Natignay nga Agserbi
ANIA ti nangtignay iti 24 nga agkabannuag a pagassawaan a mangpanaw kadagiti pamilia, gagayyem, ken nakairuamanda a lugar tapno agmisioneroda iti nadumaduma a pagilian? Apay a maragsakanda a mapan kadagiti lugar a kas iti Papua New Guinea ken Taiwan, agraman kadagiti pagilian ti Africa ken Latin America? Pagay-ayatda kadi ti makigasanggasat? Saan. Imbes ketdi, natignayda gapu iti napudno a panagayatda iti Dios ken iti kaarruba.—Mateo 22:37-39.
Siasino dagitoy a tattao? Isuda dagiti nagturpos iti maika-109 a klase ti Watchtower Bible School of Gilead. Idi Sabado, Setiembre 9, 2000, agdagup iti 5,198 ti nagtataripnong idiay Watchtower Educational Center—sadi Patterson, New York—ken kadagiti kabangibang a lugar tapno dumngeg iti naayat a pammagbaga a makatulong kadagiti nagturpos nga agbalin a naballigi a misionero.
Ti tserman iti programa ket ni Stephen Lett, miembro ti Teaching Committee ti Bagi a Manarawidwid dagiti Saksi ni Jehova. Imbasarna ti panglukat a sasaona iti Mateo 5:13, a “Dakayo ti asin ti daga.” Inlawlawag ni Kabsat Lett a sigurado nga agaplikar kadagiti nagturpos nga estudiante ti sasao ni Jesus. Kas pagarigan, mapananam ti asin ti nadumaduma a banag. No kasta, babaen ti epektibo a trabahoda a panangasaba, dagiti misionero ket kaasping ti asin iti piguratibo a wagas.
Pammakada a Pammaregta
Kalpasanna, inyam-ammo ni Kabsat Lett ti sumagmamano a nabayagen nga ad-adipen ni Jehova a nangted iti ababa ngem nabagas a Nainkasuratan a palawag. Ti immuna ket ni John Wischuk, nga agserserbi iti Writing Department. Ti temana a, “Ti Kaababaan a Salmo Itandudona ti Espiritu ti Kinamisionero,” ket naibasar iti Salmo 117. Kadagitoy nga aldaw, kasapulan ti sangalubongan a panangasaba iti “nasnasion” ken “inilin-ili” maipapan ken Jehova ken iti Pagarianna. Naparegta dagiti estudiante a mangtungpal iti ibagbaga ti Salmo 117 babaen ti panangidagadagna iti sabsabali a ‘Dayawenda ni Jah.’
Ti simmaruno nga inyam-ammo ti tserman ket ni Guy Pierce a kameng ti Bagi a Manarawidwid. Impalawagna ti tema nga “Agbalinkayo a Mannakibagay, ngem Natibker.” Nabileg ti Sao ti Dios. Iti Deuteronomio 32:4, naawagan ni Jehova a Dios a Bato, ngem ti Saona ipalubosna ti kinamannakibagay tangay naisurat dayta para iti amin a lenguahe ken kultura—wen, agpaay iti intero a sangatauan. Nabalakadan dagiti estudiante nga ikasabada ti Sao ti Dios, a bay-anda a ti mensahena ti mangtukay iti puso ken konsiensia dagiti tattao. (2 Corinto 4:2) “Agbalinkayo a nabileg agpaay kadagiti umiso a prinsipio, ngem agbalinkayo met a mannakibagay. Dikay tagibassiten dagiti agnanaed iti pakaidestinuanyo gapu iti naiduma a kulturada,” imbalakad ni Kabsat Pierce.
Ni Karl Adams, maysa kadagiti instruktor ti Gilead, nga agserserbi iti sangalubongan a hedkuarter iti dandanin 53 a tawen, impalawagna ti mamagpanunot a tema a “Papananyo Manipud Ita?” Wen, maidestino ti 24 a pagassawaan kas misionero iti 20 a nadumaduma a pagilian iti intero a lubong, ngem napagsaludsodanda, Inton addakayon sadiay ken nakitayon dayta, ania ngay ti aramidenyo? Agbibiagtayo iti di mapmapnek a lubong. Kayat dagiti tattao ti mapan iti kabbaro a luglugar ken agaramid iti baro a bambanag tapno maparagsakda ti bagida. Iti kasumbangirna, ni Jehova ti nangidestino kadagiti estudiante iti lugar a kayatna a papananda tapno aywananda ‘dagiti karnerona’ nga awanan panagimbubukodan. Saanda koma a tultuladen dagiti tattao iti nagkauna nga Israel a gapu iti panagimbubukodan napukawda ti gundaway nga usaren koma ida ni Jehova a mangbendision iti sangatauan. Imbes ketdi, tuladenda koma ni Jesu-Kristo, a kanayon nga inaramidna nga awanan panagimbubukodan ti pagayatan ni Amana ken nagtulnog iti amin a kasasaad a napasaranna.—Juan 8:29; 10:16.
Impalawag ti registrar ti Gilead School a ni Wallace Liverance ti tema a “Tagipatgenyo Dagiti Nauneg a Bambanag ti Dios.” Iti Kasuratan, naynay a mayasping ti Sao ti Dios kadagiti kinabaknang, agkakangina a saniata, agkakapateg a metal, ken bambanag a maipatpateg ken matarigagayan unay. Ipakita ti Proverbio 2:1-5 a tapno mabirokantayo “ti pannakaammo ti Dios,” masapul a birokentayo dayta a kas “nalmeng a gameng.” Ti nagpalawag pinaregtana dagiti estudiante nga itultuloyda a sukisoken dagiti nauneg a bambanag ti Dios bayat nga agserbida kadagiti baro a pakaidestinuanda. Kinuna ni Kabsat Liverance: “Praktikal daytoy agsipud ta pabilgenna ti pammati ken panagtalekyo ken Jehova ken patibkerenna ti determinasionyo nga agtalinaed iti nakaibaonanyo. Matulongannakayo nga agsao a sipapasnek ken agbalin a mas epektibo a mannursuro bayat nga ilawlawagyo dagiti panggep ti Dios iti sabsabali.”
Babaen ti panagpalawagna a kasla addada iti siled a pagadalan, rinepaso ti maysa pay nga instruktor iti Gilead School no kasano a binendisionan ni Jehova ti panangasaba dagiti estudiante iti napalabas a lima a bulan. Impatuldo ni Lawrence Bowen ti kinuna ni apostol Pablo iti Aramid 20:20 maipapan iti ministeriona iti publiko idiay Efeso, nga impaganetgetna ti panangasaba ni Pablo iti amin a gundaway. Paneknekan ti kapadasan dagiti estudiante a, kas ken apostol Pablo, dagidiay natignay iti ayat ti Dios ken iti padada a tattao kadagitoy a panawen dida bumdeng a mangipakaammo iti kinapudno ken mangtignay iti sabsabali babaen ti bileg ti Sao ti Dios. Agresulta daytoy iti nabaknang a bendision ni Jehova.
Agsao Dagiti Aduan Kapadasan
Bayat ti panageskuelada, nangnangruna a nagunggonaan dagiti estudiante daytoy a klase ti Gilead iti pannakitimpuyogda kadagiti miembro ti Branch Committee manipud iti 23 a pagilian, nga adda met idiay Patterson Educational Center gapu iti espesial a pannakasanay. Da Leon Weaver ken Merton Campbell iti Service Department ti nanginterbiu iti nadumaduma a miembro ti Branch Committee, a dadduma kadagitoy ket nagturpos met iti Gilead. Naliwliwa dagiti estudiante agraman pampamilia ken gagayyemda a dimngeg kadagitoy a natenneben a misionero.
Dagitoy ti dadduma pay a pammagbaga iti nagturpos a klase a makatulong kadakuada a makibagay iti pakaidestinuanda a pagilian: “Agbalinkayo a positibo. No adda mapasaranyo a karkarna unay wenno diyo maawatan, dikay sumuko. Agpannuraykayo ken Jehova”; “sursuruenyo ti mapnek iti adda, ken agtalekkayo nga ipaay ni Jehova dagiti kasapulanyo iti biag.” Addada pay komento a nairanta a tumulong kadagiti estudiante tapno mataginayonda ti rag-o iti pakaidestinuanda. Adtoy ti sumagmamano a nadakamat: “Dikay idilig ti destinoyo iti pagilian a naggapuanyo”; “sursuruenyo ti lenguahe iti dayta a lugar ken ibalikasyo a siuumiso tapno makasaritayo dagiti tattao”; “ammuenyo dagiti kustombre ken kultura dagiti tattao, ta daytoy ti makatulong kadakayo nga agtalinaed iti nakaibaonanyo.” Naparegta unay dagiti baro a misionero kadagitoy a komento.
Kalpasan ti interbiu, ni David Splane, a dati a misionero ken nagturpos iti maika-42 a klase ti Gilead ken agdama a kameng ti Bagi a Manarawidwid dagiti Saksi ni Jehova, impaayna ti kangrunaan a palawag nga addaan iti makaallukoy a tema nga, “Estudiante Wenno Nagturpos—Ania Kadagitoy?” Inimtuodna iti nagturpos a klase: “Kasano ti panangmatmatyo iti bagiyo bayat a mapankayo iti pakaidestinuanyo kas misionero? Kas kadi dagiti nagturpos a makaammon iti amin maipapan iti panagmisionero wenno kas estudiante nga adu pay ti masapul nga adalenna?” Inyunay-unay ni Kabsat Splane a ti masirib a nagturpos matmatanna ti bagina a kas estudiante. Matmatan koma dagiti misionero nga adda masursuroda iti amin a maam-ammoda iti pakaidestinuanda. (Filipos 2:3) Naparegta dagiti estudiante a makitunosda a naimbag kadagiti padada a misionero, iti sanga nga opisina, ken iti lokal a kongregasion. “Nakapasákayo iti maudi nga eksamenasion, ngem saankayo a nagsardeng iti kinaestudianteyo. Ibatadyo iti isuamin nga addakayo sadiay tapno agadal,” indagadag ni Kabsat Splane.
Kalpasan daytoy a palawag, inawat dagiti estudiante ti diplomada, ket naipakaammo iti tallaong ti pakaidestinuanda. Natukay ti rikna dagiti nagturpos nga estudiante idi binasa ti pannakabagi ti klase ti maysa a resolusion a nakailanadan ti determinasionda a mangyaplikar kadagiti naadalda iti Sao ti Dios tapno matignayda nga agaramid iti ad-adu pay iti sagrado a serbisio.
Awan duadua nga immanamong amin a dimmar-ay a ti naipaay a pammagbaga ti nangpabileg iti determinasionda a mangipakita iti ayatda iti Dios ken iti padada a tao. Dayta ti nakatulong met kadakuada nga agbalin nga ad-adda a determinado a tumulong iti naespirituan kadagiti tattao iti pakaidestinuanda kas misionero.
[Kahon iti panid 25]
ESTADISTIKA TI KLASE
Bilang dagiti pagilian a nairepresentar: 10
Bilang dagiti pagilian a pakaibaonanda: 20
Bilang dagiti estudiante: 48
Promedio nga edad: 33.7
Promedio a tawen iti kinapudno: 16.2
Promedio a tawen iti amin-tiempo a ministerio: 12.5
[Ladawan iti panid 26]
Ti Maika-109 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.