Naballigi a Misionero Dagiti Naballigi nga Estudiante
“DIAK pay la mamati a maaddaankami iti kastoy a pribilehio!” kinuna ni Will maipanggep iti panagturposda ken Patsy nga asawana kas estudiante ti maika-103 a klase ti Watchtower Bible School of Gilead. Immanamong da Zahid ken Jeni. “Pakaidayawanmi ti kaaddami ditoy,” kinunada. Nagadal a naimbag dagiti amin nga estudiante iti eskuelaan. Ita magagarandan a mangirugi iti karerada kas misionero. Ngem umuna, iti programa ti panagturpos idi Setiembre 6, 1997, immawatda iti naayat a balakad a tumulong kadakuada nga agballigi iti annongda kas misionero.
Ni Theodore Jaracz, a kameng ti Bagi a Manarawidwid, ti tserman ti programa. Dinakamatna a—malaksid pay iti pamilia ti Bethel ken dagiti pannakabagi ti 48 a sanga ti Watch Tower Society—adda a presente dagiti gagayyem ken kakabagian manipud Canada, Europa, Puerto Rico, ken ti Estados Unidos tapno ipatalgedda kadagiti estudiante ti suporta ken ayatda. Kinuna ni Brother Jaracz a dagiti misionero nga imbaon dagiti iglesia ti Kakristianuan masansan a sumiasida iti trabaho a panagmisionero ket tumapogda kadagiti akademiko a gannuat wenno makinamin pay ketdin iti politika. Iti kasupadina, ar-aramiden dagiti nagturpos iti Gilead ti nakasanayanda nga aramiden. Isursuroda ti Biblia kadagiti tattao.
Ni Robert Butler nga agpapaay iti opisina ti Sosiedad idiay Brooklyn ti simmaruno a nagpalawag iti tema a “Parang-ayenyo ti Dalanyo.” Inlawlawagna a nupay rukoden dagiti tattao ti balligi maibatay iti pinansial wenno dadduma pay a personal a gunggona, ti talaga a napateg ket no kasano a rukoden ti Dios ti balligi. Naballigi ti ministerio ni Jesus, saan a gapu ta adu ti napasurotna, no di ket gapu ta matalek iti annongna. Indaydayaw ni Jesus ni Jehova, ken saan a nagpatulaw iti lubong. (Juan 16:33; 17:4) Dagitoy ti rumbeng nga aramiden ti tunggal Kristiano.
“Agbalinkayo nga Adipen Dagiti Amin a Tattao,” imbalakad ni Robert Pevy, dati a misionero iti Oriente. Naballigi idi a misionero ni apostol Pablo. Ania ti palimedna? Pinagbalinna ti bagina nga adipen dagiti amin a tattao. (1 Corinto 9:19-23) Inlawlawag ti ispiker: “Ti nagturpos iti Gilead nga addaan iti kasta a kababalin dina ibilang a pannakaital-o ti panagserbi kas misionero, maysa a pagbatayan nga agturong kadagiti napatpateg a saad iti organisasion. Mapan ti misionero iti pakaibaonanna nga addaan maymaysa a motibo—agserbi, ta kasta ti ar-aramiden dagiti adipen.”
“Iyanninawyo kas Kadagiti Sarming ti Dayag ni Jehova.” Dayta ti imbalakad ni Gerrit Lösch, kameng ti Bagi a Manarawidwid, kadagiti estudiante. Imbatayna ti balakadna kangrunaanna iti 2 Corinto kapitulo 3 ken 4. Impalagipna kadakuada a ti pannakaammo iti Dios ket mayarig iti silaw a manglawag iti maysa a Kristiano no naimpusuan nga awatenna dayta. Mayanninawtayo dayta a lawag babaen ti panangikasaba iti naimbag a damag ken babaen ti panangmantener iti nasayaat a kababalin. “No dadduma mabalin a mariknayo a saankay a maikari,” kinunana. “No tumaud ti kakasta a rikrikna, agpannuraykayo ken Jehova, ‘tapno ti pannakabalin a nalablabes ngem ti gagangay biang koma ti Dios.’” (2 Corinto 4:7) Kas panangulit iti sasao ni Pablo iti 2 Corinto 4:1, inkalikagum ni Brother Lösch kadagiti estudiante: “Diyo pampanawan ti annongyo kas misionero. Pagtalinaedenyo a natarnaw ti sarmingyo!”
Inlawlawag ni Karl Adams, instruktor iti Gilead, ti makapainteres a tema a “Sadino ti Ayan ni Jehova?” Ti saludsod ket, saan a maipapan iti ayan ti Dios iti uniberso, no di ket maipapan iti pannakasapul iti panangikonsiderar iti panangmatmat ken kadagiti pakakitaan ti panangidalan ni Jehova. “No mariribukan,” kinunana, “uray ti tao a nabayagen nga agserserbi ken Jehova mabalin a malipatanna dayta.” (Job 35:10) Iti ngay moderno a panawentayo? Idi 1942, kasapulan idi ti ili ti Dios ti pannarabay. Nagpatingga kadi idin ti trabaho a panangasaba, wenno adu pay a trabaho ti iringpas? Ania ti pagayatan ni Jehova iti ilina? Iti panangad-adalda iti Sao ti Dios, naammuanda ti sungbat. “Sakbay a nagtapus ti tawen,” kinuna ni Brother Adams, “naaramiden dagiti plano para iti Watchtower Bible School of Gilead.” Pudno a binendisionan ni Jehova ti trabaho dagiti misionero nga imbaon dayta nga eskuelaan.
Ni Mark Noumair ti maikadua nga instruktor a nagpalawag. Iti palawagna, a napauluan “Kasanoyo nga Usaren ti Talentoyo?,” pinaregtana dagiti estudiante a mangyaplikar iti nasursuroda idiay Gilead apaman a makasangpetda iti baro a destinoda. “Maseknankay koma kadagiti sabsabali,” kinunana. “Makipulapolkayo. Pagreggetanyo nga ammuen dagiti kustombre, ti historia, ken dagiti banag a pagay-ayat dagiti tattao iti pagilian. No masursuroyo a dagus ti pagsasao, dikay marigatan a makibagay.”
Dagiti Nareregta nga Estudiante Pagrag-oanda ti Ministerio
Malaksid pay iti napasnek a panagadalda bayat ti kaaddada iti Gilead, naituding dagiti estudiante iti 11 a lokal a kongregasion. Kadagiti ngudo ti lawas, sireregta a nakiramanda iti panangasaba. Ni Wallace Liverance, instruktor iti Gilead, inawisna ti sumagmamano kadakuada a mangiranud kadagiti agdengdengngeg iti dadduma kadagiti kapadasanda. Maanninaw ti rag-oda bayat ti panangisalaysayda kadagiti kapadasanda iti panangasaba kadagiti shopping mall, paradaan, lugar ti negosio, iti lansangan, ken iti balbalay. Impamuspusan ti dadduma kadakuada a danonen dagiti tattao a sabali ti pagsasaoda nga agnanaed ken agtartrabaho iti teritoria ti kongregasionda. Di nakurkurang ngem sangapulo a panagadal iti Biblia iti pagtaengan ti naipasdek dagiti miembro ti maika-103 a klase bayat ti lima a bulan a panagsanayda.
Iranud Dagiti Nabayagen a Misionero ti Palimed ti Balligi
Kalpasan daytoy makaparagsak a paset ti programa, inawis da Patrick Lafranca ken William Van de Wall ti pito a kameng ti Branch Committee a mangdakamat kadagiti leksion a nasursuroda iti karerada kas misionero a pakagunggonaan ti klase. Pinalagipanda dagiti nagturpos nga ibilangda a naggapu ken Jehova ti pannakatudingda kas misionero ken determinadoda koma nga agtalinaed iti annongda. Dinakamatda dagiti nasayaat nga epekto dagiti misionero a nasanay idiay Gilead iti trabaho iti dadduma a pagilian.
Ania ti nakatulong kadagitoy a kameng ti Branch Committee nga agserbi kas nararagsak, nabunga a misionero iti adu a dekada? Sidedekket a nakipagtrabahoda kadagiti lokal a kakabsat ket nakasursuroda kadakuada. Inkagumaanda nga inadal ti pagsasao apaman a nakasangpetda iti destinoda. Nasursuroda ti makibagay ken makitunos kadagiti lokal a kustombre. Inranud ni Charles Eisenhower, a nagturpos iti umuna a klase ti Gilead ken misionero iti las-ud ti 54 a tawen, dagiti lima a “palimed” a nasursuro dagiti naballigi a misionero: (1) Regular a panagadal iti Biblia, (2) panagsursuro iti pagsasao, (3) agbalin nga aktibo iti ministerio, (4) manteneren ti talna iti pagtaengan dagiti misionero, ken (5) agkararag a kanayon ken Jehova. Inapresiar dagiti estudiante saan laeng a dagiti praktikal a balakad nga inawatda no di ket ti rag-o a maanninaw kadagitoy natenneb a misionero iti panagserbida ken Jehova. Kas kinuna da Armando ken Lupe, “naragsakda a mangisarsarita iti kabibiagda.”
Kalpasan dagiti interbiu, adda pay maysa a diskurso. Pinili ni Albert Schroeder, kameng ti Bagi a Manarawidwid, ti tema a “Ti Matalek a Panangaywan iti Sao ti Dios Ipalgakna Dagiti Napateg a Saniata ti Kinapudno.” Tangay ti Biblia ti kangrunaan a libro a maadal iti Eskuelaan ti Gilead, interesado dagiti estudiante iti ibagbagana. Inlawlawag ni Brother Schroeder nga idi narugian ti trabaho iti New World Translation of the Holy Scriptures, 50 a tawenen ti napalabas, dagiti napulotan a kameng ti New World Bible Translation Committee saanda a nagsammaked iti iyaanamong dagiti tattao no di ket nagpannurayda iti panangidalan ti nasantuan nga espiritu. (Jeremias 17:5-8) Nupay kasta, binigbig itay nabiit ti sumagmamano nga autoridad ti nangato nga estandarte nga impasdek ti New World Translation. Iti suratna iti Sosiedad, kinuna ti maysa nga eskolar: “Ammok ti de kalidad a publikasion no makakitaak iti maysa, ket nagsayaat ti gapuanan ti ‘New World Bible Translation Committee.’”
Kalpasan daytoy a palawag, inawat dagiti estudiante ti diplomada, ken nayanunsio iti tallaong ti pakaibaonanda. Makatukay rikna a kanito daytoy kadagiti miembro ti klase. Bayat nga ibasbasa ti pannakabagi ti klase ti maysa a surat a pagyaman, adu ti kasla adda nagsullat iti karabukobda ken nakalua. Adu a tawen a nagsagsagana ti dadduma kadagiti estudiante para iti trabaho a panagmisionero. Tangay ammoda nga Ingles ti pagsasao a mausar idiay Gilead, immakar ti sumagmamano kadagiti kongregasion nga agsasao iti Ingles tapno maparang-ayda ti Ingles-da. Immakar dagiti dadduma iti lugar nga ad-adda nga agkasapulan iti payunir, iti man bukodda a pagilian wenno iti sabali a pagilian. Ket dagiti dadduma nagsaganada babaen ti panangbasada kadagiti kapadasan, panagsukisok, wenno maulit-ulit a panangbuya iti videocassette ti Sosiedad a To the Ends of the Earth.
Natukay ti rikna da Will ken Patsy, a nadakamat iti pangrugian, iti personal nga interes a naipakita kadagiti estudiante. “Inar-arakup ken rinetratodakami uray dagiti tattao a di makaam-ammo kadakami. Inalamanonakami ti maysa a kameng ti Bagi a Manarawidwid sana kinuna, ‘Pagpannakkeldakayo!’” Di pagduaduaan a maipatpateg unay dagiti estudiante ti maika-103 a klase. Nasanayda a naimbag. Ti panagadal dagiti naballigi nga estudiante idiay Gilead pagbalinenna ida a naballigi a misionero.
[Kahon iti panid 22]
Estadistika ti Klase
Bilang dagiti pagilian a nairepresentar: 9
Bilang dagiti pagilian a pakaibaonanda: 18
Bilang dagiti estudiante: 48
Bilang dagiti agassawa: 24
Promedio nga edad: 33
Promedio a tawen iti kinapudno: 16
Promedio a tawen iti amin-tiempo a ministerio: 12
[Ladawan iti panid 23]
Ti Maika-103 a Nagturpos a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.
[Ladawan iti panid 24]
Sadino ti papananmi?