga ikagumaanda ti mangipakita ti nasayaat nga ulidan iti amin a gundaway. Daytoy a nasayaat a balakad ket awan duadua a napateg iti panaglabas ti panawen.

Ni Stephen Lett, kameng ti Bagi a Manarawidwid, impaayna ti pangserra a palawag a napauluan “Mapankayo kas Managawit iti ‘Nabiag a Danum.’” (Juan 7:38) Kinunana a kadagiti naglabas a lima a bulan, di matukod ti nagunggona dagiti estudiante babaen ti naanep a panagadalda iti kinapudno iti Sao ti Dios. Ngem ania ti aramiden dagiti kabbaro a misionero kadagiti impormasion a nagun-odda? Indagadag ni Kabsat Lett kadagiti nagturpos a sipaparabur nga iranudda dagita a naespirituan a taraon tapno maaddaan dagiti sabsabali iti “ubbog ti danum nga agburburayok a mangipaay iti agnanayon a biag.” (Juan 4:14) Innayon ti ispiker: “Diyo liplipatan nga ipaay ken ni Jehova, ‘ti ubbog ti nabiag a danum,’ ti dayaw ken dayag a pakaikarianna. An-anusanyo nga isuro dagidiay rimmuar manipud iti agbisbisin a Babilonia a Dakkel.” (Jeremias 2:13) Ingngudo ni Kabsat Lett ti palawagna babaen ti panangparegtana kadagiti estudiante a sigagagar a tuladenda ti espiritu ken ti nobia ket itultuloyda nga ibaga: “‘Umayka!’ Ket ti asinoman a mawaw umay koma; ti asinoman a mayat awatenna koma ti danum ti biag nga awan bayadna.”​—Apocalipsis 22:17.

Ni Kabsat Jaracz inserrana ti programa babaen ti panangibasana kadagiti kablaaw manipud iti nagduduma a pagilian. Kalpasanna, naibasa ti surat ti panagyaman dagiti kameng ti nagturpos a klase.

Sidadaankayo kadi nga agserbi kadagiti lugar nga addaan iti dakkel a panagkasapulan? No wen, itultuloyyo ngarud a ragpaten dagiti naespirituan a kalat, kas ti inaramid dagitoy nagturpos nga estudiante. Sagrapenyo ti rag-o ken pannakapnek a resulta ti siraragsak ken situtulok a panagpausar ken ni Jehova​—kas misionero man iti sabali a pagilian wenno kas maysa a ministro nga asideg iti lugarmo.

[Kahon iti panid 13]

ESTADISTIKA TI KLASE

Bilang dagiti pagilian a nairepresentar: 8

Bilang dagiti pagilian a pakaibaonan: 19

Bilang dagiti estudiante: 46

Promedio nga edad: 33.0

Promedio a tawen iti kinapudno: 16.5

Promedio a tawen iti amin-tiempo a ministerio: 12.9

[Ladawan iti panid 15]

Ti maika-118 a Nagturpos a Klase ti Watchtower Bible School of Gilead

Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.