Ti Natulok nga Espiritu Iyegna Dagiti Tattao iti Gilead
NAIPASDEK ti Watchtower Bible School of Gilead tapno mangsanay kadagiti dedikado a lallaki ken babbai nga agserbi kas misionero iti sabali a pagilian. Siasino dagiti kualipikado a mapan iti Gilead? Dagidiay addaan iti natulok nga espiritu. (Salmo 110:3) Talaga a nabatad dayta idi Setiembre 8, 2001, iti panagturpos ti maika-111 a klase.
Situtulok ti dadduma nga estudiante iti dayta a klase a nangpanaw kadagiti pamilia, gagayyem, ken ti pagilianda tapno agserbi iti lugar a dakdakkel ti panagkasapulan. Iti panangaramidda iti dayta, sinubokda ti bagbagida no makaaramidda iti panagbalbaliw nga agnaed iti naiduma a kasasaad. Kas pagarigan, inyurnos da Richer ken Nathalie ti aktibidadda tapno umakarda idiay Bolivia, da Todd ken Michelle idiay Dominican Republic, ken da David ken Monique iti maysa a pagilian iti Asia tapno isaknapda ti naimbag a damag ti Pagarian ti Dios. Nagserbin ti dadduma nga estudiante idiay Nicaragua, Ecuador, ken Albania.
Idi haiskul, naparegta ni Christy nga agadal iti pagsasao nga Español, a nakatulong kenkuana a nangbusbos iti dua a tawen idiay Ecuador sakbay a nakiasawa. Nakitimpuyog ti dadduma kadagiti ganggannaet-pagsasaona a kongregasion iti pagilianda. Naiduma met a karit ti naipasango kada Saul ken Priscilla, nga imparangarangda ti natulok nga espiritu babaen ti panangikagumaanda a mangparang-ay iti panagsaoda iti Ingles sakbay ti panagadalda.
Nagpartak a limmabas ti 20 a lawas a panagsanay kas misionero. Dimtengen ti aldaw ti panagturpos, ket kadua dagiti estudiante dagiti gagayyem ken pamiliada, a dumdumngeg iti nainsiriban a pammagbaga ken pammakada a sasao a pammaregta.
Ni Theodore Jaracz, a nagturpos iti maikapito a klase ti Gilead School ken agserserbi ita kas miembro ti Bagi a Manarawidwid dagiti Saksi ni Jehova, ti tserman ti programa. Intampok dagiti panglukat a sasaona ti kinapudno a kas maysa nga organisasion, pulos a ditay sumiasi iti panggep ti panangsanay kadagiti estudiante iti Gilead, nga isu ti panangikasaba iti naimbag a damag ti Pagarian iti intero a mapagnaedan a daga. (Marcos 13:10) Ti Gilead kabalanna dagiti kualipikado nga estudiante a mangitungpal iti daytoy trabaho a panangasaba a nasaksaknap ngem iti napalabas ken kadagiti paset ti lubong a makasapul kadagiti nasanay a misionero. Binagbagaan ni Brother Jaracz dagiti estudiante nga usarenda a naimbag ti nasursuroda iti Gilead bayat a maikaduada itan kadagiti misionero nga agserserbi kadagiti 19 a pagilian a pakaibaonanda.
Naintiempuan a Balakad Kadagiti Nagturpos
Simmaruno dagiti palawag. Ni William Van De Wall, miembro ti Komite ti Sanga iti Estados Unidos, impalawagna ti tema a “Kinaregta a Mangasaba—Pakailasinan Dagiti Pudno a Kristiano.” Inturongna ti atension iti annongen a ‘mangaramid iti ad-dalan,’ a nailanad iti Mateo 28:19, 20, ken binalakadanna dagiti estudiante: “Tuladenyo ni Jesus a sireregta ken sipapasnek a nangitungpal iti trabahona.” Tapno matulongan dagiti agbalin a misionero a mangtaginayon iti regtada iti trabaho a panangasaba, pinabilegna ida: “Surotenyo ti praktikal nga eskediul; taginayonenyo ti nasayaat a personal a panagadal, a dikay paudi iti teokratiko a bambanag; ken pagtalinaedenyo a naipamaysa ti panunotyo iti rason no apay nga addakayo iti nakaidestinuanyo.”
Ti simmaruno a nagpalawag ket ni Guy Pierce, miembro ti Bagi a Manarawidwid. Pinalawana ti tema nga “Itultuloyyo a Patanoren ‘ti Pannakabalinyo nga Agrason.’” (Roma 12:1) Nangted iti praktikal a balakad iti nagturpos a klase, a pinaregtana ida nga usarenda ti inted-Dios nga abilidadda nga agpanunot ken agrason. Kunana: “Itultuloyyo a mennamennaen no ania ti ibagbaga ni Jehova kadakayo babaen ti Saona. Daytoy ti mangsaluad kadakayo.” (Proverbio 2:11) Binagbagaan met ni Brother Pierce ti klase a saanda nga agbalin a dogmatiko iti panangmatmatda tapno saanda a malapdan ti ‘pannakabalinda nga agrason.’ Sigurado a makatulong unay dagitoy naintiempuan a balakad kadagiti nagturpos bayat nga agserbida kas misionero.
Ti maysa kadagiti instruktor ti Gilead ti simmaruno nga inyam-ammo ti tserman, ni Lawrence Bowen, a nagpalawag iti tema nga “Ikeddengyo nga Awan ti Ammuenyo.” Dinakamatna a mainaig iti trabahona a panagmisionero idiay Corinto, ni apostol Pablo ‘inkeddengna a saanna nga ammuen ti aniaman a banag . . . malaksid ken Jesu-Kristo, ken isuna a nailansa.’ (1 Corinto 2:2) Ammo ni Pablo a ti kabibilgan a puersa iti uniberso, ti nasantuan nga espiritu, ti mangsuportar iti mensahe a nayanninaw iti intero a Biblia: Ti pannakaalangon ti kinasoberano ni Jehova babaen ti naikari a Bin-i. (Genesis 3:15) Naidagadag kadagiti 48 nga estudiante a nagturpos a tuladenda da Pablo ken Timoteo tapno agbalinda a naballigi a misionero, a salimetmetanda “ti pagtuladan iti makapasalun-at a sasao.”—2 Timoteo 1:13.
Ti tema ti maudi kadagiti agsasaruno a panglukat a palawag ket “Apresiarenyo ti Pribilehioyo, Sagut a Naggapu iti Dios.” Ni Wallace Liverance, registrar ti Gilead School, tinulonganna dagiti nagturpos a mangbigbig a dagiti pribilehio iti serbisio ket ebkas ti di kaikarian a kinamanangngaasi ti Dios, ket saan a banag a maikari kadakuada wenno nagapuananda. Iti panangdakamatna iti ulidan ni apostol Pablo, kinuna ni Brother Liverance: “Ti panangpili ni Jehova ken Pablo nga agbalin nga apostol kadagiti nasion ket saan a gapu kadagiti nagapuananna, tapno agparang a nagun-odan ni Pablo ti kalintegan iti dayta nga annongen wenno maikari iti dayta. Saan nga agpannuray dayta iti kinabayag iti serbisio wenno kapadasan. Iti natauan a panangmatmat, agparang a kasla ni Bernabe ti nainkalintegan a mapili. Saan a naibasar dayta iti personal nga abilidad; nabatad a nalalaing nga agpalawag ni Apolos ngem ni Pablo. Dayta ket ebkas ti di kaikarian a kinamanangngaasi ti Dios.” (Efeso 3:7, 8) Pinaregta ti Brother Liverance dagiti nagturpos nga usarenda ti sagut a naited kadakuada, wenno pribilehio iti serbisio, a tumulong iti sabsabali nga agbalin a gayyem ti Dios ken umawat iti “sagut nga ipaay ti Dios . . . , agnanayon a biag babaen ken Kristo Jesus nga Apotayo.”—Roma 6:23.
Simmaganad, indauluan ti maysa pay nga instruktor iti Gilead, ni Mark Noumair, ti nabiag a diskusion kadagiti estudiante iti tema a “Ti Panagsagana Mangiturong iti Naimbag a Resulta.” (Proverbio 21:5) Impakita dagiti kapadasan a no ti mangaskasaba ket nakasagana a naimbag iti ministerio, nangnangruna no insaganana ti pusona, maaddaanto iti pudno nga interes kadagiti tattao. Saan a maawanan iti rumbeng nga ibagana. Imbes ketdi, sawenna wenno aramidenna dagiti bambanag a tumulong kadakuada iti naespirituan. Kinuna ni Brother Noumair a “daytoy ti tulbek ti panagbalin a naballigi a misionero,” a dinakamatna ti bukodna a kapadasan kas misionero idi idiay Africa.
Panagserbi kas Misionero—Makapnek a Karera
Ininterbiu da Ralph Walls ken Charles Woody ti dadduma a misionero nga aduan kapadasan, nga adda met idiay Patterson Educational Center para iti naisangsangayan a pannakasanay. Naipaganetget iti interbiu a ti ayat kadagiti tattao ti mangyeg iti rag-o iti panagserbi kas misionero. Makaliwliwa kadagiti estudiante ken kadagiti pamilia ken gagayyemda nga adda iti tallaong ti umimdeng kadagitoy aduan kapadasan a misionero bayat nga inlawlawagda no apay a makapnek a karera ti panagserbi kas misionero.
Ni John E. Barr, nga agserserbi kas miembro ti Bagi a Manarawidwid, ti nangipaay iti kangrunaan a palawag a napauluan, “Kantaanyo ni Jehova iti Baro a Kanta.” (Isaias 42:10) Dinakamat ni Brother Barr a siam a daras nga agparang iti Biblia ti ebkas a “baro a kanta.” Insaludsodna, “Ania daytoy baro a kanta?” Kalpasanna kinunana: “Ipalgak ti konteksto a ti baro a kanta ket nakanta gapu kadagiti baro a pasamak mainaig iti panangusar ni Jehova iti kinasoberanona.” Pinaregtana dagiti estudiante nga itultuloyda ti makipagkanta iti panangidayaw iti naballigi a Pagarian ti Dios iti ima ti Mesianiko nga Ari, ni Kristo Jesus. Dinakamat ni Brother Barr a ti panagadalda iti Gilead tinulonganna ida nga ad-adda a mangtarus iti nadumaduma nga aspeto daytoy “baro a kanta.” “Impaganetget kadakayo ti eskuelaan ti ‘panangkantayo’ iti pammadayaw ken Jehova a maitunos kadagiti kakabsatyo iti sadinoman a papananyo; kanayon a makitunoskayo iti sabsabali iti pakaidestinuanyo.”
Kalpasan a naited ti diploma kadagiti estudiante, binasa ti pannakangiwat ti klase ti surat ti panagyaman gapu iti pannakasanayda iti Gilead.
Mapalawayo kadi ti panagserbiyo iti Dios ken mapagbalin dayta nga ad-adda a nabunga? No kasta, pagreggetanyo nga aramiden ti kas iti inaramid dagitoy nagturpos nga estudiante. Daytoy ti namagbalin kadakuada a kualipikado para iti tay-ak ti panagmisionero. Dakkel a rag-o ti itden ti siraragsak ken situtulok a panagserbi iti Dios.—Isaias 6:8.
[Kahon iti panid 25]
ESTADISTIKA TI KLASE
Bilang dagiti pagilian a nairepresentar: 10
Bilang dagiti pagilian a pakaibaonanda: 19
Bilang dagiti estudiante: 48
Promedio nga edad: 33.2
Promedio a tawen iti kinapudno: 16.8
Promedio a tawen iti amin-tiempo a ministerio: 12.6
[Ladawan iti panid 26]
Ti Maika-111 a Klase ti Watchtower Bible School of Gilead
Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.
(1)Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2)Morin, N.; Biney, J.; López, M.; Van Hout, M.; Cantú, A.; Szilvassy, F. (3)Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4)Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.